ಬೆಂಗಳೂರು: ಟೂರ್‌ ಪ್ಯಾಕೇಜ್‌ ಹೋಯ್ತು, ಕೊರೊನಾ ಪ್ಯಾಕೇಜ್‌ ಬಂತು!

ಬೆಂಗಳೂರು: ಪ್ರವಾಸದ ಪ್ಯಾಕೇಜ್‌ ರೀತಿಯಲ್ಲಿನಗರದ ಖಾಸಗಿ ಆಸ್ಪತ್ರೆಗಳು ಹೋಟೆಲ್‌ಗಳ ಸಹಯೋಗದಲ್ಲಿ'ಕೊರೊನಾ ಆರೈಕೆ ಪ್ಯಾಕೇಜ್‌'ಗಳನ್ನು ಆರಂಭಿಸಿವೆ.

ಕೇವಲ ಐದು ತಿಂಗಳ ಹಿಂದೆ ಪ್ರವಾಸಿ ಪ್ಯಾಕೇಜ್‌ ನೀಡುತ್ತಿದ್ದ ಹೋಟೆಲ್‌ಗಳಲ್ಲಿಈಗ ಕೊರೊನಾ ಪ್ಯಾಕೇಜ್‌ ಅಡಿಯಲ್ಲಿಸೋಂಕಿತರಿಗೆ ಆರೈಕೆ ಆರಂಭಿಸಲಾಗಿದೆ. ಅತಿಥಿಗಳಿಗೆ ಪ್ರೀತಿಯಿಂದ ಸೇವೆ ಒದಗಿಸುತ್ತಿದ್ದ ಹೋಟೆಲ್‌ಗಳಲ್ಲಿ, ಪ್ರೀತಿ ಜೊತೆಗೆ ಭಯದಿಂದ ಸೇವೆ ಒದಗಿಸಲಾಗುತ್ತಿದೆ. ಅತಿಥಿಗಳ ಕೊಠಡಿಗಳು ಸೋಂಕಿತರ ಚಿಕಿತ್ಸಾ ಕೇಂದ್ರಗಳಾಗಿ ಬದಲಾಗಿವೆ.

ಬೆಂಗಳೂರಿನ ಆಸ್ಟರ್‌ ಆಸ್ಪತ್ರೆಯು ಹೋಟೆಲ್‌ ಸಹಯೋಗದಲ್ಲಿಕೋವಿಡ್‌ ಕೇರ್‌ ಕೇಂದ್ರ ಆರಂಭಿಸಿದೆ. 45,500 ರೂ.ಗೆ 5 ದಿನದ ಪ್ಯಾಕೇಜ್‌ ನಿಗದಿಯಾಗಿದ್ದು, ರೂಮ್‌ ಬಾಡಿಗೆ, 3 ಹೊತ್ತು ಊಟ, ದಿನಕ್ಕೊಮ್ಮೆ ವೈದ್ಯರು ಮತ್ತು ನರ್ಸ್‌ ಭೇಟಿ ಒಳಗೊಂಡಿದೆ. 7 ದಿನದ ಪ್ಯಾಕೇಜ್‌ಗೆ 63,700 ರೂ. ಹಾಗೂ 10 ದಿನಗಳ ಪ್ಯಾಕೇಜ್‌ಗೆ 91 ಸಾವಿರ ರೂ. ಶುಲ್ಕ ನಿಗದಿಪಡಿಸಲಾಗಿದೆ.

ಇನ್ನು ಪೀಪಲ್ಸ್‌ ಟ್ರೀ ಆಸ್ಪತ್ರೆಯು 10 ದಿನಗಳ ಪ್ಯಾಕೇಜ್‌ ಆರಂಭಿಸಿದ್ದು, 80 ಸಾವಿರ ರೂ. ಶುಲ್ಕ ನಿಗದಿಪಡಿಸಿದೆ. ಪ್ಯಾಕೇಜ್‌ನಲ್ಲಿಫಾರ್ಮಸಿ, ಹೆಚ್ಚುವರಿ ಆಹಾರ, ಲ್ಯಾಬ್‌ ಚೆಕ್‌, ವಿಶೇಷ ಕನ್ಸಲ್ಟೇಷನ್‌, ಎಸಿ ರೂಮ್‌, ಪ್ರತಿದಿನ ಹೌಸ್‌ ಕೀಪಿಂಗ್‌ ಸೇರಿದಂತೆ ಇನ್ನಿತರ ಶುಲ್ಕಗಳು ಪ್ರತ್ಯೇಕ. ಅಟೆಂಡೆಂಟ್‌ಗಳಿಗೆ ಅವಕಾಶ ಇಲ್ಲ. ದಾಖಲಾಗುವ ವೇಳೆಯೇ ಶುಲ್ಕ ಪಾವತಿಸಬೇಕು. ಹಣ ಮರುಪಾವತಿಸುವುದಿಲ್ಲ. ಸೋಂಕಿತರ ಸ್ಥಿತಿಯ ಆಧಾರದ ಮೇಲೆ ಆಸ್ಪತ್ರೆಗೆ ಸಾಗಿಸಲಾಗುತ್ತದೆ. ಆ್ಯಂಬುಲೆನ್ಸ್‌ ವ್ಯವಸ್ಥೆ ಯನ್ನೂ ಕಲ್ಪಿಸಲಾಗುತ್ತದೆ ಎಂದು ತಿಳಿಸಲಾಗಿದೆ.

ಲಕ್ಷಣಗಳು ಇಲ್ಲದವರ ಸಂಖ್ಯೆ ಹೆಚ್ಚುವುದರೊಂದಿಗೆ ಸೋಂಕಿತರ ಸಂಖ್ಯೆ ಹೆಚ್ಚಳ ದಿಗಿಲು ಮೂಡಿಸುತ್ತಿದೆ. ಸಾಮೂಹಿಕ ಕೋವಿಡ್‌ ಆರೈಕೆ ಕೇಂದ್ರದಲ್ಲಿರಲು ಸಾಧ್ಯವಿಲ್ಲ. ಮನೆಯಲ್ಲಿಹಿರಿಯ ನಾಗರಿಕರು, ಅನಾರೋಗ್ಯದಿಂದ ಇರುವವರು, ಮಕ್ಕಳು, ಗರ್ಭಿಣಿಯರು ಅಥವಾ ಹೆಚ್ಚು ಜನರಿದ್ದರೆ ಸಾಮಾಜಿಕ ಅಂತರ ಕಾಪಾಡಿಕೊಳ್ಳಲಾಗದು. ಹೀಗಾಗಿ, ಐಸೋಲೇಷನ್‌ ವಾರ್ಡ್‌ ಬೇಕೆನ್ನುವವರನ್ನು ಗಮನದಲ್ಲಿಟ್ಟುಕೊಂಡು ಆಸ್ಪತ್ರೆಗಳು ಈ ವ್ಯವಸ್ಥೆ ಕಲ್ಪಿಸಿವೆ.

ಸಾಕಷ್ಟು ಹೋಟೆಲ್‌ಗಳು ಗ್ರಾಹಕರಿಲ್ಲದೇ ಬಂದ್‌ ಆಗುವ ಹಂತಕ್ಕೆ ತಲುಪಿವೆ. ಹೀಗಾಗಿ, ಆಸ್ಪತ್ರೆಗಳ ಜತೆ ಕೈಜೋಡಿಸಿ ಆಸ್ಪತ್ರೆ ಕೊಠಡಿ ಬದಲು ಕೋವಿಡ್‌ ಆರೈಕೆ ಕೇಂದ್ರಗಳಾಗಿ ಬದಲಾಗಿವೆ ಎನ್ನುತ್ತಾರೆ ಖಾಸಗಿ ಆಸ್ಪತ್ರೆಯ ಅಧಿಕಾರಿಗಳು.