ಮನೆ ತೆರವುಗೊಳಿಸಿದ ಪೊಲೀಸರು

ಕಮಲನಗರ :ತಾಲೂಕಿನ ಕಳಗಾಪೂರ್‌ದಲ್ಲಿ ಸವರ್ಣೀಯ ಜಾತಿಗೆ ಸೇರಿದ ವ್ಯಕ್ತಿಯೊಬ್ಬರು ಅದೇ ಗ್ರಾಮದ ಪರಿಶಿಷ್ಟ ಜಾತಿಗೆ ಸೇರಿದ ವ್ಯಕ್ತಿಗೆ ನೀಡಿದ ಹಣ ವಾಪಸ್ಸು ನೀಡುವಂತೆ ಕಿರುಕುಳ ಮತ್ತು ಜೀವ ಬೆದರಿಕೆ, ಮನೆಗೆ ಬೀಗ ಹಾಕಿರುವ ಕುರಿತು ಪ್ರಕರಣ ದಾಖಲಾಗಿದೆ. ಡಿಎಸ್‌ಪಿ ವೆಂಕನಗೌಡ ಪಾಟೀಲರು ಗುರುವಾರ ಗ್ರಾಮಕ್ಕೆ ತೆರಳಿ ಮನೆಯ ಬೀಗ ತೆರವುಗೊಳಿಸಿದ ಪ್ರಕರಣ ವರದಿಯಾಗಿದೆ.
ಪಂಡರಿ ಕೇಶವರಾವ ಅವರು ಅದೆ ಗ್ರಾಮದ ಪರಿಶಿಷ್ಟ ಜಾತಿಗೆ ಸೇರಿದ ಗೋವಿಂದ ಕೊಂಡಿಬಾ ಅವರಿಗೆ ಮೂರು ವರ್ಷಗಳ ಹಿಂದೆ ಬಡ್ಡಿ ರೂಪದಲ್ಲಿ 35 ಸಾವಿರ ರೂ.ಹಣ ನೀಡಿದ್ದಾರೆ.

ಬಡ್ಡಿ ಸಮೇತ ಒಟ್ಟು 2ಲಕ್ಷ ರೂ.ಹಣ ನೀಡುವಂತೆ ಕೇಳುತ್ತಿದ್ದಾರೆ. ಇದಕ್ಕೆ ಒಪ್ಪದ ಗೋವಿಂದ ಭಯ ಭೀತರಾಗಿ ಮನೆ ಬಿಟ್ಟು ಪರಾರಿಯಾಗಿದ್ದಾರೆ. ಆಗ ಕೆರಳಿದ ಪಂಡರಿ ಅವರು ಗೋವಿಂದನ ಮನೆಯ ಆರು ಕೋಣೆಗಳಿಗೆ ಬೀಗ ಹಾಕಿದ್ದಾನೆ. ಅಲ್ಲದೆ ಕುಟುಂಬದ ಸದಸ್ಯ ಧಮ್ಮಪಾಲನಿಗೆ ಜೀವ ಬೆದರಿಕೆ ಹಾಕಿದ್ದಾನೆ. ಈ ಹಿನ್ನೆಲೆಯಲ್ಲಿ ಗೋವಿಂದನ ಪತ್ನಿ ಕವಿತಾ ಪಂಡರಿ ಅವರು ಬುಧವಾರ ಕಮಲನಗರ ಪೊಲೀಸ್‌ ಠಾಣೆಯಲ್ಲಿ ದೂರು ನೀಡಿದ್ದಾರೆ. ಭಾಲ್ಕಿ ಉಪ ವಿಭಾಗದ ಡಿಎಸ್‌ಪಿ ವೆಂಕನಗೌಡ ಪಾಟೀಲ, ಕಮಲನಗರ ಸಿಪಿಐ ದಿಲೀಪ ಸಾಗರ ನೇತೃತ್ವದಲ್ಲಿ ಪೊಲೀಸರು ಗುರುವಾರ ಗ್ರಾಮಕ್ಕೆ ತೆರಳಿ ಗೋವಿಂದ ಅವರ ಮನೆಯÜ ಬೀಗ ತೆರವುಗೊಳಿಸಿದ್ದಾರೆ. ಅಲ್ಲದೆ ಆರೋಪಿ ವಿರುದ್ಧ ಅಟ್ರಾಸಿಟಿ ಕೇಸು ದಾಖಲಿಸಿ, ನ್ಯಾಯಾಲಯಕ್ಕೆ ಒಪ್ಪಿಸಲಾಗಿದೆ ಎಂದು ತಿಳಿದುಬಂದಿದೆ.