ತಂತ್ರಜ್ಞಾನ ರೈತರಿಗೆ ತಲುಪಲಿ: ಡಾ.ತ್ರಿಲೋಚನ್‌

ಯಲಹಂಕ: ರೈತರಿಗೆ ಎಲ್ಲ ಲಭ್ಯ ತಂತ್ರಜ್ಞಾನ ತಲುಪುವಂತಾಗಿ, ಅದರ ಸರಿಯಾದ ಬಳಕೆಯಾದರೆ ದೇಶದ ಆರ್ಥಿಕತೆ ಹೆಚ್ಚುತ್ತದೆ. ಈ ಮೂಲಕ ಆಹಾರ ವಲಯದಲ್ಲಿಭಾರತ ಅಗ್ರ ಸ್ಥಾನ ಪಡೆಯಬಹುದಾಗಿದೆ ಎಂದು ಕೇಂದ್ರದ ಕೃಷಿ ಸಂಶೋಧನೆ ಮತ್ತು ಶಿಕ್ಷಣ ಇಲಾಖೆಯ ಕಾರ್ಯದರ್ಶಿ ಡಾ.ತ್ರಿಲೋಚನ್‌ ಮೊಹಾಪಾತ್ರ ಪ್ರತಿಪಾದಿಸಿದರು.

ಹೆಸರಘಟ್ಟದಲ್ಲಿಭಾರತೀಯ ಕೃಷಿ ಸಂಶೋಧನಾ ಮಂಡಳಿ(ಐಸಿಎಆರ್‌), ಭಾರತೀಯ ತೋಟಗಾರಿಕಾ ಸಂಶೋಧನಾ ಸಂಸ್ಥೆ(ಐಐಎಚ್‌ಆರ್‌)ಯ ಎಂಟನೇ ಸಮಿತಿಯ 26ನೇ ಸಭೆಯನ್ನು ಉದ್ಘಾಟಿಸಿ ಅವರು ಮಾತನಾಡಿದರು.

ಕೇರಳದ ಹೆಚ್ಚುವರಿ ಮುಖ್ಯ ಕಾರ್ಯದರ್ಶಿ ಡಿ.ಕೆ.ಸಿಂಗ್‌ ಮಾತನಾಡಿ, ''ಭತ್ತ ಮತ್ತು ಬಾಳೆ ಗಿಡಗಳಿಗೆ ಪ್ರವಾಹದಿಂದ ಹೆಚ್ಚು ಹಾನಿಯಾಗಿದ್ದು, ಗಾಳಿಯ ರಭಸಕ್ಕೆ ಉರುಳದೇ ಇರುವಂತಹ ತಳಿಗಳನ್ನು ಅಭಿವೃದ್ಧಿಪಡಿಸುವತ್ತ ಚಿಂತನೆ ನಡೆಯಬೇಕಿದೆ,'' ಎಂದರು.

ಕೃಷಿ ಇಲಾಖೆ ಹೆಚ್ಚುವರಿ ಕಾರ್ಯದರ್ಶಿ ಮತ್ತು ಆರ್ಥಿಕ ಸಲಹೆಗಾರ ಬಿಂಬಾದರ್‌ ಪ್ರಧಾನ್‌, ಐಐಎಚ್‌ಆರ್‌ ನಿರ್ದೇಶಕ ಎಂ.ಆರ್‌.ದಿನೇಶ್‌, ಮೀನುಗಾರಿಕಾ ಇಲಾಖೆ ಡಿಡಿಜಿ ಜಾಯ್‌ ಕೃಷ್ಣ ಜನಾಹ್‌, ತೋಟಗಾರಿಕಾ ಇಲಾಖೆ ಡಿಡಿಜಿ ಆನಂದ್‌ ಸಿಂಗ್‌, ಕೃಷಿ ಇಲಾಖೆ ಡಿಡಿಜಿ ಎ.ಕೆ.ಸಿಂಗ್‌ ಅವರು ಉಪಸ್ಥಿತರಿದ್ದರು.

ವಿವಿಧ ರಾಜ್ಯಗಳ ವಿಶ್ವವಿದ್ಯಾಲಯಗಳ ಉಪಕುಲಪತಿಗಳು, ತೋಟಗಾರಿಕಾ ಇಲಾಖೆಗಳ ನಿರ್ದೇಶಕರು, ಹಿರಿಯ ಅಧಿಕಾರಿಗಳು, ರೈತರು ಸಭೆಯಲ್ಲಿಭಾಗಿಯಾಗಿದ್ದರು.