ಏರ್‌ಪೋರ್ಟ್‌ನಿಂದ 6 ಶಾಲೆಗಳ ದತ್ತು

21 ಅಂಗನವಾಡಿಗಳ ನವೀಕರಣಕ್ಕೆ ನೆರವು | ಕಲಿಕಾ ಸಾಮಾಗ್ರಿ ಪೂರೈಕೆ
ಬೆಂಗಳೂರು ಗ್ರಾಮಂತರ: ಶಾಲಾ ದತ್ತು ಕಾರ‍್ಯಕ್ರಮದ ಭಾಗವಾಗಿ ಬೆಂಗಳೂರು ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣ ನಿಯಮಿತ ಸಂಸ್ಥೆ (ಬಿಐಎಎಲ್‌) ಆರು ಸರಕಾರಿ ಶಾಲೆಗಳನ್ನು ದತ್ತು ಪಡೆಯಲಾಗಿದೆ. ಬಿಐಎಎಲ್‌ ತನ್ನ ಸಾಂಸ್ಥಿಕ ಸಾಮಾಜಿಕ ಜವಾಬ್ದಾರಿ (ಸಿಎಸ್‌ಆರ್‌)ಯಡಿ ಅತ್ಯಾಧುನಿಕ ಸೌಲಭ್ಯಗಳೊಂದಿಗೆ ಮೂರು ಸರಕಾರಿ ಶಾಲೆಗಳನ್ನು ಪುನರ್‌ನಿರ್ಮಿಸಿದ್ದು, ಎರಡು ಶಾಲೆಗಳ ನಿರ್ಮಾಣ ಮುಂದಿನ ಶೈಕ್ಷಣಿಕ ವರ್ಷ ಆರಂಭ(2020-21)ಕ್ಕೆ ಮುನ್ನ ಪೂರ್ಣವಾಗುವ ನಿರೀಕ್ಷೆಯಿದೆ.

ಜಿಲ್ಲೆಯಲ್ಲಿಶಿಕ್ಷಣ ಕ್ಷೇತ್ರಕ್ಕೆ ಒತ್ತು ನೀಡುವ ನಿಟ್ಟಿನಲ್ಲಿಶಾಲೆಗಳನ್ನು ಪುನರ್‌ ನಿರ್ಮಿಸುವುದರ ಜತೆಗೆ ಆರಕ್ಕೂ ಹೆಚ್ಚಿನ ಶಾಲೆಗಳ ನವೀಕರಣಕ್ಕೂ ಮುಂದಾಗಿದೆ. ಏರ್‌ಪೋರ್ಟ್‌ ಸಂಸ್ಥೆ ವತಿಯಿಂದ ನಿರ್ಮಾಣಗೊಂಡಿರವ ಶಾಲೆಗಳ ವಿದ್ಯಾರ್ಥಿಗಳಿಗೆ ಕಂಪ್ಯೂಟರ್‌ ಕೋಣೆಗಳು, ವಿಜ್ಞಾನ ಪ್ರಯೋಗಾಲಯಗಳು, ಆಟದ ಮೈದಾನಗಳು ಮತ್ತು ಗ್ರಂಥಾಲಯಗಳು ಸೇರಿವೆ.

2,500 ವಿದ್ಯಾರ್ಥಿಗಳಿಗೆ ಕಲಿಕಾ ವಸ್ತುಗಳು ಮತ್ತು ಸ್ಟೇಷನರಿಗಳ ಪೂರೈಕೆ ಜತೆಗೆ ಪೋಷಕಾಂಶಯುತ ಬೆಳಗಿನ ತಿಂಡಿಯನ್ನು ಪ್ರತಿದಿನ 30 ಶಾಲೆಗಳ 3000ಕ್ಕೂ ಹೆಚ್ಚಿನ ಮಕ್ಕಳಿಗೆ ಬಿಐಎಎಲ್‌ ಪೂರೈಸುತ್ತಿದೆ. ದೇವನಹಳ್ಳಿ ತಾಲೂಕಿನ ಆಯ್ದ ಸರಕಾರಿ ಶಾಲೆಗಳಲ್ಲಿ100 ಆಂಗ್ಲಮತ್ತು ಇತರೆ ವಿಷಯಗಳ ತಜ್ಞರನ್ನು ನೇಮಿಸುವ ಉದ್ದೇಶವನ್ನು ಹೊಂದಿದೆ. ಇದುವರೆಗೆ ಹಲವಾರು ಶಾಲೆಗಳಲ್ಲಿ50 ಶಿಕ್ಷಕರನ್ನು ನೇಮಕ ಮಾಡಿ ನಿಯೋಜಿಸಲಾಗಿದೆ.

2019-19ರಲ್ಲಿಬಿಐಎಎಲ್‌ ವಿದ್ಯಾರ್ಥಿ ವೇತನದಿಂದ 261 ವಿದ್ಯಾರ್ಥಿಗಳಿಗೆ ಲಾಭವಾಗಿತ್ತು. ವಿಮಾನ ನಿಲ್ದಾಣದ ಸುತ್ತಮುತ್ತಲಿನ ಐದು ಪಂಚಾಯಿತಿಗಳ ಪ್ರದೇಶದಲ್ಲಿರುವ ಪ್ರತಿಭಾನ್ವಿತ ವಿದ್ಯಾರ್ಥಿಗಳಿಗೆ ಪ್ರೇರೇಪಣೆ ನೀಡುವುದಕ್ಕಾಗಿ ಈ ಕಾರ‍್ಯಕ್ರಮವನ್ನು ಪರಿಚಯಿಸಲಾಯಿತು.

..............