ಇಸ್ಪೀಟ್‌ನಲ್ಲಿ ಮೋಸಕ್ಕೆ ತಂತ್ರಜ್ಞಾನ ಬಳಕೆ: ಒಬ್ಬ ಆರೋಪಿ ಬಂಧನ

ಬೆಂಗಳೂರು: ಹಿಡನ್‌ ಕ್ಯಾಮೆರಾ, ಸ್ಕ್ಯಾ‌ನಿಂಗ್‌ನಂತಹ ತಂತ್ರಜ್ಞಾನ ಬಳಸಿ ಇಸ್ಪೀಟ್‌ ಆಟದಲ್ಲಿ ಮೋಸ ಮಾಡುತ್ತಿದ್ದ ಜಾಲವನ್ನು ಪತ್ತೆ ಮಾಡಿರುವ ಸಿಸಿಬಿ ಪೊಲೀಸರು, ಒಬ್ಬ ಆರೋಪಿಯನ್ನು ಬಂಧಿಸಿದ್ದಾರೆ.

ಯಶವಂತಪುರದ ಬಿ.ಕೆ. ನಗರ ನಿವಾಸಿ ಇಮ್ರಾನ್‌(29) ಬಂಧಿತ ಆರೋಪಿ. ಈತನಿಂದ ಇಸ್ಪೀಟ್‌ ಎಲೆಗಳನ್ನು ಸ್ಕ್ಯಾ‌ನ್‌ ಮಾಡುವ ಮೊಬೈಲ್‌ ಫೋನ್‌ ಮಾದರಿಯ ಉಪಕರಣ, ಮೈಕ್ರೊ ಕ್ಯಾಮೆರಾ, ಸ್ಕ್ಯಾ‌ನರ್‌, ಹಿಡನ್‌ ಕ್ಯಾಮೆರಾ, ಮೊಬೈಲ್‌ ಫೋನ್‌ಗಳು, ನಗದು ಸೇರಿದಂತೆ ಸುಮಾರು 4 ಲಕ್ಷ ರೂ. ಮೌಲ್ಯದ ವಸ್ತುಗಳನ್ನು ಸಿಸಿಬಿ ಅಧಿಕಾರಿಗಳು ವಶಪಡಿಸಿಕೊಂಡಿದ್ದಾರೆ.

''ಅಂದರ್‌-ಬಾಹರ್‌ ಆಡುವ ವೇಳೆ ಎಲೆಗಳು ಹಾಕುವ ಜಾಗದ ಪಕ್ಕದಲ್ಲೇ ಹಣದ ಬಂಡಲ್‌ಗಳ ನಡುವೆ, ಮೊಬೈಲ್‌, ಕೀ ಚೈನ್‌ ರೂಪದಲ್ಲಿ ಸ್ಕ್ಯಾ‌ನರ್‌ ಸಾಧನವನ್ನು ಗೊತ್ತಾಗದಂತೆ ಇರಿಸಲಾಗಿರುತ್ತದೆ. ಇಸ್ಪೀಟ್‌ ಎಲೆಗಳ ಮಾಹಿತಿ ಈ ಸಾಧನ ಬಳಸುವವರಿಗೆ ಗೊತ್ತಾಗುತ್ತದೆ. ಈ ಮಾಹಿತಿ ಆಧರಿಸಿ ಹೆಚ್ಚಿನ ಹಣ ಪಣಕ್ಕಿಟ್ಟು ಮೋಸದಿಂದ ಗೆಲುವು ಸಾಧಿಸಲು ಸಾಧ್ಯವಾಗುತ್ತದೆ,'' ಎಂದು ಸಿಸಿಬಿ ಜಂಟಿ ಆಯುಕ್ತ ಸಂದೀಪ್‌ ಪಾಟೀಲ್‌ ತಿಳಿಸಿದರು.