ಸಿದ್ದರಾಮಯ್ಯನವರಿಗೆ ರಾಜಕೀಯ ಯಾವುದು, ಧಾರ್ಮಿಕ ಯಾವುದು ತಿಳಿದಿಲ್ಲ: ನಳಿನ್‌ ಆಕ್ರೋಶ

ಬೆಂಗಳೂರು: ಸಿದ್ದರಾಮಯ್ಯ ಅವರಿಗೆ ರಾಜಕೀಯ ಯಾವುದು, ಧಾರ್ಮಿಕ ಯಾವುದು ಎನ್ನುವುದು ತಿಳಿದಿಲ್ಲ. ಅವರ ಸರಕಾರ ಇದ್ದಾಗ ಮಠ-ಮಂದಿರಗಳಿಗೇ ದಿಗ್ಬಂಧನ ಹಾಕಲು ಹೊರಟಿದ್ದರು. ಇಂತವರಿಂದ ಪಾಠ ಹೇಳಿಸಿಕೊಳ್ಳುವ ಅವಶ್ಯಕತೆಯಿಲ್ಲ ಎಂದು ಬಿಜೆಪಿ ರಾಜ್ಯಾಧ್ಯಕ್ಷ ನಳೀನ್‌ ಕುಮಾರ್‌ ಕಟೀಲ್‌ ಗುಡುಗಿದರು.

ದಾಸರಹಳ್ಳಿಯಲ್ಲಿ ಸುದ್ದಿಗಾರರೊಂದಿಗೆ ಮಾತನಾಡಿದ ಅವರು, ‘‘ಸಿದ್ದರಾಮಯ್ಯ ಅವರಿಗೆ ಮಠ ಎಂದರೆ ಏನು, ಮಂದಿರ, ಧರ್ಮ, ಸಂಸ್ಕೃತಿ ಎಂದರೆ ಏನು ಎನ್ನುವುದು ತಿಳಿದಿಲ್ಲ. ಅವರ ಆಡಳಿತದಲ್ಲಿ ಮಠ-ಮಂದಿರಗಳಿಗೆ ಏನೆಲ್ಲಾ ಸಮಸ್ಯೆ ನೀಡಿದರು ಎನ್ನುವುದು ರಾಜ್ಯದ ಜನರಿಗೆ ಗೊತ್ತಿದೆ. ಮೋದಿ ಅವರ ಬಗ್ಗೆ ಟ್ವೀಟ್‌ ಮಾಡಲು ಅವರಿಗೆ ಯಾವ ನೈತಿಕತೆ ಇದೆ,’’ ಎಂದು ಪ್ರಶ್ನಿಸಿದರು.

‘‘ಉಗ್ರಪ್ಪ ಅವರು ಸೂಕ್ತ ಅಧ್ಯಯನ ಮಾಡಿಕೊಂಡು ಮಾತನಾಡಬೇಕು. ಅವರು ಎಲ್ಲವನ್ನು ರಾಜಕೀಯಗೊಳಿಸುತ್ತಿದ್ದಾರೆ. ಪ್ರತಿಯೊಂದನ್ನು ಅವರು ಅಧ್ಯಯನ ಮಾಡುವುದು ಸೂಕ್ತ,’’ ಎಂದರು.

ಇದೇ ಸಂದರ್ಭದಲ್ಲಿ ದಾಸರಹಳ್ಳಿ ಮಂಡಲ ಅಧ್ಯಕ್ಷ ಎನ್‌.ಲೋಕೇಶ್‌ ಅವರನ್ನು ಬಿಜೆಪಿ ರಾಜ್ಯಾಧ್ಯಕ್ಷರು ಅಭಿನಂದಿಸಿದರು. ರಾಜ್ಯ ಬಿಜೆಪಿ ಉಪಾಧ್ಯಕ್ಷ ನಿರ್ಮಲ್‌ ಕುಮಾರ್‌ ಸುರಾನಾ, ಬೆಂಗಳೂರು ನಗರ ಜಿಲ್ಲಾಧ್ಯಕ್ಷ ಎಸ್‌ ಮುನಿರಾಜು, ಬಿಜೆಪಿ ಮುಖಂಡ ಬಿಎಂ ನಾರಾಯಣ ಸೇರಿದಂತೆ ನೂರಾರು ಬಿಜೆಪಿ ಕಾರ್ಯಕರ್ತರು ಉಪಸ್ಥಿತರಿದ್ದರು.