ಸನ್ನಿ ಪ್ರೋಗ್ರಾಂ ಡಲ್‌

ಬೆಂಗಳೂರು: ಬಿಗಿ ಪೊಲೀಸ್‌ ಬಂದೋಬಸ್ತ್‌ ನಡುವೆ ಬಾಲಿವುಡ್‌ ನಟಿ ಸನ್ನಿ ಲಿಯೋನ್‌ ಅವರ ಸಂಗೀತ, ನೃತ್ಯ ಕಾರ್ಯಕ್ರಮ 'ಫ್ಯೂಷನ್‌ ನೈಟ್ಸ್‌' ನಾಗವಾರ ರಿಂಗ್‌ ರಸ್ತೆಯಲ್ಲಿರುವ ಮಾನ್ಯತಾ ಟೆಕ್‌ಪಾರ್ಕ್‌ನಲ್ಲಿ ಶನಿವಾರ ರಾತ್ರಿ ನಡೆಯಿತು. ಆದರೆ ಸನ್ನಿ ನೃತ್ಯ ವೀಕ್ಷಿಸಲು ಭಾರಿ ಜನ ಸೇರುವ ನಿರೀಕ್ಷೆ ಮಾತ್ರ ಹುಸಿಯಾಯಿತು. 6000 ಟಿಕೆಟ್‌ಗಳಲ್ಲಿ ಒಂದೂವರೆ ಸಾವಿರ ಸೀಟುಗಳಷ್ಟೇ ಭರ್ತಿಯಾಗಿದ್ದವು.

ಕರವೇ ಸೇರಿ ಕೆಲ ಸಂಘಟನೆಗಳು ಪ್ರತಿಭಟನೆ ನಡೆಸುವ ಬೆದರಿಕೆ ಹಾಕಿದ್ದ ಹಿನ್ನೆಲೆಯಲ್ಲಿ ಸುಮಾರು 300 ಜನ ಪೊಲೀಸರನ್ನು ಕಾರ್ಯಕ್ರಮ ನಡೆಯುವ ಸ್ಥಳ ಹಾಗೂ ಹೊರ ಭಾಗದಲ್ಲಿ ಭದ್ರತೆಗೆ ನಿಯೋಜಿಸಲಾಗಿತ್ತು. ಆದರೆ, ಕೊನೆ ಕ್ಷಣದಲ್ಲಿ ಪ್ರತಿಭಟನೆಯ ನಿರ್ಧಾರದಿಂದ ಕರವೇ ಕಾರ್ಯಕರ್ತರು ಹಿಂದೆ ಸರಿದರು.

ಕಾರ್ಯಕ್ರಮಕ್ಕೆ ಸುಮಾರು 6 ಸಾವಿರ ಜನ ಆಗಮಿಸಬಹುದು ಎಂಬ ನಿರೀಕ್ಷೆಯನ್ನು ಆಯೋಜಕರು ಹೊಂದಿದ್ದರು. ಪ್ರತಿಭಟನೆ ಬೆದರಿಕೆಯ ಕಾರಣಕ್ಕೆ ಸಾಕಷ್ಟು ಜನ ಕಾರ್ಯಕ್ರಮಕ್ಕೆ ಬರುವುದರಿಂದ ಹಿಂದೆ ಸರಿದಿರಬೇಕು ಎಂದು ಹೇಳಲಾಗಿದೆ.

ಸಂಜೆ 6 ಗಂಟೆಗೆ ಕಾರ್ಯಕ್ರಮ ಆರಂಭವಾಗಿದ್ದು, ರಾತ್ರಿ 8.15ಕ್ಕೆ ವೇದಿಕೆ ಪ್ರವೇಶಿಸಿದ ಸನ್ನಿ ಲಿಯೋನ್‌ ಹಿಂದಿ, ಇಂಗ್ಲಿಷ್‌ ಜೊತೆಗೆ ಕನ್ನಡ ಹಾಡುಗಳಿಗೂ ನೃತ್ಯ ಹಾಕಿ ನೆರೆದಿದ್ದವರಿಗೆ ಮನರಂಜನೆ ನೀಡಿದರು. ಈ ವೇಳೆ ಹೆಚ್ಚಿನ ಸಂಖ್ಯೆಯಲ್ಲಿ ಸೇರಿದ್ದ ಯುವಕರು, ಸನ್ನಿ ನೃತ್ಯಕ್ಕೆ ಹುಚ್ಚೆದ್ದು ಕುಣಿದರು. ರಾತ್ರಿ 10 ಗಂಟೆವರೆಗೆ ಕಾರ್ಯಕ್ರಮ ನಡೆಯಿತು.

''ಸಂಗೀತ ಕಾರ್ಯಕ್ರಮದಲ್ಲಿ ಪ್ರತಿಭಟನೆ ನಡೆಸುವ ನಿರ್ಧಾರದಿಂದ ಹಿಂದೆ ಸರಿದಿದ್ದೇವೆ. ಆದರೆ, ಐತಿಹಾಸಿಕ ಸಿನಿಮಾ 'ವೀರ ಮಹಾದೇವಿ'ಯಲ್ಲಿ ಪ್ರಮುಖ ಪಾತ್ರದಲ್ಲಿ ಸನ್ನಿ ನಟಿಸುವುದಕ್ಕೆ ನಮ್ಮ ವಿರೋಧವಿದೆ. ಅದಕ್ಕಾಗಿ ನಮ್ಮ ಹೋರಾಟ ಮುಂದುವರಿಯುತ್ತದೆ''ಎಂದು ಕರವೇ ಯುವ ಸೇನೆ ಕಾರ್ಯಕರ್ತರು ಹೇಳಿದ್ದಾರೆ. ಪ್ರತಿಭಟನೆ ನಡೆಸಲೆಂದೇ ಕರವೇ ಕಾರ್ಯಕರ್ತರು 230ಕ್ಕೂ ಹೆಚ್ಚಿನ ಟಿಕೆಟ್‌ ಖರೀದಿಸಿದ್ದರು ಎಂದು ಹೇಳಲಾಗಿತ್ತು.

ಬಾಟಲಿ ಎಸೆತ

ಕಾರ್ಯಕ್ರಮದ ಸ್ಥಳದ ಬಳಿ ಬಂದಿದ್ದ ಕೆಲ ಕಿಡಿಗೇಡಿಗಳು ನೀರಿನ ಖಾಲಿ ಬಾಟಲಿಯನ್ನು ಎಸೆದಿದ್ದಾರೆ. ಈ ಹಿನ್ನೆಲೆಯಲ್ಲಿ ಕಾರ್ಯಕ್ರಮ ನಿರೂಪಕರು ''ಯಾವುದೇ ಅಹಿತಕರ ಘಟನೆಯಲ್ಲಿ ತೊಡಗಿಸಿಕೊಳ್ಳಬೇಡಿ. ಎಲ್ಲ ಕಡೆ ಕ್ಯಾಮರಾ ನಿಗಾ ಇದೆ'' ಎಂದು ಎಚ್ಚರಿಕೆ ನೀಡಿದರು.