ಬೀದರ್‌ನಲ್ಲಿ ಚಳಿ ಅಂದ್ರೆ ಚಳಿ..! ಅತ್ಯಂತ ಕನಿಷ್ಠ ತಾಪಮಾನ, ಮಧ್ಯಾಹ್ನ 12 ಆದ್ರೂ ಬಿಡದ ತಂಡಿ

ಬೀದರ್‌: ರಾಜ್ಯದಲ್ಲೇ ಅತ್ಯಂತ ಕನಿಷ್ಠ ತಾಪಮಾನ ಬೀದರ್‌ನಲ್ಲಿ ದಾಖಲಾಗಿದೆ. ಬೀದರ್‌ ನಗರದ ಹಳ್ಳದಕೇರಿಯಲ್ಲಿ 5.6 ಸೆಲ್ಸಿಯಸ್‌ ಕನಿಷ್ಠ ತಾಪಮಾನ ದಾಖಲಾಗಿದ್ದು, ಇತ್ತೀಚಿನ ವರ್ಷಗಳಲ್ಲಿ ರಾಜ್ಯದಲ್ಲಿ ದಾಖಲಾದ ಕನಿಷ್ಠ ತಾಪಮಾನವಿದು.

ದಾಖಲೆಗಳ ಪ್ರಕಾರ 1980ರಲ್ಲಿ ಬೀದರ್‌ ಜಿಲ್ಲೆಯಲ್ಲಿ ಅತ್ಯಂತ ಕಡಿಮೆ, ಅಂದರೆ 2.8 ಡಿಗ್ರಿ ಸೆಲ್ಸಿಯಸ್‌ ದಾಖಲಾಗಿರುವುದು ಈವರೆಗಿನ ಕನಿಷ್ಠ ತಾಪಮಾನವಾಗಿದೆ. ಬೀದರ್‌ ಜಿಲ್ಲೆಯಲ್ಲಿ ಈಗ ಮಧ್ಯಾಹ್ನ 12 ಗಂಟೆಯಾದರೂ ಚಳಿ ಕಡಿಮೆ ಆಗುತ್ತಿಲ್ಲ. ಬೆಳಗ್ಗೆ, ಸಂಜೆ ವೇಳೆ ಮೈ ನಡುಗಿಸುವ ಚಳಿ ಇರುತ್ತಿದ್ದು, ಜನ ಜೀವನವನ್ನೇ ಅಸ್ತವ್ಯಸ್ತಗೊಳಿಸುತ್ತಿದೆ.

ಭಾರಿ ಪ್ರಮಾಣದ ಚಳಿಯಿಂದಾಗಿ ಹಿಂಗಾರು ಬೆಳೆಗಳ ಬೆಳವಣಿಗೆಯೂ ಕುಂಠಿತವಾಗುತ್ತಿದೆ. ಜನವರಿ ತಿಂಗಳಲ್ಲಿ ತಾಪಮಾನ ಕ್ರಮೇಣ ಹೆಚ್ಚುತ್ತ ಹೋಗುವುದರಿಂದ ಆ ವೇಳೆ ಬೆಳೆಗಳು ಸಮೃದ್ಧವಾಗಿ ಬೆಳೆಯುತ್ತವೆ ಎಂದು ಭಾರತೀಯ ಹವಾಮಾನ ಕೇಂದ್ರದ ತಾಂತ್ರಿಕ ಅಧಿಕಾರಿ ಬಸವರಾಜ್‌ ಬಿರಾದಾರ್‌ ವಿಕಕ್ಕೆ ತಿಳಿಸಿದ್ದಾರೆ. 2021ರ ಜ. 5ರಿಂದ 25ರವರೆಗೆ ಚಳಿ ಭಾರಿ ಪ್ರಮಾಣದಲ್ಲಿ ಹೆಚ್ಚಾಗಲಿದೆ ಎಂದೂ ಅವರು ತಿಳಿಸಿದರು.

ಯಾಕೆ ಈ ಪರಿಯ ಚಳಿ?ಪಾಶ್ಚಿಮಾತ್ಯ ರಾಷ್ಟ್ರಗಳಲ್ಲಿ ಬೀಸುತ್ತಿರುವ ಶೀತ ಗಾಳಿಯು ಧೂಳು, ತೇವಾಂಶ ತುಂಬಿಕೊಂಡು ವೇಗವಾಗಿ ಬೀಸುತ್ತಿದೆ. ಈ ಗಾಳಿ, ಧೂಳು ಹಿಮಾಲಯ ಪರ್ವತಕ್ಕೆ ಬಂದು ಬಡಿದು, ದೇಶದೊಳಗೆ ತಿರುಗಿ ಬೀಸುತ್ತಿರುವುದು ಚಳಿ ಹೆಚ್ಚಳಕ್ಕೆ ಒಂದು ಕಾರಣ. ಫೆಸಿಫಿಕ್‌ ಸಮುದ್ರದಿಂದ ಬೀಸುವ ಶೀತ ಗಾಳಿಯೂ ಚಳಿಯ ಪ್ರಮಾಣ ಏರಿಸುತ್ತಿದೆ ಎಂದು ಹವಾಮಾನ ಇಲಾಖೆ ವಿವರಣೆ ನೀಡಿದೆ.