ಏರೋ ಇಂಡಿಯಾದಲ್ಲಿ ರಫೇಲ್‌, ಸೂರ್ಯಕಿರಣ್‌ ತಾಲೀಮು

ಬೆಂಗಳೂರು: ಈ ಸಲದ ಏರೋ ಇಂಡಿಯಾದಲ್ಲಿ ಮಿಲಿಟರಿ ವಿಮಾನಗಳು, ಹೆಲಿಕಾಪ್ಟರ್‌ಗಳು, ಪ್ರಯಾಣಿಕ ವಿಮಾನ ಜೊತೆಗೆ ಖಾಸಗಿ ಬಳಕೆಗಾಗಿ ಐಷಾರಾಮಿ ಬಿಸಿನೆಸ್‌ ವಿಮಾನಗಳು ಕೂಡಾ ಭಾಗವಹಿಸುತ್ತಿವೆ. ಭಾರತದಲ್ಲಿ ಖಾಸಗಿ ಐಷಾರಾಮಿ ವಿಮಾನಗಳನ್ನು ನಿರ್ವಹಣೆ ಮಾಡುತ್ತಿರುವ ಸ್ಕೈ ಶಟಲ್‌ ಕಂಪನಿಯು ತನ್ನ ಐಷಾರಾಮಿ ವಿಮಾನವನ್ನು ಏರೋ ಇಂಡಿಯಾದಲ್ಲಿ ಪ್ರದರ್ಶಿಸುತ್ತಿದೆ.

ತುರ್ತು ಅಗತ್ಯ ಇದೆ ಎನ್ನುವವರು ಕರೆ ಮಾಡಿ ಇಡೀ ವಿಮಾನವನ್ನೇ ಬುಕ್‌ ಮಾಡಿಕೊಂಡು ಪ್ರಯಾಣಿಸಬಹುದು. ವಿಮಾನ ನಿಲ್ದಾಣದಲ್ಲಿ ಗಂಟೆಗಟ್ಟಲೆ ಕಾಯುವುದು ಬೇಕಾಗಿಲ್ಲ. ನಿಲ್ದಾಣ ತಲುಪಿದ ಅರ್ಧ ಗಂಟೆಯಲ್ಲೇ ಖಾಸಗಿ ಬಳಕೆಯ ವಿಮಾನಗಳು ಟೇಕಾಫ್‌ ಆಗುತ್ತವೆ.

ಅಗತ್ಯತೆಗೆ ಅನುಸಾರ 10ರಿಂದ 15 ಸೀಟ್‌ಗಳಿರುವ ಈ ಪುಟ್ಟ ವಿಮಾನಗಳಲ್ಲಿ ಪ್ರಯಾಣಿಸಲು ವ್ಯಾಪಾರಸ್ಥರು, ಉದ್ಯಮಿಗಳು, ರಾಜಕಾರಣಿಗಳು ಹಾಗೂ ಯಾರು ಬೇಕಾದರೂ ಬುಕ್ಕಿಂಗ್‌ ಮಾಡಬಹುದು. ಇಂತಹ ಐಷಾರಾಮಿ ಖಾಸಗಿ ವಿಮಾನಗಳ ವೀಕ್ಷಣೆಯ ಅವಕಾಶ ಏರೋ ಇಂಡಿಯಾದಲ್ಲಿ ಲಭಿಸಲಿದೆ. ವಿಮಾನದಲ್ಲಿ ಪ್ರಯಾಣಿಸುವ ಆಸಕ್ತಿ ಹೊಂದಿದ್ದರೆ ಒಳಾಂಗಣ ವೀಕ್ಷಣೆಯ ಅವಕಾಶವನ್ನು ಕೂಡಾ ಕಲ್ಪಿಸಲಾಗುತ್ತದೆ.

ತಾಲೀಮು ಆರಂಭ
ಯಲಹಂಕ ವಾಯುನೆಲೆಯಲ್ಲಿ ಫೆ.20ರಿಂದ ಆರಂಭವಾಗಲಿರುವ ಏರೋ ಇಂಡಿಯಾ-2019 ವೈಮಾನಿಕ ಪ್ರದರ್ಶನಕ್ಕೆ ಪೂರ್ವಸಿದ್ಧತೆ ಜೋರಾಗಿದ್ದು, ಶುಕ್ರವಾರ ಯುದ್ಧ ವಿಮಾನಗಳು ಪೂರ್ವಸಿದ್ಧತೆಯ ಹಾರಾಟ ನಡೆಸಿದವು.

ಫ್ರಾನ್ಸ್‌ನ ರಫೇಲ್‌, ಭಾರತೀಯ ವಾಯುಸೇನೆಯ ತರಬೇತಿ ವಿಮಾನ ಸೂರ್ಯಕಿರಣ್‌ ಏರೋಬ್ಯಾಟಿಕ್‌ ತಂಡ, ತೇಜಸ್‌ ಹಾಗೂ ಸುಖೋಯ್‌ ಎಸ್‌ಯು-30 ಹಾಗೂ ಹೆಲಿಕಾಪ್ಟರ್‌ಗಳು ತಾಲೀಮು ನಡೆಸಿದವು. ಬಳ್ಳಾರಿ ರಸ್ತೆಯಲ್ಲಿ ವಾಹನ ಸವಾರರು ವಾಹನಗಳನ್ನು ರಸ್ತೆ ಬದಿ ನಿಲ್ಲಿಸಿ ಉಕ್ಕಿನ ಹಕ್ಕಿಗಳ ಹಾರಾಟವನ್ನು ವೀಕ್ಷಿಸುತ್ತಿದ್ದದ್ದು ಶುಕ್ರವಾರ ಕಂಡುಬಂತು. ಇದೇ ವೇಳೆ ವಿಡಿಯೋ ಮತ್ತು ಫೋಟೋಗಳನ್ನು ಸಾರ್ವಜನಿಕರು ಜಾಲತಾಣಗಳಲ್ಲಿ ಹಂಚಿಕೊಂಡು ಖುಷಿ ಪಟ್ಟರು.

ದೇಶಿಯವಾಗಿ ನಿರ್ಮಾಣವಾಗಿರುವ ಎಲ್‌ಸಿಎ ತೇಜಸ್‌, ಲಘು ತರಬೇತಿ ವಿಮಾನ ಎಚ್‌ಟಿಟಿ-40, ದೇಶಿಯವಾಗಿ ಮೇಲ್ದರ್ಜೆಗೆ ಏರಿಸಲ್ಪಟ್ಟಿರುವ ಮೊದಲ ಹಾಕ್‌ ಎಂಕೆ132 ವಿಮಾನ (ಹಾಕ್‌-ಐ), ನಾಗರೀಕ ವಿಮಾನ ಸರಣಿಯ ಡಾರ್ನಿಯರ್‌ 228, ಸುಧಾರಿತ ಲಘು ಹೆಲಿಕಾಪ್ಟರ್‌ ರುದ್ರ, ಲಘು ಬಳಕೆ ಹೆಲಿಕಾಪ್ಟರ್‌ (ಎಲ್‌ಯುಎಚ್‌), ಲಘು ಯುದ್ಧ ಹೆಲಿಕಾಪ್ಟರ್‌ (ಎಲ್‌ಸಿಎಚ್‌) ಏರೋ ಇಂಡಿಯಾದಲ್ಲಿ ಹಾರಾಟ ನಡೆಸಲಿವೆ. ಇದೇ ವೇಳೆ ಸೂರ್ಯ ಕಿರಣ್‌ ಮತ್ತು ಎಎಲ್‌ಎಚ್‌ ಧ್ರುವ ಏರೋಬ್ಯಾಟಿಕ್‌ ತಂಡಗಳು ಎಂದಿನಂತೆ ವಿಶೇಷ ಪ್ರದರ್ಶನ ನೀಡಲಿವೆ.

ಇದೇ ವೇಳೆ ಎಲ್‌ಯುಎಚ್‌ ಪಿಟಿ-1, ಎಲ್‌ಸಿಎಚ್‌ ಟಿಡಿ-2, ಎಎಲ್‌ಎಚ್‌ (ಸುಧಾರಿತ ಲಘು ಹೆಲಿಕಾಪ್ಟರ್‌) ರುದ್ರ ಮತ್ತು ವೈದ್ಯಕೀಯ ತೀವ್ರ ನಿಗಾ ವ್ಯವಸ್ಥೆ ಇರುವ ಆ್ಯಂಬುಲೆನ್ಸ್‌ ಹೆಲಿಕ್ಯಾಪ್ಟರ್‌ ಪ್ರದರ್ಶನಕ್ಕೆ ಇರಿಸಲಾಗುತ್ತದೆ. ನೌಕಾಪಡೆ ಬಳಕೆಗಾಗಿ ಬಾಲ ಮತ್ತು ಮುಖ್ಯರೆಕ್ಕೆಗಳನ್ನು ಮಡಚಬಲ್ಲ ಹೆಲಿಕಾಪ್ಟರ್‌ (ಅಭಿವೃದ್ಧಿ ಹಂತದಲ್ಲಿದೆ) ಪ್ರಮುಖ ಆಕರ್ಷಣೆಯಾಗಲಿದೆ.