ಬೆಂಗಳೂರಿನಲ್ಲಿ ಹೆಚ್ಚಿದ ಬಿಸಿಲಿನ ಝಳ, ತಂಪು ಪದಾರ್ಥ ಸೇವಿಸಲು ಆತಂಕ

ಬೆಂಗಳೂರು: ನಗರದಲ್ಲಿ ಬಿಸಿಲಿನ ಝಳ ಜೋರಾಗಿದ್ದು, ರಾತ್ರಿಯಲ್ಲೂ ಬೆವರು ಸುರಿಯುವ ಕಿರಿಕಿರಿ ಇದೆ. ಆದರೆ ಕೊರೊನಾ ಸೋಂಕಿನ ಭೀತಿಯು ಐಸ್‌ಕ್ರೀಮ್‌, ತಂಪು ಪಾನೀಯ ಸೇವಿಸುವುದಕ್ಕೂ ಕಡಿವಾಣ ಹಾಕಿದೆ.

ನಗರದ ಕೇಂದ್ರಭಾಗಗಳಲ್ಲಿ ಕೆಲ ದಿನಗಳ ಹಿಂದೆ 32 ರಿಂದ 33 ಡಿಗ್ರಿ ಸೆಲ್ಸಿಯಸ್‌ ತಾಪಮಾನವಿತ್ತು. ಭಾನುವಾರ 34.5 ಡಿಗ್ರಿ ಸೆ. ತಾಪಮಾನ ದಾಖಲಾಗಿದೆ. ರಾತ್ರಿಯೂ ಫ್ಯಾನ್‌ ಬಳಸದೆ ನಿದ್ದೆ ಮಾಡುವಂತಿಲ್ಲ. ಇಂತಹ ಸೆಕೆಯ ಕಿರಿಕಿರಿ ಇದ್ದರೂ ಜನರು ತಂಪು ಪದಾರ್ಥಗಳತ್ತ ನೋಡುವಂತಿಲ್ಲ.

ಕೊರೊನಾ ಸೋಂಕು ಹಿನ್ನೆಲೆಯಲ್ಲಿಆರೋಗ್ಯ ಇಲಾಖೆಯು ಮುನ್ನೆಚ್ಚರಿಕೆ ಕ್ರಮಗಳನ್ನು ನೀಡಿದೆ. ನೆಗಡಿ ಬರುವ ಸಾಧ್ಯತೆ ಇರುವುದರಿಂದ ಸದ್ಯಕ್ಕೆ ತಂಪು ಪಾನೀಯ ಕುಡಿಯುವುದು, ಐಸ್‌ಕ್ರೀಮ್‌ ತಿನ್ನುವುದು ಬೇಡ ಎಂದು ವೈದ್ಯರು ಸಲಹೆ ನೀಡಿದ್ದಾರೆ. ಹೀಗಾಗಿ, ಜನರು ತಂಪು ಪದಾರ್ಥಗಳಿಂದ ದೂರ ಕಾಯ್ದುಕೊಳ್ಳುತ್ತಿದ್ದಾರೆ.

ಎಚ್‌ಎಎಲ್‌ನಲ್ಲಿ 33.8 ಡಿಗ್ರಿ ಸೆ. ಹಾಗೂ ಕೆಐಎಎಲ್‌ನಲ್ಲಿ 33.8 ಡಿಗ್ರಿ ಸೆ. ತಾಪಮಾನ ದಾಖಲಾಗಿದೆ. ತಾಪಮಾನ ಇನ್ನೂ ಏರಿಕೆಯಾಗುವ ಸಾಧ್ಯತೆ ಇದೆ.