ನಗರದಲ್ಲಿ ಇಂದು ಮಳೆ ಸಾಧ್ಯತೆ

ಬೆಂಗಳೂರು: ದಕ್ಷಿಣ ಒಳನಾಡಿನಲ್ಲಿ ಟ್ರಫ್‌ ಇರುವುದರಿಂದ ಏ.25 ಹಾಗೂ 29 ರಂದು ಚದುರಿದಂತೆ ಮಳೆಯಾಗಲಿದೆ ಎಂದು ಹವಾಮಾನ ಇಲಾಖೆ ಮುನ್ಸೂಚನೆ ನೀಡಿದೆ.

ವಾರದ ಹಿಂದಷ್ಟೆ ನಗರದಲ್ಲಿ ಭಾರಿ ಮಳೆ ಸುರಿದಿತ್ತು. ನಂತರ ಟ್ರಫ್‌ ಪರಿಣಾಮವಿದ್ದರೂ ಮಳೆ ಕಡಿಮೆಯಾಗಿದೆ. ರಾತ್ರಿ ಹೊರವಲಯಗಳಲ್ಲಿ ಕೆಲವೆಡೆ ಮಾತ್ರ ತುಂತುರು ಮಳೆಯಾಗುತ್ತಿದೆ. ಈಗ ಮತ್ತೆ ಮಳೆಯಾಗುವ ಮುನ್ಸೂಚನೆಯನ್ನು ಹವಾಮಾನ ಇಲಾಖೆ ನೀಡಿದೆ.

ಮಳೆಯ ಪರಿಣಾಮದಿಂದ ತಾಪಮಾನ 33-32 ಡಿಗ್ರಿ ಸೆಲ್ಸಿಯಸ್‌ಗೆ ಇಳಿದಿತ್ತು. ಈಗ ಮತ್ತೆ ತಾಪಮಾನ 34 ಡಿಗ್ರಿಗೆ ಬಂದಿದೆ. ನಗರದ ಕೇಂದ್ರಭಾಗದಲ್ಲಿ 34.4 ಡಿಗ್ರಿ, ಎಚ್‌ಎಎಲ್‌ನಲ್ಲಿ 33.3 ಡಿಗ್ರಿ, ಕೆಐಎಎಲ್‌ನಲ್ಲಿ 34 ಡಿಗ್ರಿ ಸೆಲ್ಸಿಯಸ್‌ ಗರಿಷ್ಠ ತಾಪಮಾನ ದಾಖಲಾಗಿದೆ. ಹಿಂದಿನ ದಿನಗಳಿಗೆ ಹೋಲಿಸಿದರೆ ರಾತ್ರಿಯ ವೇಳೆ ಸೆಕೆ ಕಡಿಮೆಯಾಗಿದೆ.

ಜೋರು ಗಾಳಿ ಬೀಸುವ ಸಾಧ್ಯತೆ : ಮಳೆ ಬರುವ ಸಮಯದಲ್ಲಿ ಗಂಟೆಗೆ 40-50 ಕಿ.ಮೀ. ವೇಗದಲ್ಲಿ ಗಾಳಿ ಬೀಸಲಿದೆ. ಹೀಗಾಗಿ ಸಾರ್ವಜನಿಕರು ಮಳೆ ಬರುವಾಗ ಮರದಡಿ ನಿಲ್ಲದಂತೆ ಹಾಗೂ ವಾಹನ ನಿಲ್ಲಿಸದಂತೆ ಎಚ್ಚರ ವಹಿಸಬೇಕು ಎಂದು ಇಲಾಖೆ ಮಾಹಿತಿ ನೀಡಿದೆ.