​ಶೇಷಾದ್ರಿ ರಸ್ತೆ ಅಂಡರ್‌ಪಾಸ್‌ ಭೀತಿಯ ಗುಹೆ

ಬೆಂಗಳೂರು: ನಗರದ ಶೇಷಾದ್ರಿ ರಸ್ತೆಯಲ್ಲಿರುವ ಅಂಡರ್‌ಪಾಸ್‌ ಸಮಾಜಬಾಹಿರ ಕೃತ್ಯ ನಡೆಸುವವರಿಗೆ ತಾಣವಾಗಿ ರೂಪುಗೊಂಡಿದ್ದು, ಮಹಿಳೆಯರು ಅಲ್ಲಿ ಸಂಚರಿಸಲು ಭಯಪಡುತ್ತಿದ್ದಾರೆ.

ಹೀಗಾಗಿ ಸೇಂಟ್‌ ಜೋಸೆಫ್‌ ಪಾಲಿಟೆಕ್ನಿಕ್‌ ಕಾಲೇಜಿಗೆ ಹೋಗುವ ಮಹಿಳೆಯರು ಈ ಅಂಡರ್‌ಪಾಸ್‌ ಸೌಲಭ್ಯವನ್ನು ಬಳಸುವ ಗೋಜಿಗೆ ಹೋಗದೆ ಅಪಾಯವಿದ್ದರೂ ರಸ್ತೆ ದಾಟಿ ಹೋಗುತ್ತಾರೆ. ಅಂಡರ್‌ಪಾಸ್‌ ಹೊಲಸಿನಿಂದ ತುಂಬಿದ್ದು, ರಾತ್ರಿ ಮದ್ಯವ್ಯಸನಿಗಳು ಮತ್ತು ಕಳ್ಳರ ಬಿಡಾರವಾಗಿರುತ್ತದೆ. ಅಷ್ಟೇ ಅಲ್ಲದೆ ಅಲ್ಲಿ ಮೂತ್ರ ವಿಸರ್ಜನೆಯಿಂದಾಗಿ ಕೆಟ್ಟ ವಾಸನೆ ಬರುತ್ತಿರುವುದರಿಂದ ಜನರು ಅತ್ತ ತಲೆ ಹಾಕುತ್ತಿಲ್ಲ. ಕೆಲವು ಪುರುಷರಷ್ಟೇ ಓಡಾಡಲು ಈ ಅಂಡರ್‌ಪಾಸ್‌ ಬಳಸುತ್ತಾರೆ.ಆರು ತಿಂಗಳವರೆಗೆ ಇದರ ನಿರ್ವಹಣೆ ಚೆನ್ನಾಗಿಯೇ ಇತ್ತು.

ಕಾವಲು ಸಿಬ್ಬಂದಿ ಮತ್ತು ಸ್ವಯಂಸೇವಕರು ಇಲ್ಲಿ ಸ್ವಚ್ಛತೆ ಕಾಯ್ದುಕೊಂಡಿದ್ದರು. ನೃಪತುಂಗ ರಸ್ತೆ ಅಭಿವೃದ್ಧಿ ಕಾಮಗಾರಿ ಆರಂಭಗೊಂಡ ಬಳಿಕ ಇಲ್ಲಿ ಸ್ವಚ್ಛತೆ ಕಡೆಗಣಿಸಲಾಗಿದೆ. ಈ ಅಂಡರ್‌ಪಾಸ್‌ ಮೂಲಕ ಹೋಗಲು ಭಯಪಟ್ಟು ರಸ್ತೆ ದಾಟುವ ಪ್ರಯತ್ನ ನಡೆಸಿದ್ದರಿಂದ ಕೆಲವು ತಿಂಗಳ ಹಿಂದೆ ವಿದ್ಯಾರ್ಥಿನಿಯೊಬ್ಬರು ಮೃತಪಟ್ಟಿದ್ದರು. ದಟ್ಟಣೆ ಹೆಚ್ಚು ಇರುವ ಬೆಳಗಿನ ವೇಳೆ ರಸ್ತೆ ದಾಟುವುದು ಬಹಳ ಅಪಾಯಕಾರಿಯಾಗಿರುತ್ತದೆ ಎಂದು ಸೇಂಟ್‌ ಜೋಸೆಫ್‌ ಕಾಲೇಜಿನ ಉಪನ್ಯಾಸಕರೊಬ್ಬರು ಹೇಳುತ್ತಾರೆ.

ಕೆಲವು ದಿನಗಳ ಈ ಅಂಡರ್‌ ಪಾಸ್‌ ಮೂಲಕ ಹೋಗಬೇಕಾದರೆ ಕಳ್ಳರು ಬೆದರಿಸಿ ಪರ್ಸ್‌ ಮತ್ತು ಮೊಬೈಲ್‌ ಕೇಳಿದ್ದರು. ಇದು ಗುಹೆಯಂತಿದ್ದು ಯಾವುದೇ ಲಾಕ್‌ ಸಿಸ್ಟಂ ಇಲ್ಲ, ಇದಕ್ಕೆ ಸೂಕ್ತ ನಿರ್ವಹಣೆ ಮತ್ತು ಸಿಸಿಟಿವಿ ಕ್ಯಾಮೆರಾ ಅಳವಡಿಕೆ ಅಗತ್ಯ ಎಂದು ಎಂಜಿನಿಯರಿಂಗ್‌ ವಿದ್ಯಾರ್ಥಿ ಅನಿಲ್‌ ಹೇಳಿದ್ದಾರೆ.