ರಾಜಕಾಲುವೆ ಒತ್ತುವರಿ: ಮುಸ್ಲಿಂ ಫೆಡರೇಷನ್‌ಗೆ ಸೇರಿದ 6 ಕೋಟಿ ರೂ.ಮೌಲ್ಯದ ಜಾಗ ವಶ

ಬೆಂಗಳೂರು: ರಾಜಕಾಲುವೆ ಒತ್ತುವರಿ ಜಾಗ ತೆರವುಗೊಳಿಸುವ ಕಾರ್ಯವನ್ನು ಬಿಬಿಎಂಪಿ ಮುಂದುವರಿಸಿದ್ದು, ಮಾಜಿ ಕೇಂದ್ರ ಸಚಿವ ಸಿಎಂ ಇಬ್ರಾಹಿಂ ಅಧ್ಯಕ್ಷರಾಗಿರುವ ಕರ್ನಾಟಕ ರಾಜ್ಯ ಮುಸ್ಲಿಂ ಫೆಡರೇಷನ್‌ಗೆ ಸೇರಿದ ಜಾಗವನ್ನೂ ತೆರವುಗೊಳಿಸಲಾಗಿದೆ.

ನಾಗವಾರ ಸರ್ವೆ ನಂಬರ್‌ 32/33ರಲ್ಲಿ ಒಟ್ಟು 5.4 ಗುಂಟೆ ರಾಜಕಾಲುವೆಯನ್ನು ಒತ್ತುವರಿ ಮಾಡಿಕೊಳ್ಳಲಾಗಿತ್ತು. ಇದರಲ್ಲಿ ಫೆಡರೇಷನ್‌ ಒತ್ತುವರಿ ಮಾಡಿಕೊಂಡ ಸುಮಾರು 6 ಕೋಟಿ ರೂ.ಮೌಲ್ಯದ 180 ಮೀಟರ್ ಸಹ ಸೇರಿದೆ. ಈ ಎಲ್ಲ ಒತ್ತುವರಿ ಜಾಗವನ್ನು ಬಿಬಿಎಂಪಿ ಪೂರ್ವ ವಿಭಾಗದ ಮುಖ್ಯ ಎಂಜಿನಿಯರ್ ಪ್ರಸಾದ್ ನೇತೃತ್ವದ ಬಿಬಿಎಂಪಿ ಅಧಿಕಾರಿಗಳ ತಂಡ ತೆರವುಗೊಳಿಸಿದೆ.

'ಈ ಜಾಗದಲ್ಲಿ ಯಾವುದೇ ಕಟ್ಟಡ ನಿರ್ಮಾಣವಾಗಿರಲಿಲ್ಲ. ಖಾಲಿ ಜಾಗವನ್ನು ರಾಜಕಾಲುವೆ ಪಕ್ಕದಲ್ಲಿಯೇ ಒತ್ತುವರಿ ಮಾಡಿಕೊಂಡು ಕಾಂಪೌಂಡ್ ನಿರ್ಮಿಸಲಾಗಿತ್ತು. ಇದೀಗ ಕಾಂಪೌಂಡನ್ನು ಮಾತ್ರ ತೆರವುಗೊಳಿಸಲಾಗಿದೆ,' ಎಂದು ಬಿಬಿಎಂಪಿ ಬೃಹತ್ ನೀರುಗಾಲುವೆ ಚೀಫ್ ಎಂಜಿನಿಯರ್ ಸಿದ್ದೇಗೌಡ ಹೇಳಿದ್ದಾರೆ.