ಡಾ.ಅಂಬೇಡ್ಕರ್‌ ಚಿಂತನೆ ಚಿರಸ್ಮರಣೀಯ

ತಾವರೆಕೆರೆ: ಆಧುನಿಕ ಭಾರತದ ಪಿತಾಮಹ ಭಾರತದಲ್ಲಿ ಸಾಮಾಜಿಕ ಕ್ರಾಂತಿಯನ್ನು ಹುಟ್ಟುಹಾಕಿ ದಲಿತ ಸಮುದಾಯದ ಏಳಿಗೆಗಾಗಿ, ಸಾಮನತೆಗಾಗಿ ಡಾ.ಬಿ.ಆರ್‌. ಅಂಬೇಡ್ಕರ್‌ ಅವರು ನಡೆಸಿದ ಚಿಂತನೆಗಳು, ಹೋರಾಟಗಳು ಚಿರಸ್ಮರಣೀಯ ಎಂದು ದಲಿತ ಸಂಘರ್ಷ ಸಮಿತಿ ಬೆಂಗಳೂರು ವಿಭಾಗೀಯ ಸಂಚಾಲಕ ಮಂಜುನಾಥ್‌ ಅಣ್ಯಯ್ಯ ತಿಳಿಸಿದರು.

ಜಡಿಗೇನಹಳ್ಳಿ ಹೋಬಳಿಯ ಖಾಜಿಹೊಸಹಳ್ಳಿ ಗ್ರಾಮದಲ್ಲಿ ನೂತನವಾಗಿ ನಿರ್ಮಾಣ ಮಾಡಿರುವ ಡಾ. ಬಿ.ಆರ್‌.ಅಂಬೇಡ್ಕರ್‌ ಅವರ ಪ್ರತಿಮೆ ಮುಂಭಾಗ ಮೇಣದ ಬತ್ತಿಗಳನ್ನು ಹಚ್ಚಿ ಪರಿನಿರ್ವಾಣ ದಿನ ಆಚರಿಸಿ ನಂತರ ಮಾತನಾಡಿದರು.

ಅಂಬೇಡ್ಕರ್‌ ಅವರು ನಡೆದು ಬಂದ ಕಷ್ಟದ ದಾರಿಯಲ್ಲಿ ಇಡೀ ಭಾರತವೇ ಗುರುತಿಸುವಂತಹ ವ್ಯಕ್ತಿಯಾಗಿ ಸಮಾಜದ ಹಿಂದುಳಿದವರ ದೀನ ದಲಿತರ ಸಮಗ್ರ ಅಭಿವೃದ್ಧಿಗೆ ಅವರು ಹಾಕಿ ಕೊಟ್ಟಿರುವ ಭದ್ರ ಬುನಾದಿಯ ಪರಿಣಾಮ ಇಂದು ದಲಿತರು ಸಮಾಜದಲ್ಲಿ ಉತ್ತಮ ಜೀವನ ನಡೆಸಲು ಸಾಧ್ಯವಾಗಿದೆ. ವಿಶ್ವದ ಬಹಳ ವಿಸ್ತಾರವಾದ ಅತಿ ದೊಡ್ಡ ಸಂವಿಧಾನ ರಚಿಸಿದ ಮಹಾನ್‌ ಚೇತನ ಅಂಬೇಡ್ಕರ್‌ ಎಂದರು.

ಬಾಬಾ ಸಾಹೇಬರ ಕನಸಿನಂತೆ ಇಂದು ನಾವು ಅವರ ಪರಿನಿರ್ವಾಣ ಆಚರಣೆ ಮಾಡಿದ್ದೇವೆ. ಅಂಬೇಡ್ಕರ್‌ ಅವರ ಕೊನೆಯ ಆಸೆಯಂತೆ 1956 ಆಕ್ಟೋಬರ್‌ 14 ರಂದು ನಾಗಪುರದಲ್ಲಿ 5 ಲಕ್ಷ ಜನ ಅನ್ಯಾಯಕ್ಕೆ ಒಳಗಾಗಿದ್ದಾಗ ಭೌದ್ದ ಧರ್ಮ ಸ್ವೀಕಾರ ಮಾಡಿದರು. ಆ ಧರ್ಮ ಎಲ್ಲಾ ಧರ್ಮಗಳ ಶ್ರೀಮಂತ ಧರ್ಮ. ಆದ್ದರಿಂದ, ಈ ಗ್ರಾಮದ ಸುಮಾರು 400ಕ್ಕೂ ಹೆಚ್ಚು ಜನರು ಬೌದ್ಧ ಧರ್ಮ ಸ್ವೀಕಾರ ಮಾಡಿದ್ದಾರೆ. ಕೇವಲ ಧರ್ಮ ಸ್ವೀಕರಿಸಿದರೆ ಸಾಲದು ಡಾ, ಬಿ.ಆರ್‌.ಅಂಬೇಡ್ಕರ್‌ ಅವರ ಆದರ್ಶ ಆಶಯ, ಸಿದ್ಧಾಂತಗಳನ್ನು ಪಾಲನೆ ಮಾಡಬೇಕು ಎಂದು ಹೇಳಿದರು.

ಇದೇ ಸಂದರ್ಭದಲ್ಲಿ ಸುಮಾರು 400ಕ್ಕೂ ಹೆಚ್ಚು ಜನರು ಗ್ರಾಮದ ಪ್ರಮುಖ ಬೀದಿಗಳಲ್ಲಿ ಮೆರವಣಿಗೆ ಮಾಡಿದರು. ಸುಮಾರು 400ಕ್ಕೂ ಹೆಚ್ಚು ಜನರಿಗೆ ಬೌದ್ಧ ಧರ್ಮದ ದೀಕ್ಷೆ ನೀಡಲಾಗಿದೆ. ಕಾರ‍್ಯಕ್ರಮದಲ್ಲಿ ಶಿವಾನಂದ್‌, ಲೋಕೇಶ್‌, ನಾರಾಯಣಸ್ವಾಮಿ, ಅಪ್ಪಯ್ಯ, ಶಂಕರಯ್ಯ, ಮಂಜುನಾಥ್‌, ಅಂಬರೀಶ್‌, ಗಜೇಂದ್ರ, ಸುನಿಲ್‌ ಹಾಗೂ ಇತರರು ಹಾಜರಿದ್ದರು.