ದರೋಡೆ ಗ್ಯಾಂಗ್‌ ಬಂಧನ: 43 ಮೊಬೈಲ್‌ಗಳ ವಶ

ಬೆಂಗಳೂರು: ರಾತ್ರಿವೇಳೆ ಕೆಲಸ ಮುಗಿಸಿಕೊಂಡು ಒಂಟಿಯಾಗಿ ಮನೆಗೆ ತೆರಳುವವರ ಮೇಲೆ ಮಾರಕಾಸ್ತ್ರಗಳಿಂದ ದಾಳಿ ನಡೆಸಿ ಮೊಬೈಲ್‌ ಮತ್ತು ಹಣ ದರೋಡೆ ನಡೆಸುತ್ತಿದ್ದ ಗ್ಯಾಂಗನ್ನು ಬಂಧಿಸಿರುವ ಉತ್ತರ ಡಿಸಿಪಿ ವಿಭಾಗದ ಪೊಲೀಸರು 4.5 ಲಕ್ಷ ರೂ ಮೌಲ್ಯದ 43 ಮೊಬೈಲ್‌ಗಳನ್ನು ವಶಪಡಿಸಿಕೊಂಡಿದ್ದಾರೆ.

ಜು.11 ರಂದು ಆರ್‌ಎಂಸಿ ಯಾರ್ಡ್‌ ಠಾಣೆ ವ್ಯಾಪ್ತಿಯ ರಿಂಗ್‌ ರಸ್ತೆ ಸಮೀಪ ಇರುವ ಮಾಡರ್ನ್‌ ಬ್ರೆಡ್‌ ಫ್ಯಾಕ್ಟರಿ ಸಮೀಪ ಆರೋಪಿಗಳು ಮಾರಕಾಸ್ತ್ರಗಳನ್ನು ಹಿಡಿದು ದರೋಡೆಗೆ ಹೊಂಚು ಹಾಕುತ್ತಿದ್ದಾರೆ ಎನ್ನುವ ಸುಳಿವು ಹಿಡಿದ ಪೊಲೀಸರು ದಾಳಿ ಮಾಡಿ ಆರೋಪಿಗಳನ್ನು ಬಂಧಿಸಿದ್ದಾರೆ.

ಚಂದ್ರಾಲೇಔಟ್‌ ನಿವಾಸಿ ಸಿಕಂದರ್‌ ಪಾಷಾ, ಗೋವಿಂದರಾಜ್‌, ಸೈಯ್ಯದ್‌ ವಸೀಮ್‌ ಮತ್ತು ಜಬ್ಬಾರ್‌ ಖಾನ್‌ ಬಂಧಿತರು. ಅವರು ಐಷಾರಾಮಿ ಜೀವನ ನಿರ್ವಹಣೆಗಾಗಿ ರಾತ್ರಿ ವೇಳೆ ದರೋಡೆ ನಡೆಸುತ್ತಿದ್ದರು. ಆರೋಪಿಗಳನ್ನು ನ್ಯಾಯಾಂಗ ಬಂಧನಕ್ಕೆ ಒಪ್ಪಿಸಲಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.