ಲಾಲ್‌ಬಾಗ್‌ನಲ್ಲೇ ನಯಾಗರ ಫಾಲ್ಸ್‌

ಬೆಂಗಳೂರು: ಇನ್ನು ಮುಂದೆ ನೀವು ನಯಾಗರ ಫಾಲ್ಸ್‌ ಅನ್ನು ಬೆಂಗಳೂರಿನ ಲಾಲ್‌ಬಾಗ್‌ನಲ್ಲೇ ಕಣ್ತುಂಬಿಸಿಕೊಳ್ಳಬಹುದು. ಇದಕ್ಕಾಗಿ ಲಾಲ್‌ಬಾಗ್‌ನಲ್ಲಿ ನಯಾಗರ ಫಾಲ್ಸ್‌ನ ಪ್ರತಿಕೃತಿ ರೂಪು ತಾಳುತ್ತಿದ್ದು ಸಂಬಂಧಿಸಿದ ಕೆಲಸಗಳು ಬಹುತೇಕ ಪೂರ್ಣಗೊಂಡಿವೆ. ಸದ್ಯದಲ್ಲೇ ಸಾರ್ವಜನಿಕರ ದರ್ಶನಕ್ಕೆ ಇದು ತೆರೆಯಲಿದೆ.

ಪ್ರವಾಸಿಗರು ಈ ಪ್ರತಿಕೃತಿಯಲ್ಲಿ 25 ಅಡಿ ಎತ್ತರದಿಂದ ನೀರು ಧುಮುಕುವುದನ್ನು ನೋಡಿ ಆನಂದಿಸಬಹದು. ಲಾಲ್‌ಬಾಗ್‌ನ ಕೆರೆಗಳಿಂದಲೇ ಇದಕ್ಕೆ ಅಗತ್ಯ ನೀರು ಪೂರೈಕೆಯಾಗುವುದು. ತೋಟಗಾರಿಕೆ ಇಲಾಖೆ ಈ ಯೋಜನೆಗೆ ಮುಂದಾಗಿದ್ದು ಪರಿಸರ ತಜ್ಞ ಯಲ್ಲಪ್ಪ ರೆಡ್ಡಿ ಮತ್ತು ಜಲ ತಜ್ಞ ರವಿಶಂಕರ್‌, ಲಾಲ್‌ಬಾಗ್‌ ಜಂಟಿ ನಿರ್ದೇಶಕ ಡಾ. ಎಂ.ಜಗದೀಶ್‌ ಚರ್ಚಿಸಿದ ಬಳಿಕ ಯೋಜನೆ ಅನುಷ್ಠಾನಕ್ಕೆ ಬಂದಿದೆ.

ಯೋಜನೆಗೆ 2.7 ಕೋಟಿ ರೂ. ವೆಚ್ಚವಾಗಿದ್ದು, ಕಾಮಗಾರಿ ಆರಂಭಗೊಂಡು ಆರು ತಿಂಗಳಾಗಿದೆ. ಶೇ 70ರಷ್ಟು ಕೆಲಸಗಳು ಮುಗಿದಿವೆ. ಉಳಿದ ಕೆಲಸ ಎರಡು ತಿಂಗಳಲ್ಲಿ ಪೂರ್ಣಗೊಳ್ಳಲಿದೆ.