ದಾಖಲೆ ಏರಿಕೆ ಕಂಡಿದ್ದ ನುಗ್ಗೆ, ಈರುಳ್ಳಿ ದರ ಕುಸಿತ; ಗ್ರಾಹಕರು ನಿರಾಳ

ಬೆಂಗಳೂರು: ದಾಖಲೆ ಪ್ರಮಾಣದಲ್ಲಿ ಏರಿಕೆಯಾಗಿ, ಗ್ರಾಹಕರಲ್ಲಿ ತಲ್ಲಣ ಮೂಡಿಸಿದ್ದ ಈರುಳ್ಳಿ, ನುಗ್ಗೆಕಾಯಿಗಳ ದರದಲ್ಲಿಇದೀಗ ಭಾರೀ ಇಳಿಕೆಯಾಗಿದೆ.

ಬೇಸಿಗೆ ಆರಂಭದ ದಿನಗಳಲ್ಲೇ ಹಣ್ಣು, ತರಕಾರಿ ದರದಲ್ಲಿ ಇಳಿಕೆಯಾಗಿದ್ದು, ಗ್ರಾಹಕರಲ್ಲಿ ಕೊಂಚ ನಿರಾಳತೆ ಮೂಡಿಸಿದೆ. ಕಳೆದ ಎರಡು ತಿಂಗಳ ಹಿಂದೆ ಗಗನಕ್ಕೇರಿದ್ದ ತರಕಾರಿಗಳ ದರದಲ್ಲಿ ಇದೀಗ ಗಣನೀಯ ಪ್ರಮಾಣದಲ್ಲಿ ಇಳಿಕೆಯಾಗಿದೆ.

ಸಾಮಾನ್ಯವಾಗಿ ಬೇಸಿಗೆ ಬಂತೆಂದರೆ ವಾತಾವರಣದಲ್ಲಿ ಉಷ್ಣತೆ ಹೆಚ್ಚಾಗುತ್ತದೆ. ಜತೆಗೆ ಎಲ್ಲೆಡೆ ಅಂತರ್ಜಲ ಮಟ್ಟ ಕುಸಿದು ನೀರಿಗೆ ಹಾಹಾಕಾರ ಉಂಟಾಗುತ್ತದೆ. ಹೀಗಾಗಿ ಬೆಳೆಗಳಿಗೆ ಅಗತ್ಯ ಪ್ರಮಾಣದಲ್ಲಿ ನೀರು ಪೂರೈಕೆಯಾಗದೆ ತರಕಾರಿ ಉತ್ಪಾದನೆ ಕುಂಠಿತಗೊಳ್ಳುವುದು ಸಹಜ. ಆದರೆ ಈ ಬಾರಿ ಬೇಸಿಗೆ ಆರಂಭದಲ್ಲೇ ತರಕಾರಿ ದರದಲ್ಲಿ ಇಳಿಕೆಯಾಗಿದ್ದು, ಒಳ್ಳೆಯ ಲಕ್ಷಣಗಳು ಕಾಣುತ್ತಿವೆ. ಮಾರ್ಚ್‌ ನಂತರ ಬಿಸಿಲು ಹೆಚ್ಚಾದರೆ ಬೆಲೆಗಳಲ್ಲಿ ಕೊಂಚ ಏರಿಕೆಯಾಗಬಹುದು ಎಂಬ ಸೂಚನೆಯೂ ವ್ಯಾಪಾರಿಗಳಿಂದ ವ್ಯಕ್ತವಾಗಿದೆ.

ಕಿತ್ತಳೆ ಸೇರಿದಂತೆ ಹಲವು ಹಣ್ಣುಗಳು, ಈರುಳ್ಳಿ, ಬೀನ್ಸ್‌ ಸೇರಿದಂತೆ ಬಹುತೇಕ ತರಕಾರಿಗಳು, ದಂಟು, ಪಾಲಕ್‌ ಸೇರಿದಂತೆ ಹಲವು ಸೊಪ್ಪುಗಳ ದರದಲ್ಲಿ ಇಳಿಕೆಯಾಗಿದೆ. ಕೆ.ಜಿ.ಗೆ 150-180 ರೂ. ತಲುಪಿದ್ದ ಈರುಳ್ಳಿ ದರ ಇದೀಗ 25-40 ರೂ.ಗೆ ಇಳಿದಿದೆ.ಬೀನ್ಸ್‌ ದರ ಕೂಡ ಕೆ.ಜಿ.ಗೆ 60-70 ರೂ. ಇದ್ದುದು ಇದೀಗ ಕೇವಲ 32ರೂ.ಗೆ ತಗ್ಗಿದೆ. ಟೊಮೇಟೊ ಕೂಡ ಕೆ.ಜಿ.ಗೆ 15-20 ರೂ. ಇದೆ. ಕಿತ್ತಳೆಹಣ್ಣು ಸೀಸನ್‌ ಆಗಮಿಸಿದ್ದು, ಎಲ್ಲೆಡೆ ಕೆ.ಜಿ.ಗೆ 40 ರಿಂದ 50 ರೂ. ನಂತೆ ಮಾರಾಟವಾಗುತ್ತಿದೆ. ಇತ್ತ ಮದುವೆ ಸೀಸನ್‌ಗಳು ಹೆಚ್ಚಾಗಿರುವ ಹಿನ್ನೆಲೆಯಲ್ಲಿಏಲಕ್ಕಿ ಬಾಳೆಗೆ ಬೇಡಿಕೆ ಬಂದಿದ್ದು, 45ರ ಆಸುಪಾಸಿನಲ್ಲಿದ್ದ ಬಾಳೆಹಣ್ಣು, ಇದೀಗ ಕೆ.ಜಿ.ಗೆ 55 ರೂ. ತಲುಪಿದೆ. ಪಚ್ಚಬಾಳೆ ಕೆ.ಜಿ.ಗೆ 28 ರೂ.ಇದೆ.

ಬೇಸಿಗೆಯಲ್ಲಿ ಟೊಮೇಟೊ ಇಳಿಕೆ

ಮಳೆಗೆ ಬೆಳೆ ಸಿಗದಿರಲಿ ಎಂದು ಹೆಚ್ಚಿನ ರೈತರು ಒಟ್ಟೊಟ್ಟಿಗೆ ಬೇಸಿಗೆ ಕಾಲದಲ್ಲಿ ಕೊಯ್ಲಿಗೆ ಬರುವಂತೆ ಟೊಮೇಟೊ ಬೆಳೆಯುತ್ತಾರೆ. ಹೀಗಾಗಿ ಪ್ರತಿ ಬೇಸಿಗೆಯಲ್ಲೂ ದರ ಕುಗ್ಗುತ್ತಿದ್ದು, ಅದರಂತೆ ಈ ಬಾರಿಯೂ 25-30 ರೂ. ಇದ್ದ ಟೊಮೇಟೊ ದರ ಈಗಾಗಲೇ 15-20 ರೂ.ಗೆ ಇಳಿಕೆಯಾಗಿದೆ. ಮತ್ತಷ್ಟು ಇಳಿಯುವ ಸಾಧ್ಯತೆಯಿದೆ.

ದಾಖಲೆ ಸೃಷ್ಟಿಸಿ ಇಳಿದ ನುಗ್ಗೆಕಾಯಿ

ಸೆಪ್ಟೆಂಬರ್‌-ಅಕ್ಟೋಬರ್‌ ತಿಂಗಳಲ್ಲಿ ಕೆ.ಜಿ.ಗೆ 400-500 ರೂ. ದರದೊಂದಿಗೆ ದಾಖಲೆ ಸೃಷ್ಟಿಸಿದ್ದ ನುಗ್ಗೆಕಾಯಿ ದರ ಕೂಡ ಇದೀಗ ಇಳಿಕೆಯಾಗಿದೆ. ಕೆ.ಜಿ.ಗೆ 160 ರೂ. ಇದೆ. ಆಗ ಒಂದು ಕಾಯಿಗೆ 30-40 ರೂ. ಇತ್ತು. ಇದೀಗ 10 ರೂ.ಗೆ ಇಳಿದಿದೆ.