ಅತಿಥಿಗಳಿಗೆ ಹೆಲ್ಮೆಟ್‌, ಗಿಡ ಉಡುಗೊರೆ ನೀಡಿದ ನವಜೋಡಿ

ಬೆಂಗಳೂರು: ಬೀದರ್‌ನಲ್ಲಿ ಇತ್ತೀಚೆಗೆ ನಡೆದ ಮದುವೆಗೆ ಆಗಮಿಸಿದ್ದ ಅತಿಥಿಗಳಿಗೆ ಅಚ್ಚರಿ ಕಾದಿತ್ತು. ಮದುವೆಗೆಗೆ ಬಂದವರಿಗೆ ನವದಂಪತಿ ಹೆಲ್ಮೆಟ್‌ ಮತ್ತು ಗಿಡಗಳನ್ನು ಉಡುಗೊರೆಯಾಗಿ ನೀಡಿದ್ದಾರೆ.

ಶಿವ್‌ರಾಜ್‌ ಜಾಮ್‌ದಾರ್‌ ಮತ್ತು ಸವಿತಾ ಮದುವೆಗೆ ಬಂದವರಿಗೆ ನೂರು ಹೆಲ್ಮೆಟ್‌, ಸಾವಿರ ಗಿಡ ನೀಡಿದ್ದಾರೆ. ಇವರು ಹೀಗೆ ವಿಶಿಷ್ಟ ಉಡುಗೊರೆ ನೀಡಿರುವುದಕ್ಕೆ ಅತಿಥಿಗಳು ಮಾತ್ರವಲ್ಲದೆ ಜಿಲ್ಲಾಡಳಿತ ಮತ್ತು ಪೊಲೀಸ್‌ ಅಧಿಕಾರಿಗಳು ಮೆಚ್ಚುಗ ವ್ಯಕ್ತಪಡಿಸಿದ್ದಾರೆ.

ವರ ಶಿವರಾಜ್‌ ಡ್ರೈವಿಂಗ್‌ ಸ್ಕೂಲ್ ನಡೆಸುತ್ತಿದ್ದು, ಹೆಲ್ಮೆಟ್‌ ಮೂಲಕ ಹಲವರ ಜೀವ ಉಳಿಯಲಿ, ಗಿಡಗಳ ಮೂಲಕ ಮುಂದಿನ ಪೀಳಿಗೆಗೆ ಉತ್ತಮ ಗಾಳಿ ದೊರೆಯಲಿ ಎಂಬ ಆಶಯದೊಂದಿಗೆ ಈ ಉಡುಗೊರೆ ನೀಡಿರುವುದಾಗಿ ಹೇಳಿದ್ದಾರೆ.

ಐಷಾರಾಮಿ ಮದುವೆ ಎಂದು ಹೇಳಿಕೊಂಡು ಸಾಮಾನ್ಯವಾಗಿ ಮದ್ಯ ಮತ್ತು ಮ್ಯೂಸಿಕ್‌ಗೆ ದುಡ್ಡು ವೆಚ್ಚ ಮಾಡುತ್ತಾರೆ. ಏನಾದರೂ ಅರ್ಥಪೂರ್ಣವಾಗಿ ಮಾಡಬೇಕೆಂದು ಯೋಚಿಸಿ ಹೀಗೆ ಉಡುಗೊರೆ ನೀಡಿದೆ. ನನ್ನ ಯೋಚನೆಗೆ ಪೋಷಕರು, ವಧುವಿನ ಕಡೆಯವರು ಒಪ್ಪಿದರು ಎಂದು ಶಿವರಾಜ್‌ ತಿಳಿಸಿದ್ದಾರೆ.

ಗಿಫ್ಟ್‌ ನೀಡಿರುವ ಹೆಲ್ಮೆಟ್‌ಗಳಲ್ಲಿ ಎಂಬತ್ತು ಬಳಕೆಯಾಗುತ್ತಿದ್ದು, ನೀಡಿರುವ ಗಿಡಗಳಲ್ಲಿ 500 ಬದುಕುಳಿದಿವೆ ಎಂದು ಅವರು ಸಂತೋಷ ವ್ಯಕ್ತಪಡಿಸಿರುವ ಅವರು ಈ ಹಿಂದೆ ಮದುಮಕ್ಕಳಿಗೆ ಹೆಲ್ಮೆಟ್‌ ಉಡುಗೊರೆಯಾಗಿ ನೀಡಿದ್ದೇನೆ ಎಂದರು.