ಟ್ರಿನಿಟಿ ಪಿಲ್ಲರ್‌ ನಿರ್ವಹಣೆಗೆ ಐಐಎಸ್ಸಿ ನಿಗಾ

ಬೆಂಗಳೂರು: ಟ್ರಿನಿಟಿ ವೃತ್ತದ ಮೆಟ್ರೊ ಸ್ಟೇಷನ್‌ ಬಳಿಯ ಪಿಲ್ಲರ್‌ನಲ್ಲಿ ತಾಂತ್ರಿಕ ದೋಷ ಎದುರಾಗಿರುವ ಪ್ರಕರಣದಲ್ಲಿ ಐಐಎಸ್ಸಿ ತಜ್ಞರು ಒಂದು ತಿಂಗಳ ಕಾಲ ನಿಗಾ ಇಡಲಿದ್ದಾರೆ.

ಇತ್ತೀಚೆಗೆ ಇಲ್ಲಿನ ಪಿಲ್ಲರ್‌ನ ವಯಾಡಕ್ಟ್ನಲ್ಲಿ ತಾಂತ್ರಿಕ ತೊಂದರೆ ಕಾಣಿಸಿಕೊಂಡು ರೈಲು ಸಂಚಾರವನ್ನು ಸ್ಥಗಿತಗೊಳಿಸಲಾಗಿದೆ. ದಿಲ್ಲಿಯಿಂದ ತಜ್ಞರು ಆಗಮಿಸಿ ಪರಿಶೀಲನೆ ನಡೆಸಿದ ಬೆನ್ನಲ್ಲೇ ಭವಿಷ್ಯದಲ್ಲಿ ಇಂಥ ಸಮಸ್ಯೆ ಮತ್ತೆ ಉದ್ಭವಿಸದಂತೆ ಎಚ್ಚರ ವಹಿಸಲು ಐಐಎಸ್ಸಿ ತಜ್ಞರು ಶಾಶ್ವತ ಪರಿಹಾರ ಸೂಚಿಸಲಿದ್ದಾರೆ.

ಇದಕ್ಕಾಗಿ ಸಂಸ್ಥೆಯ ಸಿವಿಲ್‌ ಎಂಜಿನಿಯರಿಂಗ್‌ ವಿಭಾಗದ ಪ್ರೊ.ಜೆ.ಎಂ.ಚಂದ್ರಕಿಶನ್‌ ಅವರು ಬಿಎಂಆರ್‌ಸಿಎಲ್‌ಗೆ ತಾಂತ್ರಿಕ ಪರಿಹಾರಗಳನ್ನು ಸೂಚಿಸಲಿದ್ದಾರೆ. ಇದಕ್ಕಾಗಿ ಅವರು ತಿಂಗಳ ಕಾಲ ನಿಗಾ ಇಡಲಿದ್ದು, ಯಾವ ತೊಂದರೆಯೂ ಮರುಕಳಿಸದಂತೆ ಕೆಲ ಮುನ್ನೆಚ್ಚರಿಕೆ ಅಂಶಗಳನ್ನು ವರದಿ ರೂಪದಲ್ಲಿ ಬಿಎಂಆರ್‌ಸಿಎಲ್‌ಗೆ ಹಸ್ತಾಂತರಿಸಲಿದ್ದಾರೆ.

ಟ್ರಿನಿಟಿ ವೃತ್ತದ ಬಳಿಯ ಪಿಲ್ಲರ್‌ನಲ್ಲಿ ಕಂಡು ಬಂದ ಸಮಸ್ಯೆಯ ಆಳವನ್ನು ತಿಳಿಯಲು 32 ಸೆನ್ಸಾರ್‌ ಉಪಕರಣಗಳನ್ನು ಬಳಸಲಾಗುತ್ತದೆ. ಇವು ತಿಂಗಳ ಕಾಲ ಕಾರ್ಯಾಚರಣೆ ನಡೆಸಲಿದ್ದು, ಪಿಲ್ಲರ್‌ಗಳ ಆಕಾರ ಹಾಗೂ ರೈಲು ಓಡಾಟದ ವೇಳೆ ಕಂಡುಬರುವ ತಾಂತ್ರಿಕ ಅಂಶಗಳನ್ನು ಪತ್ತೆ ಹಚ್ಚಲಾಗುತ್ತದೆ. ಇದು ಮುಖ್ಯವಾಗಿ ಪಿಲ್ಲರ್‌ಗಳ ಮೇಲೆ ಭಾರ ಬೀಳುವಿಕೆ, ಮಾರ್ಗದ ಮೇಲಿನ ಒತ್ತಡದ ಮಾಹಿತಿಯನ್ನು ನಿಖರವಾಗಿ ತಿಳಿಯಬಹುದು ಎಂಬುದು ಬಿಎಂಆರ್‌ಸಿಎಲ್‌ ನಂಬಿಕೆಯಾಗಿದೆ.