ಜೇಬುಕಳ್ಳರೆಂದು ಭಾವಿಸಿ ಯುವಕರನ್ನು ಥಳಿಸಿದ ಪ್ರಯಾಣಿಕರು

ಬೆಂಗಳೂರು: ಜೇಬು ಕಳ್ಳರೆಂದು ಭಾವಿಸಿ ಯುವಕರಿಬ್ಬರನ್ನು ರೈಲು ಪ್ರಯಾಣಿಕರು ಥಳಿಸಿ ಪೊಲೀಸರಿಗೆ ಒಪ್ಪಿಸಿರುವ ಘಟನೆ ಕೆಂಗೇರಿ ರೈಲು ನಿಲ್ದಾಣದಲ್ಲಿ ಭಾನುವಾರ ರಾತ್ರಿ ನಡೆದಿದೆ.

ಬ್ಯಾಗ್‌ಗಳಿಗೆ ಜಿಪ್‌ ಹಾಕುವ ಕೆಲಸ ಮಾಡುವ ಯುವಕರಿಬ್ಬರು ಭಾನುವಾರ ರಾತ್ರಿ 8 ಗಂಟೆ ಸುಮಾರಿಗೆ ಬಿಡದಿಯಿಂದ ಬೆಂಗಳೂರಿಗೆ ರೈಲಿನಲ್ಲಿ ಪ್ರಯಾಣಿಸುತ್ತಿದ್ದರು. ಕೆಂಗೇರಿ ಬಳಿ ಪ್ರಯಾಣಿಕರೊಬ್ಬರು ಜೇಬಿನಿಂದ ಕೈವಸ್ತ್ರ ತೆಗೆದಿದ್ದು, ಈ ವೇಳೆ ಕೈವಸ್ತ್ರದ ಜತೆಗೆ ಜೇಬಿನಲ್ಲಿಟ್ಟುಕೊಂಡಿದ್ದ ಅವರ ಪರ್ಸ್‌ ಕೆಳಗೆ ಬಿದ್ದಿದೆ. ಪರ್ಸ್‌ ಬಿದ್ದ ಸ್ಥಳದಲ್ಲೇ ಆ ಇಬ್ಬರು ಯುವಕರು ನಿಂತುಕೊಂಡಿದ್ದರು. ಪರ್ಸ್‌ ಕೆಳಗೆ ಬಿದ್ದಾಗ ಯವಕರೇ, ಜೇಬು ಕಳ್ಳರು ಎಂದು ಭಾವಿಸಿದ ಪ್ರಯಾಣಿಕರು ಅವರನ್ನು ಹಿಡಿದು ಥಳಿಸಿ ಕೆಂಗೇರಿ ರೈಲು ನಿಲ್ದಾಣದಲ್ಲಿ ಪೊಲೀಸರ ವಶಕ್ಕೆ ಒಪ್ಪಿಸಿದ್ದಾರೆ.

''ಯುವಕರು ಹಾಗೂ ಅವರ ಕುಟುಂಬ ಹಿನ್ನೆಲೆ ಪರಿಶೀಲನೆ ನಡೆಸಲಾಗಿದೆ. ಅವರು ಈ ಹಿಂದೆ ಯಾವುದೇ ಅಪರಾಧ ಕೃತ್ಯದಲ್ಲಿ ಭಾಗಿಯಾಗಿಲ್ಲ ಎಂಬುದು ಪ್ರಾಥಮಿಕ ಮಾಹಿತಿ ವೇಳೆ ಕಂಡು ಬಂದಿದೆ. ಪ್ರಯಾಣಿಕರು ತಪ್ಪು ತಿಳಿದು ಯುವಕರ ಮೇಲೆ ಹಲ್ಲೆ ನಡೆಸಿರುವುದು ಮೇಲ್ನೊಟಕ್ಕೆ ಕಂಡು ಬಂದಿದೆ. ಅವರಿಂದ ಮಾಹಿತಿ ಪಡೆದುಕೊಂಡು ಕಳುಹಿಸಿಕೊಡಲಾಗಿದೆ,'' ಎಂದು ನಗರ ರೈಲ್ವೆ ಪೊಲೀಸರು ತಿಳಿಸಿದ್ದಾರೆ.