ಏರ್‌ಪೋರ್ಟ್‌ನಲ್ಲಿ ಪಿಂಕ್‌ ಕ್ಯಾಬ್‌ ಸೇವೆ ಶುರು

ಬೆಂಗಳೂರು: ಮಹಿಳಾ ಪ್ರಯಾಣಿಕರ ಸುರಕ್ಷತೆ, ಭದ್ರತೆ ದೃಷ್ಟಿಯಿಂದ ಮಹಿಳೆಯರಿಗಾಗಿಯೇ ಪ್ರತ್ಯೇಕವಾದ, ಮಹಿಳೆಯರೇ ಚಲಾಯಿಸುವ ಗುಲಾಬಿ ಬಣ್ಣದ ವಿಶೇಷ ಕ್ಯಾಬ್‌ (ಪಿಂಕ್‌ ಕ್ಯಾಬ್‌) ಸೇವೆ ಕೆಂಪೇಗೌಡ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ ಸೋಮವಾರದಿಂದ ಆರಂಭವಾಗಿದೆ.

ಕೆಎಸ್‌ಟಿಡಿಸಿ ವ್ಯವಸ್ಥಾಪಕ ನಿರ್ದೇಶಕ ಕುಮಾರ್‌ ಪುಷ್ಕರ್‌, ಬಿಐಎಎಲ್‌ನ ವ್ಯವಸ್ಥಾಪಕ ನಿರ್ದೇಶಕ ಮತ್ತು ಮುಖ್ಯ ಕಾರ‍್ಯನಿರ್ವಾಹಕ ಅಧಿಕಾರಿ ಹರಿ ಮಾರಾರ್‌ ಅವರು ಮೊದಲ ಮಹಿಳಾ ಟ್ಯಾಕ್ಸಿಗೆ ಚಾಲನೆ ನೀಡಿದರು.

ಜಿಪಿಆರ್‌ಎಸ್‌ ಟ್ರ್ಯಾಕಿಂಗ್‌, ಎಸ್‌ಒಎಸ್‌ ಸ್ವಿಚ್‌ ಸೇರಿದಂತೆ ಹಲವು ಸುರಕ್ಷತಾ ಸಾಧನಗಳನ್ನು ಒಳಗೊಂಡಿರುವ ಕ್ಯಾಬ್‌ ಸಂಚಾರ ಸೇವೆಯನ್ನು ಕರ್ನಾಟಕ ರಾಜ್ಯ ಪ್ರವಾಸೋದ್ಯಮ ನಿಗಮ(ಕೆಎಸ್‌ಟಿಡಿಸಿ) ಮತ್ತು ಬೆಂಗಳೂರು ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣ ನಿಯಮಿತ(ಬಿಐಎಎಲ್‌) ಸಹಭಾಗಿತ್ವದಲ್ಲಿ ಆರಂಭಿಸಲಾಗಿದೆ.

ಪ್ರಾಯೋಗಿಕವಾಗಿ 10 ಕ್ಯಾಬ್‌ಗಳು ಓಡಾಟ ನಡೆಸಲಿದ್ದು, ಹಂತಹಂತವಾಗಿ ಪ್ರಯಾಣಿಕರ ಪ್ರತಿಕ್ರಿಯೆ ಆಧರಿಸಿ ಸಂಖ್ಯೆ ಹೆಚ್ಚಿಸಲು ಚಿಂತಿಸಲಾಗಿದೆ. ಒಬ್ಬರೇ ಮಹಿಳೆ ಮಾತ್ರವಲ್ಲದೆ ಗುಂಪಾಗಿ ಪ್ರಯಾಣಿಸುವ ಮಹಿಳೆಯರು ಕೂಡ ಈ ಸೌಲಭ್ಯವನ್ನು ದಿನದ 24 ಗಂಟೆಯೂ ಪಡೆದುಕೊಳ್ಳಬಹುದಾಗಿದೆ.

''ಮಹಿಳಾ ಚಾಲಕರಿಗೆ ಉದ್ಯೋಗಾವಕಾಶ ಸೃಷ್ಟಿಸುವುದರ ಜೊತೆಗೆ ಅವರು ಸ್ವಯಂ ಉದ್ಯೋಗಿಗಳಾಗಲು ಕೂಡ ಈ ಸೇವೆ ನೆರವಾಗಲಿದೆ,'' ಎಂದು ಕೆಎಸ್‌ಟಿಡಿಸಿ ವ್ಯವಸ್ಥಾಪಕ ನಿರ್ದೇಶಕ ಕುಮಾರ್‌ ಪುಷ್ಕರ್‌ ಹೇಳಿದರು.

ಬಿಐಎಎಲ್‌ ವ್ಯವಸ್ಥಾಪಕ ನಿರ್ದೇಶಕ ಮತ್ತು ಮುಖ್ಯ ಕಾರ‍್ಯನಿರ್ವಾಹಕ ಅಧಿಕಾರಿ ಹರಿ ಮಾರಾರ್‌ ಮಾತನಾಡಿ, ''ವಿಮಾನ ನಿಲ್ದಾಣದ ಸುತ್ತಲಿನ ಗ್ರಾಮಗಳ ಮಹಿಳೆಯರ ಸಾಮಾಜಿಕ-ಆರ್ಥಿಕ ಅಭಿವೃದ್ಧಿಗೆ ಕೊಡುಗೆ ನೀಡುವ ಪ್ರಯತ್ನ ಇದಾಗಿದೆ,'' ಎಂದರು.

ದರಪಟ್ಟಿ
ಪ್ರತಿ ಕಿಲೋ ಮೀಟರ್‌ಗೆ -21.50 ರೂ. (ಬೆಳಿಗ್ಗೆ 6ರಿಂದ ರಾತ್ರಿ 11.59ರವರೆಗೆ)
ಪ್ರತಿ ಕಿಲೋ ಮೀಟರ್‌ಗೆ 23.50 ರೂ. (ಮಧ್ಯರಾತ್ರಿ 12ರಿಂದ ಬೆಳಿಗ್ಗೆ 6 ಗಂಟೆಯವರೆಗೆ)
ದಿನದ 24 ಗಂಟೆ ಸೇವೆ ಲಭ್ಯ