ಏರೋ ಇಂಡಿಯಾ ಶೋಗೆ ಬಾರದವರಿಗೆ ಹಣ ಮರುಪಾವತಿ

ಬೆಂಗಳೂರು: ಏರೋ ಇಂಡಿಯಾ ಶೋಗೆ ಆನ್‌ಲೈನ್‌ನಲ್ಲಿ ಟಿಕೆಟ್‌ ಖರೀದಿಸಿ ಫೆ.23 ರಂದು ಶನಿವಾರ ಶೋಗೆ ಬರಲಾಗದವರಿಗೆ ಹಣ ಮರುಪಾವತಿಸಲು ತೀರ್ಮಾನಿಸಲಾಗಿದೆ.

ಶನಿವಾರ ಅನೇಕರು ಬುಕ್‌ ಮೈ ಶೋನಲ್ಲಿ ಟಿಕೆಟ್‌ ಖರೀದಿಸಿದ್ದರು. ಅದೇ ದಿನ ಮಧ್ಯಾಹ್ನ 12.10ಕ್ಕೆ ಪಾರ್ಕಿಂಗ್‌ನಲ್ಲಿ ಕಾರುಗಳು ಹೊತ್ತಿ ಉರಿದಿತ್ತು. ಈ ಸುದ್ದಿ ಕೇಳಿದಾಗ ಹಲವರು ಆತಂಕಗೊಂಡು ಶೋಗೆ ಬರಲು ಹಿಂದೇಟು ಹಾಕಿದ್ದರು. ಅರ್ಧ ದಾರಿಯಲ್ಲಿ ಇದ್ದವರಲ್ಲಿ ಕೆಲವರು, ಪ್ರದರ್ಶನ ನಡೆಯುತ್ತಿದ್ದ ಸ್ಥಳದ ಗೇಟ್‌ ವರೆಗೆ ಹೋಗಿ ವಾಪಸ್‌ ಮನೆಗೆ ಬಂದರು. ಇದರ ಜತೆಗೆ ಮಧ್ಯಾಹ್ನ ಬರಬೇಕೆಂದು ನಿರ್ಧರಿಸಿದ್ದವರು ಭಯದಿಂದ ಮನೆಯಲ್ಲೇ ಉಳಿದಿದ್ದರು.

ಪ್ರದರ್ಶನಕ್ಕೆ ಬಾರದವರು ಏರೋ ಇಂಡಿಯಾ ಪ್ರದರ್ಶನದ ಆಯೋಜಕರನ್ನು ಸಂಪರ್ಕಿಸಿ ಹಣ ವಾಪಸ್‌ ನೀಡುವಂತೆ ಕೋರಿದ್ದಾರೆ. ಈ ಕೋರಿಕೆ ಮೇರೆಗೆ ಹಣ ಮರು ಪಾವತಿಸುವುದಾಗಿ ಆಯೋಜಕರು ತಿಳಿಸಿದ್ದಾರೆ.

ಬಳಸದ ಟಿಕೆಟ್‌ ಅನ್ನು ಕಬ್ಬನ್‌ ಪಾರ್ಕ್‌ ಮೆಟ್ರೊ ನಿಲ್ದಾಣ ಸಮೀಪದ ಎಚ್‌ಎಎಲ್‌ ಕಾರ್ಪೊರೇಟ್‌ ಕಚೇರಿಯಲ್ಲಿ ನೀಡಿದರೆ ಆನ್‌ಲೈನ್‌ನಲ್ಲೇ ಖಾತೆಗೆ ಹಣ ಮರುಪಾವತಿ ಮಾಡಲಾಗುವುದು ಎಂದು ಏರ್‌ಶೋ ಆಯೋಜಕರು ತಿಳಿಸಿದ್ದಾರೆ.