ನಾಯಿ ಸಾಕಲು ಬಂತು ಮಿತಿ !

ಬೆಂಗಳೂರು: ಬಿಬಿಎಂಪಿ ವ್ಯಾಪ್ತಿಯಲ್ಲಿ ನಾಯಿಗಳ ಸಾಕಣೆಗೆ ಪರವಾನಗಿ ಪಡೆಯುವುದನ್ನು ಕಡ್ಡಾಯಗೊಳಿಸಿ ನಗರಾಭಿವೃದ್ಧಿ ಇಲಾಖೆಯು ಸೋಮವಾರ ಅಧಿಕೃತ ಆದೇಶ ಹೊರಡಿಸಿದೆ. ಶ್ವಾನಪ್ರಿಯರು 110 ರೂ. ಶುಲ್ಕ ಪಾವತಿಸಿ, ಪಾಲಿಕೆಯ ಪಶು ವೈದ್ಯರಿಂದ ಪರವಾನಗಿ ಪಡೆಯಬೇಕು.

ಪರವಾನಗಿ ನಿಯಮಗಳನ್ನು ಉಲ್ಲಂಘಿಸಿದರೆ, ಒಂದು ಸಾವಿರ ರೂ. ದಂಡ ತೆರಬೇಕಾಗುತ್ತದೆ. ಮಾಲೀಕರು ತಮ್ಮ ನಾಯಿಗಳಿಗೆ ಸ್ವಂತ ಖರ್ಚಿನಲ್ಲಿ ಮೈಕ್ರೋ ಚಿಪ್‌ ಅನ್ನು ಅಳವಡಿಸಿಕೊಳ್ಳಬೇಕು. ಪ್ರತಿ ವರ್ಷವೂ ಅಧಿಕೃತ ಶುಲ್ಕ ಪಾವತಿಸಿ ಪರವಾನಗಿಯನ್ನು ನವೀಕರಿಸಿಕೊಳ್ಳಬೇಕು. ಬಹುಮಹಡಿ ಅಂತಸ್ತುಗಳಲ್ಲಿ ಒಂದು ನಾಯಿ ಮಾತ್ರ ಸಾಕಲು ಅವಕಾಶ ಕಲ್ಪಿಸಲಾಗಿದೆ. ಸ್ವಂತ ಮನೆ ಹೊಂದಿರುವವರು ಮೂರು ನಾಯಿಗಳಿಗಿಂತ ಹೆಚ್ಚು ಸಾಕಣೆ ಮಾಡುವಂತಿಲ್ಲ.

ಅಕ್ಕಪಕ್ಕದ ನಿವಾಸಿಗಳಿಗೆ ನಾಯಿಗಳಿಂದ ತೊಂದರೆ ಆಗದಂತೆ ಎಚ್ಚರ ವಹಿಸಬೇಕು. ಸಾರ್ವಜನಿಕ ಸ್ಥಳಗಳಲ್ಲಿ ಮಲ, ಮೂತ್ರ ಮಾಡಿಸುವಂತಿಲ್ಲ. ಒಂದೊಮ್ಮೆ ಮಾಡಿಸಿದರೆ, ಮಾಲೀಕರೇ ಸ್ವಚ್ಛಗೊಳಿಸಬೇಕು. ಇಲ್ಲವಾದಲ್ಲಿ ಮೊದಲ ತಪ್ಪಿಗೆ 100 ರೂ. ಮತ್ತು ಎರಡನೇ ತಪ್ಪಿಗೆ 200 ರೂ. ದಂಡ ತೆರಬೇಕಾಗುತ್ತದೆ. ಸಾಕು ನಾಯಿಯು ಬೀದಿಯಲ್ಲಿ ಬೇಕಾಬಿಟ್ಟಿ ಓಡಾಡುತ್ತಿದ್ದಲ್ಲಿ ವಶಕ್ಕೆ ಪಡೆದು 72 ಗಂಟೆಗಳವರೆಗೆ ಪಾಲಿಕೆಯೇ ಇರಿಸಿಕೊಳ್ಳುತ್ತದೆ. ಸಂಬಂಧಪಟ್ಟ ಶ್ವಾನ ಮಾಲೀಕರು 450 ರೂ. ದಂಡ ಪಾವತಿಸಿ ಬಿಡಿಸಿಕೊಂಡು ಹೋಗಬಹುದು. ಕೆಲವೊಂದು ಅಪಾಯಕಾರಿ ನಾಯಿಗಳನ್ನು ಸಾರ್ವಜನಿಕ ಸ್ಥಳಗಳಿಗೆ ಕರೆದೊಯ್ಯುವಾಗ ಅವುಗಳ ಬಾಯಿಗೆ ಇತರರಿಗೆ ಕಚ್ಚಲಾಗದಂತೆ ಸಾಧನವನ್ನು ಅಳವಡಿಸಬೇಕು ಎಂದು ಪರವಾನಗಿ ನಿಯಮದಲ್ಲಿ ತಿಳಿಸಲಾಗಿದೆ.

72 ತಾಸಿನೊಳಗೆ ನಾಯಿಗಳ ಪೂರ್ವಪರ ಮಾಹಿತಿ ನೀಡಿ, ಬಿಡಿಸಿಕೊಂಡು ಹೋಗದಿದ್ದರೆ, ಅಂಥಹ ಶ್ವಾನಗಳನ್ನು ಹರಾಜು ಹಾಕಲಾಗುವುದು. ಹುಚ್ಚು ನಾಯಿ ಆಗದಿದ್ದಲ್ಲಿ ಸಾರ್ವಜನಿಕರಿಗೆ ದತ್ತು ನೀಡಲಾಗುವುದು. ಮಾಲೀಕರು ತಮ್ಮ ಶ್ವಾನಗಳಿಗೆ ಕಡ್ಡಾಯವಾಗಿ ಸಂತಾನಹರಣ ಶಸ್ತ್ರಚಿಕಿತ್ಸೆ ಮಾಡಿಸಬೇಕು.

ಸಾಕು ಪ್ರಾಣಿಗಳಾದ ಹಸು, ದನ, ನಾಯಿ, ಕುರಿ, ಮೇಕೆ ಇಟ್ಟುಕೊಂಡಿರುವವರು ಕೂಡಪಾಲಿಕೆಗೆ ಮಾಹಿತಿ ನೀಡಬೇಕು. ಪಾಲಿಕೆ ವೈದ್ಯರು ಅಂಥಹ ಪ್ರಾಣಿಗಳ ಆರೋಗ್ಯ ಪರಿಶೀಲಿಸಿ, ಸಾಂಕ್ರಾಮಿಕ ರೋಗಗಳಿಗೆ ಚಿಕಿತ್ಸೆ ನೀಡಲಿದ್ದಾರೆ.