ರಾಜ್ಯದಲ್ಲೂ ಹೋಟೆಲ್‌ ಸೇವಾ ಶುಲ್ಕ ರದ್ದು

ಬೆಂಗಳೂರು: ಹೋಟೆಲ್‌, ರೆಸ್ಟೊರೆಂಟ್‌ಗಳಲ್ಲಿ ಸೇವಾ ಶುಲ್ಕ ನಿರ್ಬಂಧಿಸುವ ಸಂಬಂಧ ಕೇಂದ್ರ ಸರಕಾರದ ಮಾರ್ಗಸೂಚಿ ಜಾರಿಗೆ ರಾಜ್ಯ ಸರಕಾರ ತೀರ್ಮಾನಿಸಿದೆ.

ಈ ಸಂಬಂಧ ಮೇ ಮೊದಲ ವಾರದಲ್ಲಿ ಹೋಟೆಲ್‌ ಉದ್ಯಮ ಪ್ರತಿನಿಧಿಗಳ ಸಭೆ ಕರೆಯಲಾಗಿದೆ ಎಂದು ಆಹಾರ, ನಾಗರಿಕ ಸರಬರಾಜು ಹಾಗೂ ಗ್ರಾಹಕ ವ್ಯವಹಾರಗಳ ಸಚಿವ ಯು.ಟಿ.ಖಾದರ್‌ ತಿಳಿಸಿದ್ದಾರೆ.

‘‘ಸೇವಾ ಶುಲ್ಕ ಎಂಬುದು ಗ್ರಾಹಕರು ತೃಪ್ತಿಕರ ಸೇವೆಗಾಗಿ ನೀಡುವ ಟಿಫ್ಸ್‌ ಮಾತ್ರ, ಕಡ್ಡಾಯವಲ್ಲ. ಈ ಕುರಿತಂತೆ ಕೇಂದ್ರ ಗ್ರಾಹಕ ಸಚಿವಾಲಯದಿಂದ ಮಾರ್ಗಸೂಚಿ ನಮಗೆ ತಲುಪಿದೆ. ರಾಜ್ಯದಲ್ಲಿ ಇದರ ಜಾರಿಗೆ ಮುನ್ನ ಹೋಟೆಲ್‌ ಉದ್ಯಮ ಪ್ರತಿನಿಧಿಗಳ ಅಭಿಪ್ರಾಯ ಸಂಗ್ರಹಿಸಲಾಗುವುದು,’’ ಎಂದು ಖಾದರ್‌ ತಿಳಿಸಿದರು.

‘‘ಪಾರದರ್ಶಕ ವ್ಯಾಪಾರ ಪದ್ಧತಿಯಡಿ ಸೇವಾ ಶುಲ್ಕ ಕಡ್ಡಾಯ ಮಾಡದಂತೆ ಹೋಟೆಲ್‌ ಉದ್ಯಮಕ್ಕೆ ಸಲಹೆ ಮಾಡಲಾಗುತ್ತಿದೆ. ಪ್ರಸ್ತುತ ಬಹಳಷ್ಟು ಹೋಟೆಲ್‌, ರೆಸ್ಟೋರೆಂಟ್‌ಗಳಲ್ಲಿ ಶೇ.6ರಿಂದ ಶೇ.8ರಷ್ಟು ಸೇವಾ ಶುಲ್ಕ ಪಡೆಯಲಾಗುತ್ತಿದೆ. ಈ ಸಂಬಂಧ ಹೋಟೆಲ್‌ಗಳಿಗೆ ತೆರಳಿ ಬಿಲ್‌ ಪರಿಶೀಲನೆ ಮಾಡುವಂತೆ ಕಾನೂನು ಮಾಪನ ಅಧಿಕಾರಿಗಳು ಹಾಗೂ ಆಹಾರ ನಿರೀಕ್ಷಕರಿಗೆ ಸೂಚಿಸಲಾಗುವುದು,’’ ಎಂದು ಖಾದರ್‌ ತಿಳಿಸಿದರು.

ಸೇವಾ ಶುಲ್ಕ ವಸೂಲಿ ವಿಚಾರದಲ್ಲಿ ಹೋಟೆಲ್‌, ರೆಸ್ಟೋರೆಂಟ್‌ಗಳ ವಿರುದ್ಧ ಕ್ರಮ ಜರುಗಿಸಲು ಇಲಾಖೆಗೆ ಅಧಿಕಾರವಿಲ್ಲ. ಗ್ರಾಹಕರೇ ಜಿಲ್ಲಾ ಗ್ರಾಹಕ ನ್ಯಾಯಾಲಯಗಳಿಗೆ ದೂರು ಸಲ್ಲಿಸಬಹುದು.

-ಹರ್ಷ ಗುಪ್ತ, ಆಹಾರ, ನಾಗರಿಕ ಸರಬರಾಜು ಇಲಾಖೆ ಕಾರ್ಯದರ್ಶಿ

ಕೇಂದ್ರದ ಮಾರ್ಗಸೂಚಿ ಏನು?
-ಸೇವಾ ಶುಲ್ಕ ಭರಿಸುವುದಿಲ್ಲ ಎಂಬ ಕಾರಣಕ್ಕೆ ಹೋಟೆಲ್‌ಗೆ ಪ್ರವೇಶ ನಿರಾಕರಿಸುವಂತಿಲ್ಲ.
-ಊಟೋಪಚಾರದ ಬಿಲ್‌ ಮೊತ್ತದಲ್ಲಿ ಸೇವಾ ಶುಲ್ಕ ಸೇರಿಸುವಂತಿಲ್ಲ.
-ಸೇವಾ ಶುಲ್ಕ ಕಡ್ಡಾಯವಲ್ಲ. ಅದು ತೃಪ್ತಿಕರ ಸೇವೆಗೆ ಗ್ರಾಹಕರು ನೀಡುವ ಭಕ್ಷೀಸು ಮಾತ್ರ.