ಸ್ವಕ್ಷೇತ್ರದಲ್ಲಿ ಡಿಕೆಶಿ ಅದ್ದೂರಿ ಸ್ವಾಗತ, ಕಬ್ಬಾಳಮ್ಮ, ಕಂಕೇರಮ ದೇಗುಲಕ್ಕೆ ಭೇಟಿ, ತಂದೆ ಸಮಾಧಿಗೆ ಪೂಜೆ

ರಾಮನಗರ: ಕನಕಪುರದ ಬಂಡೆ ಮಾಜಿ ಸಚಿವ ಡಿ.ಕೆ.ಶಿವಕುಮಾರ್ ಸ್ವ ಕ್ಷೇತ್ರ ಕನಕಪುರಕ್ಕೆ ಆಗಮಿಸುತ್ತಿದ್ದಂತೆ ಅವರ ಅಭಿಮಾನಿಗಳು ಅದ್ದೂರಿ ಸ್ವಾಗತ ಕೋರಿದರು.

ಸಾವಿರಾರು ಸಂಖ್ಯೆಯಲ್ಲಿ ಡಿಕೆಶಿ ಬೆಂಬಲಿಗರು ಹೂವಿನ ಸುರಿಮಳೆಯನ್ನೆ ಗೈದರು. ಕನಕಪುರದ ಪ್ರಸಿದ್ಧ ದೇವಾಲಯಕ್ಕೆ ಭೇಟಿ ನೀಡಿದ ಡಿಕೆಶಿ ತಮ್ಮ ಹುಟ್ಟೂರಾದ ದೊಡ್ಡಾಲಳ್ಳಿ ಗ್ರಾಮಕ್ಕೆ ಕುಟುಂಬ ಸಮೇತರಾಗಿ ತೆರಳಿ ತಂದೆ ಸಮಾಧಿಗೆ ಎಡೆ ಇಟ್ಟರು.

ಮೊದಲಿಗೆ ಹಾರೋಹಳ್ಳಿಯಲ್ಲಿನ ಚಾಮುಂಡೇಶ್ವರಿ ದೇವಾಲಯಕ್ಕೆ ಭೇಟಿ ನೀಡಿ ವಿಶೇಷ ಪೂಜೆ ಸಲ್ಲಿಸಿದರು. ಈ ವೇಳೆ ಅಭಿಮಾನಿಗಳು ತಮ್ಮ ಹೆಗಲ ಮೇಲೆ ಕೂರಿಸಿಕೊಂಡು ಡಿಕೆಶಿಯನ್ನು ಮೆರವಣಿಗೆ ನಡೆಸಿದರು.


ಡಿಕೆಶಿ ಮನೆ ದೇವರಾದ ಕೆಂಕೇರಮ ದೇವಸ್ಥಾನಕ್ಕೆ ಭೇಟಿ ನೀಡಿ ದೇವರಿಕೆ ಹರಿಕೆ ತೀರಿಸಿದರು. ಈ ವೇಳೆ ತಮ್ಮ ಇಬ್ಬರು ಮಕ್ಕಳು ಹಾಗು ಸಹೋದರ ಜತೆಗಿದ್ದರು. ನಂತರ ಕನಕಪುರದಲ್ಲಿನ ಮರಳೇಗವಿ ಮಠಕ್ಕೆ ತೆರಳಿದ ಅವರು ಮುಮ್ಮಡಿ ಶ್ರೀಗಳ ಆರ್ಶೀವಾದ ಪಡೆದರು.

ಬಳಿಕ ಹುಟ್ಟೂರು ದೊಡ್ಡ ಆಲಹಳ್ಳಿ ಆಗಮಿಸುತ್ತಿದ್ದಂತೆ ಅಭಿಮಾನಿಗಳ ಹರ್ಷೋದ್ಗಾರ ಮುಗಿಲು ಮುಟ್ಟಿತ್ತು. ದಾರಿಯುದ್ದಕ್ಕೂ ಅದ್ದೂರಿ ಸ್ವಾಗತ ನೀಡಿ ಆರತಿ ಎತ್ತಿ, ತಿಲಕ ಇಟ್ಟು ನೆಚ್ಚಿನ ನಾಯಕನಿಗೆ ಸ್ವಾಗತಿಸಿದರು.

ನಂತರ ಪಟಾಕಿ ಸಿಡಿಸಿ, ಹೂವಿನ ಹಾರ ಹಾಕಿ, ಹೂವಿನ ಮಳೆ ಸುರಿಮಳೆಯನ್ನೆ ಗೈದು ಪೂರ್ಣ ಕುಂಭ ಸ್ವಾಗತ ನೀಡಲಾಯಿತು.

ನಂತರ ತಮ್ಮ ತಂದೆ ಕೆಂಪೇಗೌಡರ ಸಮಾಧಿಗೆ ಕುಟುಂಬ ಸಮೇತರಾಗಿ ತೆರಳಿದ ಡಿಕೆಶಿ ಕುಟುಂಬ ಎಡೆ ಇಟ್ಟರು. ಈ ವೇಳೆ ಮಾತನಾಡಿದ ಅವರು, ಕ್ಷೇತ್ರದ ಜನತೆ ತೋರಿಸಿದ ಪ್ರೀತಿಗೆ ನಾನು ನಮ್ಮ ಎಲ್ಲ ಮುಖಂಡರ ಪರವಾಗಿ ಕೃತಜ್ಞತೆ ಸಲ್ಲಿಸುತ್ತೇನೆ. ಹಿರಿಯರ ಪೂಜೆ ಸಲ್ಲಿಸಲು ಸಿಕ್ಕಿರಲಿಲ್ಲ. ಅಲ್ಲಿ ನಾನು, ಕುಟುಂಬದವರು ಪೂಜೆ ಜತೆ ಹೋಗಿ ಪೂಜೆ ಸಲ್ಲಿಸುತ್ತಿರುವುದಾಗಿ ತಿಳಿಸಿದರು.

ದೊಡ್ಡಾಲಳ್ಳಿ ಗ್ರಾಮದಿಂದ ನೇರವಾಗಿ ಕಬ್ಬಾಳಮ್ಮ ದೇವಸ್ಥಾನಕ್ಕೆ ತೆರಳಿ ವಿಶೇಷ ಪೂಜೆ ನೆರವೇರಿಸಿದರು. ನಂತರ ದೇಗುಲ ಮಠಕ್ಕೆ ತೆರಳಿದ ಡಿಕೆಶಿ ಅಲ್ಲಿ ಶ್ರೀಗಳನ್ನು ಭೇಟಿಯಾಗಿ ಆರ್ಶೀವಾದ ಪಡೆದರು. ಒಟ್ಟಾರೆ ಸ್ವ ಕ್ಷೇತ್ರದಲ್ಲಿ ಡಿಕೆಶಿಗೆ ಫುಲ್‌ ರೆಸ್ಪಾನ್ಸ್ ಸಿಕ್ಕಿದೆ.