ಕಳುವಾದ ಸ್ವತ್ತು 5.59 ಕೋಟಿ: 83.85 ಲಕ್ಷ ಪತ್ತೆ

ಬೀದರ್‌ :ಜಿಲ್ಲೆಯಲ್ಲಿ 2018ನೇ ಸಾಲಿನಲ್ಲಿ ಡಕಾಯಿತಿ, ಸುಲಿಗೆ, ಹಗಲು ಮತ್ತು ರಾತ್ರಿ ಕಳವು, ಮನೆ ಕಳ್ಳತನ, ಸಾಮಾನ್ಯ ಕಳವು ಮತ್ತು ಜಾನುವಾರುಗಳ ಕಳವು ಪ್ರಕರಣಗಳು ದಾಖಲಾಗಿದ್ದು, ಈ ಪೈಕಿ 5,59,54,990 ರೂ. ಮೌಲ್ಯದ ಸ್ವತ್ತು ಕಳುವಾಗಿದೆ ಎಂದು ಜಿಲ್ಲಾ ಪೊಲೀಸ್‌ ವರಿಷ್ಠಾಧಿಕಾರಿ ಟಿ. ಶ್ರೀಧರ್‌ ಅವರ ಪ್ರಕಟಣೆ ತಿಳಿಸಿದೆ.

ಕಳುವಾದ 5.59 ಕೋಟಿ ರೂಪಾಯಿ ಪೈಕಿ 1,21,52,094 ರೂ. ಮೌಲ್ಯದ ಸ್ವತ್ತನ್ನು ಆರೋಪಿತರನ್ನು ಪತ್ತೆ ಹಚ್ಚಿ ವಶಪಡಿಸಿಕೊಳ್ಳಲಾಗಿದ್ದು, ಇವುಗಳಲ್ಲಿ ವಾರಸುದಾರರಿಗೆ ಹಿಂತಿರುಗಿಸಲು ನ್ಯಾಯಾಲಯದಿಂದ ಅನುಮತಿ ಪಡೆದುಕೊಂಡ 83,85,755 ರೂ. ಮೌಲ್ಯದ ಸ್ವತ್ತನ್ನು ಸೋಮವಾರ ಮಾಲೀಕರಿಗೆ/ ವಾರಸುದಾರರಿಗೆ ಹಿಂತಿರುಗಿಸಲಾಗಿದೆ ಎಂದು ತಿಳಿಸಿದ್ದಾರೆ.

ಜಿಲ್ಲಾ ಪೊಲೀಸ್‌ ವರಿಷ್ಠಾಧಿಕಾರಿ ಕಚೇರಿಯ ಪೊಲೀಸ್‌ ಕವಾಯಿತು ಮೈದಾನದಲ್ಲಿ ಸೋಮವಾರ ಬೆಳಗ್ಗೆ ಆಯೋಜಿಸಿದ್ದ ಪ್ರಾಪರ್ಟಿ ರಿಟರ್ನ್‌ ಪರೇಡ್‌ನಲ್ಲಿ ಸ್ವತ್ತನ್ನು ಮಾಲೀಕರಿಗೆ/ ವಾರಸುದಾರರಿಗೆ ನೀಡಲಾಗಿದೆ ಎಂದಿದ್ದಾರೆ.

58 ತೊಲ ಚಿನ್ನ, 55 ಬೈಕ್‌ಗಳು

ಬೀದರ್‌ನ ಎಸ್ಪಿ ಕಚೇರಿಯಲ್ಲಿ ಸೋಮವಾರ ನಡೆದ ಪ್ರಾಪರ್ಟಿ ರಿಟರ್ನ್‌ ಪರೇಡ್‌ನಲ್ಲಿ ಒಟ್ಟು 83,86, 755 ರೂ. ಮೌಲ್ಯದ ಸ್ವತ್ತನ್ನು ಮಾಲೀಕರು ಹಾಗೂ ವಾರಸುದಾರರಿಗೆ ಹಿಂತಿರುಗಿಸಲಾಯಿತು. ಈ ಪೈಕಿ 1,53,675 ರೂ. ನಗದು ಹಣ,17,23,580 ರೂ. ಮೌಲ್ಯದ 58 ತೊಲ 8 ಗ್ರಾಂ ಬಂಗಾರ ಮತ್ತು 24,11,000 ಮೌಲ್ಯದ 55 ಬೈಕ್‌ಗಳು, 29 ಲಕ್ಷ ಮೌಲ್ಯದ ಎರಡು ಲಾರಿಗಳು , 11,98,500 ರೂ.ಮೌಲ್ಯದ ಮೊಬೈಲ್‌ಗಳು ಹಾಗೂ ಮತ್ತಿತರೆ ವಸ್ತುಗಳು ಸೇರಿ ಒಟ್ಟು 83,86,755 ರೂ.ಮೌಲ್ಯದ್ದು ಮರುಕಳಿಸಲಾಗಿದೆ. ಈ ವೇಳೆ ಜಿಲ್ಲೆಯ ವಿವಿಧ ಠಾಣೆಗಳ ಪೊಲೀಸ್‌ ಸಿಬ್ಬಂದಿ ಹಾಜರಿದ್ದರು.