ಐಪಿಎಲ್‌ ಬೆಟ್ಟಿಂಗ್‌ ಇಬ್ಬರ ಬಂಧನ: 1.19 ಲಕ್ಷ ರೂ. ಹಣ ವಶ

ಹೊಸಕೋಟೆ: ನಗರದ ಕೆ.ಆರ್‌.ರಸ್ತೆಯ ಟೀ ಅಂಗಡಿಯ ಬಳಿ ಐಪಿಎಲ್‌ ಪಂದ್ಯಗಳ ಬೆಟ್ಟಿಂಗ್‌ ದಂಧೆಯಲ್ಲಿ ತೊಡಗಿದ್ದ ಇಬ್ಬರು ಯುವಕರನ್ನು ಬಂಧಿಸಿ ಒಟ್ಟು 1.19 ಲಕ್ಷ ರೂ.ಗಳನ್ನು ವಶಪಡಿಸಿಕೊಳ್ಳಲಾಗಿದೆ.

ನಗರದ ಕೋಟೆ ಪ್ರದೇಶದ ವಾಸಿಗಳಾದ ಕಾರ್ಪೆಂಟರ್‌ ವೃತ್ತಿ ಮಾಡುತ್ತಿದ್ದ ಶಿವಕುಮಾರ್‌ (28), ವಿದ್ಯಾರ್ಥಿ ಜಗನ್‌ (23) ಬಂಧಿತರು. ಟೀ ಅಂಗಡಿಯ ಬಳಿ ಮೊಬೈಲ್‌ನಲ್ಲಿ ಬೆಟ್ಟಿಂಗ್‌ ಕಟ್ಟಿಸಿಕೊಳ್ಳುತ್ತಿದ್ದ ಶಿವಕುಮಾರ್‌ ಗೋವಾದಲ್ಲಿದ್ದ ತನ್ನ ತಮ್ಮ ಸಾಗರ್‌ (26) ಜತೆ ವ್ಯವಹಾರ ನಡೆಸುತ್ತಿದ್ದನು. ಖಚಿತ ಸುಳಿವಿನ ಮೇರೆಗೆ ಎಸ್‌ಐ ರಾಜು ನೇತೃತ್ವದಲ್ಲಿ ಪೊಲೀಸ್‌ ಸಿಬ್ಬಂದಿ ದಾಳಿ ನಡೆಸಿದ ಸಂದರ್ಭದಲ್ಲಿ ಪೊಲೀಸರಿಗೆ ಸ್ಥಳದಲ್ಲಿ ಶಿವಕುಮಾರ್‌ ಬಳಿ 49100 ರೂ. ನಗದು, ಜಗನ್‌ ಬಳಿ 21,700 ರೂ. ನಗದು ಹಾಗೂ ಜೂಜಾಟಕ್ಕೆ ಬಳಿಸಿದ್ದ ಒಟ್ಟು 70,170 ರೂ.ಗಳ ಹಣ ಪತ್ತೆಯಾಗಿದೆ. ಪೊಲೀಸರು ಇಬ್ಬರನ್ನು ಬಂಧಿಸಿ ಅವರು ಬಳಸುತ್ತಿದ್ದ ಮೊಬೈಲ್‌, ನಗದು ಹಣವನ್ನು ವಶಪಡಿಸಿಕೊಂಡಿದ್ದಾರೆ.