ಸೆಂಚುರಿ ದಾಟಿದ ಬಜ್ಜಿ ಮೆಣಸು: ಕೊತ್ತಂಬರಿ ಸೊಪ್ಪು, ಕ್ಯಾಪ್ಸಿಕಂ ಬೆಲೆಯಲ್ಲೂ ಏರಿಕೆ; ಟೊಮೆಟೊ ದರದಲ್ಲಿಇಳಿಕೆ

ಬೆಂಗಳೂರು: ಬಜ್ಜಿ ಮೆಣಸಿನಕಾಯಿ ದರ ಸೆಂಚುರಿ ಬಾರಿಸಿದೆ. ಕ್ಯಾಪ್ಸಿಕಂ 85 ರೂ. ಗೆ ಏರಿದರೆ, ಕೊತ್ತಂಬರಿ ಸೊಪ್ಪಿನ ದರದಲ್ಲೂ ಏರಿಕೆ ಕಂಡುಬಂದಿದೆ.

ಕಳೆದ ಮೂರು ತಿಂಗಳ ಹಿಂದೆ ಕೊತ್ತಂಬರಿ ಸೊಪ್ಪಿನ ಬೆಳೆಯಿರಲಿಲ್ಲ, ಬೇಡಿಕೆ ಹೆಚ್ಚಾಗಿತ್ತು. ಹೀಗಾಗಿ ಸೊಪ್ಪಿನ ದರ ಗಗನಕ್ಕೇರಿತ್ತು. ಕೆ.ಜಿ.ಗೆ 150-180 ರೂ. ವರೆಗೆ ತಲುಪಿತ್ತು. ಸುಮಾರು ಎರಡು ತಿಂಗಳಿಗೂ ಹೆಚ್ಚು ಕಾಲ ಬೆಲೆ ಇಳಿಯಲೇ ಇಲ್ಲ. ನಂತರ ಸ್ವಲ್ಪ ಇಳಿಯಿತು. ಕಂತೆಗೆ 20 ರೂ. ಇತ್ತು. ಇದೀಗ ಕಂತೆಗೆ 30 ರೂ. ಹಾಗೂ 45 ರೂ. ಇದ್ದ ಕೆ.ಜಿ. ಸೊಪ್ಪು 87 ರೂ.ಗೆ ತಲುಪಿದೆ. ಅದೇ ರೀತಿ ಇತರೆ ಸೊಪ್ಪುಗಳ ದರವೂ ಏರಿಕೆಯಾಗಿದೆ.

ಬಜ್ಜಿ ಮೆಣಸಿನಕಾಯಿ ಮತ್ತು ಕ್ಯಾಪ್ಸಿಕಂ ಬೆಳೆ ಮಳೆಗೆ ಹಾನಿಯಾಗಿದೆ. ಚಿಕ್ಕಬಳ್ಳಾಪುರ, ಕೋಲಾರ, ಆನೇಕಲ್‌, ತುಮಕೂರು ಮತ್ತಿತರ ಭಾಗಗಳಿಂದ ಬರುತ್ತಿದ್ದ ಮೆಣಸಿನಕಾಯಿ ಪ್ರಮಾಣವೂ ಈಗ ಕಡಿಮೆಯಾಗಿದೆ.

ಜತೆಗೆ ಚಳಿಯ ವಾತಾವರಣವಿರುವುದರಿಂದ ಬಜ್ಜಿ, ಬೋಂಡಕ್ಕೆ ಸಹಜವಾಗಿಯೇ ಬೇಡಿಕೆಯಿದೆ. ಈ ಕಾರಣದಿಂದಾಗಿ ಬಜ್ಜಿ ಮೆಣಸಿನಕಾಯಿ, ಕ್ಯಾಪ್ಸಿಕಂ ದರ ಹೆಚ್ಚಾಗಿದೆ ಎನ್ನುತ್ತಾರೆ ಹಾಪ್‌ಕಾಮ್ಸ್ ಸಿಬ್ಬಂದಿ. ಉಳಿದಂತೆ ಬೀನ್ಸ್‌, ಟೊಮೇಟೊ, ಮೂಲಂಗಿ ದರ ಸಾಧಾರಣವಾಗಿದೆ.