ಬಿಇಎಂಎಲ್‌ನಿಂದ ಬೋಗಿಗಳ ಹಸ್ತಾಂತರ

ಬೆಂಗಳೂರು: ಭಾರತ್‌ ಅರ್ಥ್‌ ಮೂವರ್ಸ್‌ ಲಿಮಿಟೆಡ್‌ನಿಂದ ಆರು ಬೋಗಿಗಳನ್ನು ಕೋಲ್ಕೋತಾ ಮೆಟ್ರೊ ನಿಗಮಕ್ಕೆ (ಕೆಎಂಆರ್‌ಸಿಎಲ್‌) ಹಸ್ತಾಂತರಿಸಲಾಯಿತು.

ನಿಗಮವು 900 ಕೋಟಿ ರೂ. ವೆಚ್ಚದಲ್ಲಿ 84 ಬೋಗಿಗಳನ್ನು ತಯಾರಿಸುವ ಹೊಣೆಯನ್ನು ಬಿಇಎಂಎಲ್‌ಗೆ ವಹಿಸಿದೆ. ಶನಿವಾರ ನಡೆದ ಕಾರ್ಯಕ್ರಮದಲ್ಲಿ 84 ಬೋಗಿಗಳ ಪೈಕಿ ಮೊದಲ ಆರು ಬೋಗಿಗಳನ್ನು ಬಿಇಎಂಎಲ್‌ ಮುಖ್ಯ ವ್ಯವಸ್ಥಾಪಕ ನಿರ್ದೇಶಕ ಡಿ.ಕೆ.ಹೋಟ ನಿಗಮದ ನಿರ್ದೇಶಕ ಎ.ಕೆ.ಕುಂದು ಅವರಿಗೆ ಹಸ್ತಾಂತರಿಸಿದರು. ಈ ಆರು ಬೋಗಿಗಳನ್ನು ಜೋಡಿಸಿ ಒಂದು ರೈಲನ್ನು ತಯಾರಿಸಲಾಗುತ್ತದೆ. ಇದರಲ್ಲಿ 2,068 ಮಂದಿ ಪ್ರಯಾಣಿಸಬಹುದು. ಈ ರೈಲು ಗಂಟೆಗೆ ಗರಿಷ್ಠ 80 ಕಿ.ಮೀ. ವೇಗದಲ್ಲಿ ಚಲಿಸುವ ಸಾಮರ್ಥ್ಯ‌ ಹೊಂದಿದೆ.

ಕಾರ್ಯಕ್ರಮದಲ್ಲಿ ಮಾತನಾಡಿದ ಡಿ.ಕೆ.ಹೋಟ, ''ದೇಶದ ಮೆಟ್ರೊ ಸಾರಿಗೆಗೆ ಬಿಇಎಂಎಲ್‌ನಿಂದ ಗುಣಮಟ್ಟದ ಬೋಗಿಗಳನ್ನು ನೀಡಲಾಗುತ್ತಿದೆ. ನಗರಗಳ ಸಂಚಾರ ದಟ್ಟಣೆ ಸಮಸ್ಯೆ ನಿವಾರಿಸುವಲ್ಲಿ ಸಂಸ್ಥೆಯು ಮುಖ್ಯ ಪಾತ್ರ ವಹಿಸುತ್ತಿದೆ. ಹೊಸದಿಲ್ಲಿ, ಬೆಂಗಳೂರು ಹಾಗೂ ಜೈಪುರ ಮೆಟ್ರೊ ನಿಗಮಗಳಿಗೆ ಇದುವರೆಗೆ 1,300 ಬೋಗಿಗಳನ್ನು ಪೂರೈಸಲಾಗಿದೆ. ಭವಿಷ್ಯದಲ್ಲಿ ಹೈ ಸ್ಪೀಡ್‌ ರೈಲು ತಯಾರಿಕಾ ಕ್ಷೇತ್ರಕ್ಕೆ ಕಾಲಿಡಲು ಯೋಜನೆ ರೂಪಿಸಲಾಗುತ್ತಿದೆ,'' ಎಂದು ತಿಳಿಸಿದರು.