ಮಯನ್ಮಾರ್ ಪ್ರಜೆಯ ಪ್ರಾಣ ಉಳಿಸಿತು ಕರ್ನಾಟಕದಿಂದ ಕಳುಹಿಸಲಾದ ಅಪರೂಪದ ರಕ್ತ

ಬೆಂಗಳೂರು: ಅಪರೂಪದಲ್ಲಿ ಅಪರೂಪವೆನ್ನಲಾದ ಬಾಂಬೆ ರಕ್ತದ ಗುಂಪಿನ ಮಯನ್ಮಾರ್ ಪ್ರಜೆಯೊಬ್ಬರ ಜೀವ ಉಳಿಸಲು ಕರ್ನಾಟಕದಿಂದ ರಕ್ತ ಕಳುಹಿಸಬೇಕಾಯಿತು. ದಾವಣಗೆರೆ ಬ್ಲಡ್ ಬ್ಯಾಂಕ್‌ನಿಂದ ಕೋರಿಯರ್ ಮೂಲಕ ರಕ್ತ ಕಳುಹಿಸಿ ಹೃದಯದ ಶಸ್ತ್ರಚಿಕಿತ್ಸೆಗೊಳಗಾಗಿದ್ದ 34 ವರ್ಷದ ಮಹಿಳೆಗೆ ಪೂರೈಸಲಾಯಿತು.

ಮಯನ್ಮಾರ್‌ನ ಯಾಂಗೋನ್ ಜನರಲ್ ಆಸ್ಪತ್ರೆಯಿಂದ ಈ ರಕ್ತಕ್ಕಾಗಿ ಮನವಿ ಬಂದಿತ್ತು. ದಾನಿ, ಸ್ವೀಕರಿಸುವವ ಅಥವಾ ಅವಳ ಸಂಬಂಧಿ ಯಾರು ಕೂಡ ಇಷ್ಟು ದೂರ ಪ್ರಯಾಣಿಸುವ ಹಾಗಿರಲಿಲ್ಲ. ಹೀಗಾಗಿ ಅಗತ್ಯವಿದ್ದ 2 ಯುನಿಟ್ ರಕ್ತವನ್ನು ಕೊರಿಯರ್‌ನಲ್ಲಿ ಕಳುಹಿಸಲಾಯಿತು. 2-8 ಡಿಗ್ರಿ ಸೆಲ್ಸಿಯಸ್‌ನಲ್ಲಿ ಸಂರಕ್ಷಿಸಲಾದ ರಕ್ತ ಮೂರು ದಿನಗಳಲ್ಲಿ ಮಯನ್ಮಾರ್ ತಲುಪಿದೆ.

ಬಾಂಬೆ ಬ್ಲಡ್ ದಾನಿಗಳ ವಿಶೇಷ ನೋಂದಾವಣಿ ನಡೆಸುತ್ತಿರುವ ಬೆಂಗಳೂರು ಮೂಲದ ಸಂಕಲ್ಪ ಇಂಡಿಯಾ ಫೌಂಡೇಶನ್‌ನ್ನು ಮಯನ್ಮಾರ್ ವೈದ್ಯರು ಸಂಪರ್ಕಿಸಿದ್ದರು.
ಈ ಸಂಸ್ಥೆ ಬಾಂಬೆ ಬ್ಲಡ್ ಗುಂಪಿನ ರಕ್ತದಾನಿಗಳನ್ನು ಪತ್ತೆ ಹಚ್ಚುವ ಕೆಲಸ ಮಾಡುತ್ತದೆ.

ಮಯನ್ಮಾರ್‌ನಲ್ಲಿ ಈ ಗುಂಪಿನ ರಕ್ತದಾನಿಗಳ ಬಗ್ಗೆ ಮಾಹಿತಿ ಸಿಗಲಿಲ್ಲವಾದ್ದರಿಂದ ಭಾರತದಿಂದ ರಕ್ತಕ್ಕೆ ಬೇಡಿಕೆ ಇಟ್ಟರು ಎಂದು ಸಂಕಲ್ಪ ಇಂಡಿಯಾ ಫೌಂಡೇಶನ್‌ ಸಂಚಾಲಕ ರಜತ್ ಅಗ್ರವಾಲ್ ತಿಳಿಸಿದ್ದಾರೆ.

ಬಾಂಬೆ ರಕ್ತದ ಗುಂಪು ಎಂದರೇನು?

ಜಾಗತಿಕ ಮಾನವ ಜನಸಂಖ್ಯೆಯಲ್ಲಿ ಕೇವಲ 0.0004% ಜನರಲ್ಲಿ ಕಂಡುಬರುವ ಅಪರೂಪದ ರಕ್ತದ ಗುಂಪಿದು, ಇದು O+ve ವಿಭಾಗಕ್ಕೆ ಸೇರಿದೆ. ಭಾರತದಲ್ಲಿ, 10,000-17,000 ಜನರಲ್ಲಿ ಒಬ್ಬರು ಈ ಗುಂಪಿನ ರಕ್ತವನ್ನು ಹೊಂದಿದ್ದಾರೆ.

ಬಾಂಬೆ ರಕ್ತ ಗುಂಪನ್ನು ಎಚ್/ಎಚ್ ರಕ್ತ ಗುಂಪೆಂದು ಸಹ ಕರೆಯಲಾಗುತ್ತದೆ. ಈ ರಕ್ತದ ಗುಂಪು ಮೊದಲ ಬಾರಿಗೆ 1952ರಲ್ಲಿ ಭಾರತದ ಬಾಂಬೆ ನಗರ ಅಂದರೆ ಇಂದಿನ ಮುಂಬಯಿ ನಗರದಲ್ಲಿ ಬೆಳಕಿಗೆ ಬಂದಿತು. ಈ ರಕ್ತದ ಗುಂಪಿಗೆ ಸೇರಿದ ಯಾವುದೇ ವ್ಯಕ್ತಿ ತುರ್ತು ಪರಿಸ್ಥಿತಿಯಲ್ಲಿ ರಕ್ತದ ಅವಶ್ಯಕತೆ ಇದ್ದಾಗ ರಕ್ತ ಪಡೆಯಲು ಸಾಧ್ಯವಾಗುವುದಿಲ್ಲ ಏಕೆಂದರೆ ಈ ಗುಂಪಿನ ರಕ್ತದ ಸಂಗ್ರಹ ಕಡಿಮೆ.