ಬನ್ನೇರುಘಟ್ಟ ರಸ್ತೆ ವಿಸ್ತರಣೆಗೆ ಪುರಾತನ ಕಲ್ಯಾಣಿ ಮುಚ್ಚಿದ ಬಿಬಿಎಂಪಿ: ಕಲ್ಯಾಣಿ ಉಳಿಸಲು ಟ್ವಿಟರ್ ಅಭಿಯಾನ

ಬನ್ನೇರುಘಟ್ಟ: ಬೆಂಗಳೂರಿನ ಬನ್ನೇರುಘಟ್ಟ ರಸ್ತೆ ವಿಸ್ತರಣೆಗಾಗಿ ಪುರಾತನ ಕಾಲದ ಕಲ್ಯಾಣಿ ಮುಚ್ಚಿರುವ ಕ್ರಮ ಖಂಡಿಸಿ ಹಾಗೂ ಕಲ್ಯಾಣಿಯನ್ನು ಉಳಿಸುವ ನಿಟ್ಟಿನಲ್ಲಿ
ಟ್ವಿಟರ್‌ನಲ್ಲಿ ಅಭಿಯಾನ ಆರಂಭವಾಗಿದೆ.

ಗೊಟ್ಟಿಗೆರೆಯ ಗಾಳಿ ಆಂಜನೇಯ ಸ್ವಾಮಿ ದೇವಸ್ಥಾನದ ಬಳಿ ಇದ್ದ ಕಲ್ಯಾಣಿ ರಸ್ತೆ ವಿಸ್ತರಣೆಗೆ ಬಲಿಯಾಗಿದೆ. ‘ಸೇವ್‌ ಕಲ್ಯಾಣಿ’ ಎಂಬ ಟ್ವಿಟ್ಟರ್‌ ಅಕೌಂಟ್‌ನಲ್ಲಿ ಈ ಬಗ್ಗೆ ಪೋಸ್ಟ್‌ ಹಾಕಿದ್ದು, ಹಲವರು ಈ ಅಭಿಯಾನವನ್ನು ಬೆಂಬಲಿಸಿದ್ದಾರೆ. ಹಲವು ವರ್ಷಗಳಿಂದ ಪಾಳು ಬಿದ್ದಿದ್ದ ಕಲ್ಯಾಣಿಯನ್ನು ಯುವ ಬ್ರಿಗೇಡ್‌ ತಂಡದವರು ಪುನಶ್ಚೇತನಗೊಳಿಸಿದ್ದರು.


ಬಳಿಕ ಕಲ್ಯಾಣಿಯಲ್ಲಿ ಸಾಕಷ್ಟು ನೀರು ಕೂಡ ಸಂಗ್ರಹವಾಗಿತ್ತು. ಸ್ಥಳೀಯರ ಅಭಿಪ್ರಾಯವನ್ನು ಆಲಿಸದೆ ಬಿಬಿಎಂಪಿ ಕಲ್ಯಾಣಿ ಮುಚ್ಚಿ ರಸ್ತೆ ನಿರ್ಮಿಸಿರುವುದು ವ್ಯಾಪಕ ಆಕ್ರೋಶಕ್ಕೆ ಕಾರಣವಾಗಿದೆ.

‘‘ಗಾಳಿ ಅಂಜನೇಯ ದೇವಸ್ಥಾನಕ್ಕೆ ಕಲ್ಯಾಣಿಯ ನೀರನ್ನು ಬಳಸುತ್ತಿದ್ದರು. ರಸ್ತೆ ವಿಸ್ತರಣೆಗೆ ಪರ್ಯಾಯ ವ್ಯವಸ್ಥೆ ಮಾಡಿಕೊಂಡು ಕಲ್ಯಾಣಿಯನ್ನು ಉಳಿಸಿ ಕೊಡಬೇಕು ಮತ್ತು ಬಿಬಿಎಂಪಿಯೇ ಇದನ್ನು ಅಭಿವೃದ್ಧಿಪಡಿಸಬೇಕು,’’ ಎಂದು ಗೊಟ್ಟಿಗೆರೆ ನಿವಾಸಿ ಮಂಜೇಶ್‌ ಆಗ್ರಹಿಸಿದರು.

‘‘ಈ ಬಗ್ಗೆ ಆಯುಕ್ತರಿಂದ ಕಲ್ಯಾಣಿಯನ್ನು ಪುನರ್‌ ನಿರ್ಮಾಸಿ ಕೊಡುವ ಭರವಸೆ ಸಿಕ್ಕಿದೆ,’’ ಎಂದು ಬೆಂಗಳೂರು ದಕ್ಷಿಣ ಶಾಸಕ ಕೃಷ್ಣಪ್ಪ ತಿಳಿಸಿದ್ದಾರೆ.