ಬೆಂಗಳೂರು: 'ನಮ್ಮ ಮೆಟ್ರೊ'ದಲ್ಲಿ ದಟ್ಟಣೆ ಅತಿಯಾಗಿ ಪ್ರಯಾಣಿಸಲು ಕಷ್ಟವಾಗುತ್ತಿರುವುದರಿಂದ ಪೀಕ್‌ ಅವಧಿಗೆ ತಕ್ಕಂತೆ 4 ನಿಮಿಷ ಹಾಗೂ 6 ನಿಮಿಷಗಳ ಅಂತರದಲ್ಲಿ ರೈಲು ಸೇವೆ ನೀಡುವ ಹೊಸ ವೇಳಾಪಟ್ಟಿಯನ್ನು ರೂಪಿಸಲಾಗಿದೆ.
ಹೊಸ ವೇಳಾಪಟ್ಟಿ ಪ್ರಕಾರ ಪೀಕ್‌ ಅವಧಿಯಲ್ಲಿ ನೇರಳೆ ಮಾರ್ಗದಲ್ಲಿ (ಮೈಸೂರು ರಸ್ತೆ-ಬೈಯ್ಯಪ್ಪನಹಳ್ಳಿ) 4 ನಿಮಿಷಕ್ಕೊಂದು ರೈಲು ಹಾಗೂ ಹಸಿರು ಮಾರ್ಗದಲ್ಲಿ (ನಾಗಸಂದ್ರ-ಯಲಚೇನಹಳ್ಳಿ) 6 ನಿಮಿಷಕ್ಕೊಂದು ರೈಲು ಲಭ್ಯವಾಗಲಿದೆ. ಬೈಯ್ಯಪ್ಪನಹಳ್ಳಿಯಲ್ಲಿ ಬೆಳಗ್ಗೆ 8.10 ರಿಂದ 9.30 ಗಂಟೆವರೆಗೆ 4 ನಿಮಿಷಕ್ಕೊಂದು ರೈಲು ಹಾಗೂ ಮೈಸೂರು ರಸ್ತೆ ನಿಲ್ದಾಣದಲ್ಲಿ ಬೆಳಗ್ಗೆ 8.50 ರಿಂದ 10.10 ಗಂಟೆವರೆಗೆ 4 ನಿಮಿಷಕ್ಕೊಂದು ರೈಲು ಸಿಗಲಿದೆ. ಹಾಗೆಯೇ ಬೈಯ್ಯಪ್ಪನಹಳ್ಳಿಯಲ್ಲಿ ಸಂಜೆ 5.18 ರಿಂದ 6.18 ಗಂಟೆವರೆಗೆ ಹಾಗೂ ಮೈಸೂರು ರಸ್ತೆಯಲ್ಲಿ ಸಂಜೆ 5.58 ರಿಂದ 6.58 ಗಂಟೆವರೆಗೆ 4 ನಿಮಿಷಕ್ಕೊಂದು ರೈಲು ಸೇವೆ ದೊರೆಯಲಿದೆ.
ನಾಗಸಂದ್ರದಲ್ಲಿ ಬೆಳಗ್ಗೆ 8 ರಿಂದ 9.24 ಗಂಟೆವರೆಗೆ ಹಾಗೂ ಸಂಜೆ 4.48 ರಿಂದ 6 ಗಂಟೆವರೆಗೆ 6 ನಿಮಿಷಕ್ಕೊಂದು ರೈಲು ಸಿಗಲಿದೆ. ಯಲಚೇನಹಳ್ಳಿಯಲ್ಲಿ ಬೆಳಗ್ಗೆ 8.53 ರಿಂದ 10.17 ಗಂಟೆವರೆಗೆ ಹಾಗೂ ಸಂಜೆ 5.37 ರಿಂದ 6.55 ರವರೆಗೆ 6 ನಿಮಿಷಕ್ಕೊಂದು ರೈಲು ಲಭ್ಯವಾಗಲಿದೆ. ಈ ಟರ್ಮಿನಲ್‌ ನಿಲ್ದಾಣಗಳಿಂದ ಹೊರಡುವ ರೈಲುಗಳು ಕೊನೆ ನಿಲ್ದಾಣ ತಲುಪುವವರೆಗೆ ಪ್ರತಿ ನಿಲ್ದಾಣದಲ್ಲಿ ಇದೇ ಸಮಯದ ಅಂತರದಲ್ಲಿ ಚಲಿಸಲಿವೆ.
More Trains in Metro