25 ಅಡಿ ಎತ್ತರ ರಾವಣನ ಪ್ರತಿಕೃತಿ ದಹನ 8ರಂದು

ಹುಮನಾಬಾದ್‌:ಪಟ್ಟಣದ ಬಾಲಾಜಿ ದೇವಸ್ಥಾನದ ಸಹಯೋಗದಲ್ಲಿಗಣೇಶ ದೇವಸ್ಥಾನದಲ್ಲಿದಶಾವತಾರಿ ರಾವಣ ಪ್ರತಿಕೃತಿ ನಿರ್ಮಿಸಿ ದಹಿಸುವ ಪರಂಪರೆಗೆ ಆರು ದಶಕ ಸಂದಿದೆ. ಅ.8ರಂದು ಇಲ್ಲಿನ ಥೇರ್‌ ಮೈದಾನದಲ್ಲಿರಾವಣನ ಪ್ರತಿಕೃತಿ ದಹನ ಆಚರಿಸಲಾಗುವುದು.

ಕಳೆದ 60 ವರ್ಷಗಳ ಹಿಂದೆ ಶಿವಭಕ್ತನಾದ ರಾವಣನ ಪ್ರತಿಕೃತಿ ನಿರ್ಮಿಸುವುದಕ್ಕೆ ಪಟ್ಟಣದ ಕಿಶನ್‌ ಪೇಂಟರ್‌, ಅಡೆಪ್ಪಾ ಶಿವಧಾರ್‌ ನೇತೃತ್ವದ ಹಿರಿಯ ನಾಗರಿಕರ ಗುಂಪೊಂದು ರಚನೆಯಾಗಿತ್ತು. ಆರಂಭದಲ್ಲಿಕೇವಲ ಬಟ್ಟೆ ಮೇಲೆ ರಾವಣನ ಚಿತ್ರವನ್ನು ತೆಗೆದು ಪ್ರಮುಖ ಬೀದಿಯಲ್ಲಿ, ಭವಾನಿ ಪಲ್ಲಕ್ಕಿಯೊಂದಿಗೆ ಬಾಲಾಜಿ ಮಂದಿರದಿಂದ ರಾಮನ ಪಲ್ಲಕ್ಕಿ ಜತೆ ರಾವಣನ ಪ್ರತಿಕೃತಿ ತರಲಾಗುತ್ತಿತ್ತು. ಪಟ್ಟಣದ ಥೇರು ಮೈದಾನದಲ್ಲಿದಹಿಸಲಾಗುತಿತ್ತು.

ಆಗ ಚಿಕ್ಕದಾಗಿ ಮಾಡುತ್ತಿರುವ ಪ್ರತಿಕೃತಿ ಈಗ ಐದು ಅಡಿ ಎತ್ತರ ಮಾಡಲಾಗುತ್ತಿದೆ. ಪ್ರತಿಕೃತಿ ನಿರ್ಮಿಸಲು ನೂತನ ಗುಂಪು ತಯಾರಿಸಿದ್ದು, ಇಂದ್ರಪ್ರಸಾದ ದುಬೆ, ಲಕ್ಷ್ಮಣರಾವ ಚವ್ಹಾಣ, ಬಾಬುಶಾ ವರ್ಮಾ, ಶಿವಾಜಿರಾವ ಬೋಸ್ಲೆ, ವಿಜಯಕುಮಾರ, ಪ್ರೇಮಕುಮಾರ ಚಿದ್ರಿ, ಜಗನ್‌ಪ್ರಸಾದ ಪಾಂಡೆ, ವೀರಣ್ಣಾ ಚಂದನೋರ್‌ (ಬುರೂಡ್‌), ವೀರಣ್ಣಾ ಹೂಗಾರ, ವೀರಣ್ಣಾ ಅಂಬ್ರಿ ಹೀಗೆ ಅನೇಕ ಜನರ ಶ್ರಮವಿದೆ.

ಮೊದಲು ದಶಾವತಾರ ಪ್ರತಿಮೆಯನ್ನು ಮಾಡಿ ಮೆರವಣಿಗೆ ಮಾಡಲಾಗುತ್ತಿತ್ತು. ಆದರೆ, ರಸ್ತೆಯಲ್ಲಿಮೆರವಣಿಗೆ ವೇಳೆ ಅಡ್ಡಿಯಾಗಿದ್ದರಿಂದ ಏಕಮುಖಿ ರಾವಣ ನಿರ್ಮಿಸುತ್ತಿದ್ದಾರೆ.

ಬಾಲಾಜಿ ಮಂದಿರದ ನೆರವಿನೊಂದಿಗೆ ಹಿರಿಯರಾದ ನೀಲಕಂಠ ಮಠಪತಿ, ವಸಂತರಾವ ಸಾಠೆ, ಸುಧಾಕರರಾವ ಕುಲಕರ್ಣಿ ಅವರ ನೇತೃತ್ವದಲ್ಲಿಅನೇಕ ಯುವಕರ ಸಹಕಾರದಿಂದ ರಾವಣನ ಪ್ರತಿಕೃತಿ ಸಿದ್ಧಗೊಂಡಿದೆ.

ಲಕ್ಷಾಂತರ ಖರ್ಚು:

ಆರಂಭದಲ್ಲಿಕೇವಲ 500 ರೂ. ಖರ್ಚು ವ್ಯಯಿಸಲಾಗುತ್ತಿತ್ತು. ನಂತರದಲ್ಲಿ1 ಲಕ್ಷಕ್ಕೂ ಅಧಿಕ ಅನುದಾನದಲ್ಲಿ 25 ಅಡಿ ಎತ್ತರ, 6 ಅಡಿ ಅಗಲದ ಪ್ರತಿಕೃತಿಯನ್ನು ಬೀದರಿನ ಬಂಬು ಹಾಗೂ ಪೇಪರ್‌ದಿಂದ ನಿರ್ಮಿಸಲಾಗುತ್ತಿದೆ. 4 ಕ್ವಿಂಟಲ್‌ ಭಾರದ ಪ್ರತಿಕೃತಿ ಹಬ್ಬಕ್ಕೂ 20 ದಿವಸ ಮುನ್ನವೇ ಸಿದ್ಧಗೊಳ್ಳುತ್ತದೆ. ರಾತ್ರಿ 12 ಗಂಟೆಯವರೆಗೆ ಕೆಲಸ ಮಾಡುತ್ತಾರೆ.