ದೂರು ಪುನರ್‌ ಪರಿಶೀಲನೆ: ತಹಸೀಲ್ದಾರ್‌ಗೆ ಮನವಿ

ದೊಡ್ಡಬಳ್ಳಾಪುರ: ದತ್ತ ಜಯಂತಿಗೆ ಅಡ್ಡಿಪಡಿಸುವ ಹಾಗೂ ಕೋಮು ಗಲಭೆಗೆ ಪ್ರಚೋದನೆ ನೀಡುವ ದುರುದ್ದೇಶದಿಂದ ರಾಜ್ಯ ಬಜರಂಗದಳ ಸಂಯೋಜಕರ ಮೇಲೆ ಚಿಕ್ಕಮಗಳೂರು ಪೊಲೀಸ್‌ ಠಾಣೆಯಲ್ಲಿ ಕೋಮು ಸೌಹಾರ್ದ ವೇದಿಕೆ ದೂರು ದಾಖಲು ಮಾಡಿರುವುದನ್ನು ಪುನರ್‌ ಪರಿಶೀಲನೆ ಮಾಡುವಂತೆ ಒತ್ತಾಯಿಸಿ ತಾಲೂಕು ಬಜರಂಗದಳ ವೇದಿಕೆ ತಹಸೀಲ್ದಾರ್‌ ಬಿ.ಎ.ಮೋಹನ್‌ ಅವರಿಗೆ ಮನವಿ ನೀಡಲಾಯಿತು.

ಈ ಸಂದರ್ಭದಲ್ಲಿ ಮನವಿ ಕುರಿತು ಮಾತನಾಡಿದ ಬಜರಂಗದಳ ಬೆಂಗ್ರಾ ಜಿಲ್ಲಾ ಸಂಚಾಲಕ ನರೇಶ್‌ರೆಡ್ಡಿ, ಅಲ್ಲಿನ ಬಜರಂಗ ದಳ ಪ್ರಾಂತ ಸಂಯೋಜಕರಾದ ಕೆ.ಆರ್‌.ಸುನಿಲ್‌, ರಘು ಸಕಲೇಶಪುರ ವಿರುದ್ಧ ದಂತಮಾಲಾ ಅಭಿಯಾನ, ಅನುಸೂಯ ಜಂತಿ, ದತ್ತ ಜಯಂತಿ, ಬೃಹತ್‌ ಶೋಭಾ ಯಾತ್ರೆ ಆಯೋಜನೆ ಆಗಿರುವ ಸಂದರ್ಭದಲ್ಲೆ ದೂರು ದಾಖಲು ಮಾಡಿರುವುದು ಸಾಕಷ್ಟು ಅನುಮಾನಗಳನ್ನು ಹುಟ್ಟಿಹಾಕಿದೆ. ಈ ಮೂಲಕ ಕೋಮುಗಲಭೆಗೆ ಪ್ರಚೋಧನೆ ನೀಡುವ ದುರುದ್ದೇಶದಿಂದ ದೂರು ದಾಖಲು ಮಾಡಿರುವ ಅವರು ಈ ನೆಲದ ಧಾರ್ಮಿಕ ಆಚರಣೆಗಳನ್ನು ಹತ್ತಿಕ್ಕುವಲ್ಲಿ ವ್ಯವಸ್ಥಿತವಾಗಿ ಪಿತೂರಿ ಮಾಡುತ್ತಿದ್ದಾರೆ. ಹೀಗಾಗಿ ದೂರನ್ನು ಪುನರ್‌ ಪರಿಶೀಲನೆ ನಡೆಸಬೇಕೆಂದು ರಾಜ್ಯದ ಡೈರೆಕ್ಟರ್‌ ಜನರಲ್‌ ಆಫ್‌ ಪೊಲೀಸ್‌ ಮನವಿ ಮಾಡಿದರು.

ಈ ಸಂದರ್ಭದಲ್ಲಿ ಬಜರಂಗದಳದ ತಾಲೂಕು ಸಮಿತಿಯ ಪದಾಧಿಕಾರಿಗಳಾದ ಮಧು ಬೇಗ್ಲಿ, ಭಾಸ್ಕರ್‌, ಅರ್ಜುನ್‌ ವಿರಾಟ್‌, ಶಿವು ದೋಂತಿ, ಬಿಜೆಪಿ ಮಹಿಳಾ ಮೋರ್ಚ ನಗರಾಧ್ಯಕ್ಷೆ ಗಿರಿಜಾ ಮತ್ತು ತಾಲೂಕು ಸಮಿತಿ ಮುಖಂಡರು ಸೇರಿದಂತೆ ಕಾರ್ಯಕರ್ತರು ಉಪಸ್ಥಿತರಿದ್ದರು.