ಪತ್ನಿ ಕೊಂದವನಿಗೆ ಜೀವಾವಧಿ ಶಿಕ್ಷೆ

ಬೀದರ್‌: ಹೆಂಡತಿಗೆ ದೈಹಿಕ, ಮಾನಸಿಕ ಕಿರುಕುಳ ನೀಡಿ, ಆಯುಧದಿಂದ ತಿವಿದು ಕೊಲೆ ಮಾಡಿರುವುದು ಸಾಬೀತಾದ ಹಿನ್ನೆಲೆಯಲ್ಲಿ ಅಪರ ಜಿಲ್ಲಾ ಮತ್ತು ಸತ್ರ ನ್ಯಾಯಾಲಯವು ಜೀವಾವಧಿ ಶಿಕ್ಷೆ ಪ್ರಕಟಿಸಿದೆ.

ಔರಾದ್‌ ತಾಲೂಕಿನ ಬೆಳಕುಣಿ (ಬಿ) ಗ್ರಾಮದ ಸದ್ಯಕ್ಕೆ ಔರಾದ್‌ನ ಚೌಂಡಿ ಗಲ್ಲಿಯಲ್ಲಿ ವಾಸವಿರುವ ಲಾರಿ ಚಾಲಕ ಸಂಜೀವಕುಮಾರ (35) ಶಿಕ್ಷೆಗೆ ಒಳಗಾದವನು.

2016 ಆಗಸ್ಟ್‌ 6 ರಂದು ಆಪಾದಿತ ಸಂಜೀವಕುಮಾರ, ಹೆಂಡತಿಯ ತವರೂರು ಬೆಂಬ್ರಾ ಗ್ರಾಮದ ಮನೆಗೆ ಹೋಗಿ ವಿನಾಕಾರಣ ಜಗಳ ಮಾಡಿ, ಮಾನಸಿಕ ಹಾಗೂ ದೈಹಿಕವಾಗಿ ಕಿರುಕುಳ ನೀಡಿದ್ದಾನೆ. ಚೂಪಾದ ಆಯುಧದಿಂದ ಮನಸೋಇಚ್ಛೆ ದೇಹದ ವಿವಿಧೆಡೆ ತಿವಿದು ಕೊಲೆ ಮಾಡಿದ್ದಾನೆ. ಈ ಕುರಿತು ಪ್ರಕರಣ ದಾಖಲಿಸಿ ತನಿಖೆ ನಡೆಸಿದ ಕುಶನೂರು ಠಾಣೆಯ ತನಿಖಾಧಿಕಾರಿ ಎಂ.ಎಸ್‌. ಮುಲ್ಲಾ , ನ್ಯಾಯಾಲಯಕ್ಕೆ ದೋಷಾರೋಪಣ ಪಟ್ಟಿ ಸಲ್ಲಿಸಿದ್ದರು.

ತನಿಖೆ ನಡೆಸಿದ ಅಪರ ಜಿಲ್ಲಾ ಮತ್ತು ಸತ್ರ ನ್ಯಾಯಾಧೀಶ ಎಂ. ಚಂದ್ರಶೇಖರ ರೆಡ್ಡಿ ಅವರು, ಆಪಾದಿತ ಸಂಜೀವಕುಮಾರ ಶಿಕ್ಷಾರ್ಹ ಅಪರಾಧ ಎಸಗಿದ್ದಾನೆ ಎಂದು ತೀರ್ಮಾನಿಸಿ ಜೀವಾವಧಿ ಕಾರಾಗೃಹ ವಾಸದ ಶಿಕ್ಷೆ ಹಾಗೂ 5000 ರೂ. ದಂಡ ವಿಧಿಸಿದ್ದಾರೆ. ದಂಡ ನೀಡಲು ತಪ್ಪಿದ್ದಲ್ಲಿ 6 ತಿಂಗಳು ಸಾದಾ ಕಾರಾಗೃಹ ಶಿಕ್ಷೆ ಅನುಭವಿಸಬೇಕು ಎಂದು ನ್ಯಾಯಾಲಯ ತೀರ್ಪು ನೀಡಿದೆ.

ಜತೆಗೆ ಐಪಿಸಿ ಸೆಕ್ಷನ್‌ 498(ಎ) ಅನ್ವಯ 3 ವರ್ಷಗಳ ಕಠಿಣ ಕಾರಾಗೃಹ ವಾಸದ ಶಿಕ್ಷೆ, 3 ಸಾವಿರ ರೂ. ದಂಡ ಹಾಗೂ ದಂಡ ನೀಡಲು ತಪ್ಪಿದ್ದಲ್ಲಿ 6 ತಿಂಗಳ ಸಾದಾ ಕಾರಾಗೃಹ ವಾಸದ ಶಿಕ್ಷೆ ಅನುಭವಿಸುವಂತೆ ಶಿಕ್ಷೆ ವಿಧಿಸಿ ನ್ಯಾಯಾಲಯ ಆದೇಶಿಸಿದೆ. ಸರಕಾರದ ಪರವಾಗಿ ಅಭಿಯೋಜಕ ಭೀಮಾಶಂಕರ ಅಂಬಲಗಿ ವಾದ ಮಂಡಿಸಿದ್ದಾರೆ.