ವಿದ್ಯಾರ್ಥಿಗಳಿಂದ ಮೈಕ್ರೊ ಟರ್ಬೊ ಜೆಟ್‌ ಎಂಜಿನ್‌ ಆವಿಷ್ಕಾರ

ಯಲಹಂಕ: ಸಹಸ್ರಾರು ಕಿಲೋ ಮೀಟರ್‌ ದೂರದಲ್ಲಿರುವ ಶತ್ರು ನೆಲೆಯನ್ನು ಕರಾರುವಕ್ಕಾಗಿ ನಿಗದಿತ ಅವಧಿಯಲ್ಲಿ ಧ್ವಂಸಗೊಳಿಸುವ ಚಾಲಕ ರಹಿತ ಯುದ್ಧ ವಿಮಾನಗಳ ಸಾಮರ್ಥ್ಯ‌ವನ್ನು ಅಧಿಕಗೊಳಿಸುವ ‘ಮೈಕ್ರೊ ಟರ್ಬೊ ಜೆಟ್‌ ಇಂಜಿನ್‌’ ಅನ್ನು ನಿಟ್ಟೆ ಮೀನಾಕ್ಷಿ ತಾಂತ್ರಿಕ ಮಹಾವಿದ್ಯಾಲಯದ ವಿದ್ಯಾರ್ಥಿ ಅನ್ವೇಷಿಸಿದ್ದಾರೆ.

ನಿಟ್ಟೆ ಮೀನಾಕ್ಷಿ ತಾಂತ್ರಿಕ ಮಹಾವಿದ್ಯಾಲಯದ ವಿದ್ಯಾರ್ಥಿಗಳಾದ ಬಿ.ಎ. ವಿನೀತ್‌ ಕುಮಾರ್‌, ಜುಬಿನ್‌ ಡೇವಿಡ್‌ ಹಾಗೂ ಅಪೂರ್ವ ಗುಪ್ತ ವಿದ್ಯಾಲಯದ ವೈಮಾನಿಕ ತಂತ್ರಜ್ಞಾನ ವಿಭಾಗದ ಸಹ ಪ್ರಾಧ್ಯಾಪಕ ಪ್ರೊ. ಎನ್‌. ವಿನಾಯಕ ಅವರ ಮಾರ್ಗದರ್ಶನದಲಅ್ಲಿ ಈ ಇಂಜಿನ್‌ ಅನ್ನು ಸಿದ್ಧಪಡಿಸಿದ್ದಾರೆ. ಈ ಇಂಜಿನ್‌ ಅಳವಡಿಕೆಯಿಂದ ಚಾಲಕರಹಿತ ಯುದ್ಧವಿಮಾನಗಳು ಧ್ವನಿಯ ವೇಗಕ್ಕಿಂತ ದುಪ್ಪಟ್ಟು ವೇಗದಲ್ಲಿ ಹಾರಿ ನಿಗದಿತ ಗುರಿಯನ್ನು ತಲುಪಿ, ಶತ್ರು ನೆಲೆಗಳನ್ನು ಧ್ವಂಸಗೊಳಿಸಬಲ್ಲವು.

ಇಪ್ಪತ್ತನೆಯ ವಾರ್ಷಿಕೋತ್ಸವದ ಸಲುವಾಗಿ ಬೆಳಗಾವಿಯ ವಿಶ್ವೇಶ್ವರಯ್ಯ ತಾಂತ್ರಿಕ ವಿಶ್ವವಿದ್ಯಾಲಯ ಏರ್ಪಡಿಸಿದ್ದ ರಾಜ್ಯ ಮಟ್ಟದ ತಂತ್ರಜ್ಞಾನ ಸ್ಪರ್ಧೆಯಲ್ಲಿ ಈ ಅನ್ವೇಷಣೆಗೆ ಪ್ರಥಮ ಬಹುಮಾನ ಲಭಿಸಿದೆ. ರಾಜ್ಯದ ವಿವಿಧೆಡೆಗಳಿಂದ ಒಟ್ಟು 123 ಇಂಜಿನಿಯರಿಂಗ್‌ ಕಾಲೇಜುಗಳು ಸ್ಪರ್ಧೆಯಲ್ಲಿ ಪಾಲ್ಗೊಂಡಿದ್ದವು.
ವಿದ್ಯಾರ್ಥಿಗಳ ಸಾಧನೆ ಬಗ್ಗೆ ಪ್ರತಿಕ್ರಿಯಿಸಿರುವ ನಿಟ್ಟೆ ಮೀನಾಕ್ಷಿ ತಾಂತ್ರಿಕ ಮಹಾವಿದ್ಯಾಲಯದ ಇಂಜಿನಿಯರಿಂಗ್‌ ವಿಭಾಗದ ಡೀನ್‌ ಡಾ. ಎಚ್‌.ಸಿ. ನಾಗರಾಜ್‌, ‘‘ಭಾರತದಲ್ಲಿ ಈ ಮಾದರಿಯ ಇಂಜಿನ್‌ಗಳ ನಿರ್ಮಾಣ ತಾಂತ್ರಿಕ ಅಪಕ್ವತೆಯಿಂದಾಗಿ ಸಾಧ್ಯವಾಗಿರಲಿಲ್ಲ. ಆಮದು ಮಾಡಿಕೊಂಡ ಬಿಡಿ ಭಾಗಗಳಿಲ್ಲದೆ, ಎಲ್ಲ ಬಿಡಿ ಭಾಗಗಳನ್ನು ತಾವೇ ಸಿದ್ಧಪಡಿಸಿ, ಅತ್ಯಂತ ಅಲ್ಪಾವಧಿಯಲ್ಲಿ ಈ ಇಂಜಿನ್‌ ಅನ್ನು ತಯಾರಿಸಿದ್ದಾರೆ,’’ ಎಂದರು.