ಬೆಂಗಳೂರಲ್ಲಿ ದಸರಾ ಹಬ್ಬದವರೆಗೂ ಮಳೆ ಮುಂದುವರಿಕೆ

ಬೆಂಗಳೂರು: ನಗರದಲ್ಲಿ ಗುರುವಾರವೂ ಮಳೆಯಾಗಿದ್ದು, ದಸರಾ ಹಬ್ಬದವರೆಗೂ ಮಳೆ ಮುಂದುವರಿಯಲಿದೆ ಎಂದು ಹವಾಮಾನ ಇಲಾಖೆ ತಿಳಿಸಿದೆ.

ಈ ಹಿಂದೆ ಅ.22ರವರೆಗೆ ಭಾರಿ ಮಳೆಯಾಗಲಿದೆ ಎಂಬ ಮೂನ್ಸೂಚನೆ ಇತ್ತು. ಈಗ ಸೋಮವಾರದವರೆಗೂ ಭಾರಿ ಮಳೆ ಸುರಿಯಲಿದೆ ಎಂದು ತಿಳಿದುಬಂದಿದೆ. ಕೆಲವೊಮ್ಮೆ ಗುಡುಗು ಸಹಿತ ವರ್ಷಧಾರೆಯಾಗಲಿದೆ. ಬಿಬಿಎಂಪಿ ಒಳಗೊಂಡ ಬೆಂಗಳೂರು ನಗರ ಜಿಲ್ಲೆಯ ನಾನಾ ಕಡೆಗಳಲ್ಲಿ ಮಳೆಯಾಗಿದೆ.

ಗುರುವಾರ ಮಧ್ಯಾಹ್ನ ಕೆಲ ಕಾಲ ಬಿಸಿಲು ಕಂಡಿತ್ತು. ಆ ಬಳಿಕ ಅಲ್ಲಲ್ಲಿ ಮಳೆಯಾಗಲು ಪ್ರಾರಂಭವಾಯಿತು. ಸಂಜೆ ಕೆಲ ನಿಮಿಷಗಳ ಕಾಲ ಜೋರು ಮಳೆ ಸುರಿಯತು. ಮತ್ತೆ ರಾತ್ರಿ ಕೆಲವೆಡೆ ಹೆಚ್ಚು ಮಳೆಯಾಗಿದೆ. ಪಾಲಿಕೆಯ ದಕ್ಷಿಣ, ಪೂರ್ವ ಹಾಗೂ ಆರ್‌.ಆರ್‌.ನಗರ ವಲಯಗಳಲ್ಲಿ ಹೆಚ್ಚು ಮಳೆಯಾಗಿದೆ. ಸಂಜೆ ಬಿದ್ದ ಮಳೆಯಿಂದಾಗಿ ಪ್ರಮುಖ ರಸ್ತೆಗಳಲ್ಲಿ ಮಳೆ ನೀರು ನಿಂತು ವಾಹನಗಳ ಸಂಚಾರ ನಿಧಾನಗತಿಗೆ ತಿರುಗಿತು. ದ್ವಿಚಕ್ರ ಸವಾರರು ಮಳೆಯಿಂದ ಆಶ್ರಯ ಪಡೆಯಲು ಕಟ್ಟಡಗಳ ಮೊರೆ ಹೋದರು.

ಎಲ್ಲೆಲ್ಲಿ ಎಷ್ಟು ಮಳೆ:
ಗಾಳಿ ಆಂಜನೇಯ ದೇವಸ್ಥಾನ ವಾರ್ಡ್‌ನಲ್ಲಿ 33 ಮಿ.ಮೀ, ನಾಗರಬಾವಿ 31, ಮಾರುತಿ ಮಂದಿರ 31, ಜ್ಞಾನಭಾರತಿ 30, ಹಂಪಿನಗರ 27, ಕಾಡುಗೋಡಿ 24, ಚೌಡೇಶ್ವರಿ 24, ವಿದ್ಯಾಪೀಠ 23, ಸಂಪಂಗಿರಾಮನಗರ 20 ಮಿ.ಮೀ ನಷ್ಟು ಮಳೆಯಾಗಿದೆ. ಕೆಲವೆಡೆ ಮಧ್ಯರಾತ್ರಿವರೆಗೂ ಮಳೆ ಸುರಿದಿದೆ.