ಕೋವಿಡ್‌ ಸೋಂಕಿತರಿಗೆ ಪ್ರವೇಶ ನಕಾರ; ಜಯನಗರದ ಅಪೊಲೊ, ವಿಕ್ರಮ್‌ ಆಸ್ಪತ್ರೆ ಹೊರ ರೋಗಿ ವಿಭಾಗ ಬಂದ್ ಶಿಕ್ಷೆ

ಬೆಂಗಳೂರು: ಕೊರೊನಾ ಸೋಂಕಿತರಿಗೆ ಪ್ರವೇಶ ನೀಡಿ, ಸೂಕ್ತ ಚಿಕಿತ್ಸೆ ಒದಗಿಸಬೇಕೆಂದು ಸರಕಾರ ಈಗಾಗಲೇ ಸೂಚನೆ ನೀಡಿದ್ದರೂ, ಅದನ್ನು ಉಲ್ಲಂಘಿಸಿದ ಆಸ್ಪತ್ರೆಗಳಿಗೆ 'ದಂಡ'ದ ಬಿಸಿ ತಟ್ಟಿದೆ.

ಕೋವಿಡ್‌ ಸೋಂಕಿತರಿಗೆ ಪ್ರವೇಶ ನಿರಾಕರಿಸಿದ ಜಯನಗರದ ಅಪೊಲೊ ನರ್ಸಿಂಗ್ ಹೋಮ್‌ ಮತ್ತು ವಿಕ್ರಮ್‌ ಆಸ್ಪತ್ರೆಗೆ ಶಿಕ್ಷೆ ನೀಡಿ ಸರಕಾರ ಆದೇಶ ನೀಡಿದೆ. ಸರಕಾರ ಕಳುಹಿಸಿದ ರೋಗಿಗಳಿಗೆ ಚಿಕಿತ್ಸೆ ನಿರಾಕರಿಸಿದ ವಿಕ್ರಮ್ ಆಸ್ಪತ್ರೆ ಹಾಗೂ ಜಯನಗರದ ಅಪೋಲೋ ಆಸ್ಪತ್ರೆಯ ಹೊರ ರೋಗಿಗಳ ವಿಭಾಗವನ್ನು 48 ಘಂಟೆ ಬಂದ್/ಸೀಲ್ ಡೌನ್ ಮಾಡಲಾಗಿದೆ.

ಮುಂದಿನ 48 ಗಂಟೆಗಳ ಕಾಲ ಈ ಆಸ್ಪತ್ರೆಗಳಲ್ಲಿ ಹೊರ ರೋಗಿಗಳ ಚಿಕಿತ್ಸಾ ವಿಭಾಗದಲ್ಲಿ ಸೇವೆಗೆ ನಿಷೇಧ ಹೇರಿ ಸರಕಾರ ಆದೇಶ ಹೊರಡಿಸಿದೆ.

ಕೋವಿಡ್‌ ಸೋಂಕಿತರನ್ನು ನಿರ್ಲಕ್ಷ್ಯ ಮಾಡಿ, ಪ್ರವೇಶ ನೀಡದೆ, ಚಿಕಿತ್ಸೆಯನ್ನೂ ನಿರಾಕರಿಸಿದ ಹಿನ್ನೆಲೆಯಲ್ಲಿ ಜಯನಗರದ ಅಪೊಲೊ ನರ್ಸಿಂಗ್ ಹೋಮ್‌ ಮತ್ತು ವಿಕ್ರಮ್‌ ಆಸ್ಪತ್ರೆಗೆ ಸರಕಾರ ಶೋಕಾಸ್‌ ನೋಟಿಸ್‌ ಜಾರಿ ಮಾಡಿತ್ತು.