ವಾಜಪೇಯಿ ಅವರಂಥ ಅತ್ಯುತ್ತಮ ಪ್ರಧಾನಿ ಮತ್ತೊಬ್ಬರಿಲ್ಲ : ಸಂತೋಷ್‌ ಹೆಗ್ಡೆ

ಬೆಂಗಳೂರು: ಅಟಲ್‌ ಬಿಹಾರಿ ವಾಜಪೇಯಿ ಅವರಂತಹ ಅತ್ಯುತ್ತಮ ಪ್ರಧಾನಿ ಮತ್ತೊಬ್ಬರಿಲ್ಲ ಎಂದು ನಿವೃತ್ತ ಲೋಕಾಯುಕ್ತ ನ್ಯಾಯಮೂರ್ತಿ ಸಂತೋಷ್‌ ಹೆಗ್ಡೆ ಹೇಳಿದರು.

ಸುವರ್ಣ ಚತುಷ್ಪತ ರಾಷ್ಟ್ರೀಯ ಹೆದ್ದಾರಿ ನಿರ್ಮಾಣ ಮಾಡಿ ಚಾಲಕರ ಬದುಕಿನಲ್ಲಿ ಹೊಸ ಆಶಾಕಿರಣ ಮೂಡಿಸಿದ ವಾಜಪೇಯಿ ಅವರ ನೆನಪಿಗಾಗಿ ರಾಷ್ಟ್ರೀಯ ಚಾಲಕರ ಒಕ್ಕೂಟ ಆಯೋಜಿಸಿದ್ದ ' ಅಟಲ್‌ಜಿಗೆ ನುಡಿ ನಮನ ' ಕಾರ್ಯಕ್ರಮದಲ್ಲಿ ಮಾತನಾಡಿದ ಅವರು, ವಾಜಪೇಯಿ ಉತ್ತಮ ಪ್ರಧಾನಿ. ಅವರ ಸರಳತೆ, ಸಾರ್ವಜನಿಕ ಬದುಕಿನಲ್ಲಿ ಅವರು ಅನುಸರಿಸಿದ ಮೌಲ್ಯಗಳು, ಅವರ ಹೋರಾಟದ ಬದುಕು ಅನನ್ಯ ಎಂದರು.

ಮಾಜಿ ಸಭಾಪತಿ ಡಿ.ಎಚ್‌. ಶಂಕರಮೂರ್ತಿ ಮಾತನಾಡಿ, ಬಾಂಗ್ಲಾ ದೇಶದ ವಿಮೋಚನೆಗೆ ಕರೆ ನೀಡಿದ ಮಹಾನ್‌ ನಾಯಕ. ಹೋರಾಟವೇ ಅವರ ಬದುಕಾಗಿತ್ತು. ಅತ್ಯಂತ ಸರಳ ಮತ್ತು ಪ್ರಾಂಜಲ ಮನಸ್ಸಿನ ವ್ಯಕ್ತಿತ್ವವನ್ನು ವಾಜಪೇಯಿ ಹೊಂದಿದ್ದರು ಎಂದು ಸ್ಮರಿಸಿದರು. ಮಾಜಿ ಸಚಿವ ರಾಮಚಂದ್ರಗೌಡ, ರಾಷ್ಟ್ರೀಯ ಚಾಲಕರ ಒಕ್ಕೂಟದ ಅಧ್ಯಕ್ಷ ಗಂಡಸಿ ಸದಾನಂದ, ಪ್ರೊ.ಕೆ.ಈ.ರಾಧಾಕೃಷ್ಣ ಮೊದಲಾದವರು ಹಾಜರಿದ್ದರು.