ಪತ್ನಿಯನ್ನು ಕೊಂದ ಪತಿ

ಬಸವಕಲ್ಯಾಣ :ಮದ್ಯದ ಅಮಲಿನಲ್ಲಿ ಪತಿಯೊಬ್ಬ ಪತ್ನಿಗೆ ಕಟ್ಟಿಗೆಯಿಂದ ಹೊಡೆದು ಕೊಲೆಗೈದ ಘಟನೆ ನಗರದ ಕಾಳಿ ಗಲ್ಲಿಯಲ್ಲಿ ಗುರುವಾರ ತಡರಾತ್ರಿ ನಡೆದಿದೆ.

ಶಿವಲೀಲಾ(34) ಮೃತ ಮಹಿಳೆ. ಪ್ರತಿನಿತ್ಯವೂ ಮದ್ಯ ಸೇವಿಸಿ ಬರುತ್ತಿದ್ದ ಪತಿ, ಪತ್ನಿಯನ್ನು ವಿನಾಕಾರಣ ಪೀಡಿಸುತ್ತಿದ್ದ ಎನ್ನಲಾಗಿದೆ.ಆದರೆ,ಗುರುವಾರ ರಾತ್ರಿ ಆರೋಪಿ ಬಸವರಾಜ ಕೋಪದಲ್ಲಿ ಕಟ್ಟಿಗೆಯಿಂದ ಹಲ್ಲೆ ನಡೆಸಿದ್ದಾನೆ. ಆಗ ಜೋರಾದ ಪೆಟ್ಟಿನಿಂದಾಗಿ ಪತ್ನಿ ಸ್ಥಳದಲ್ಲಿಯೇ ಕುಸಿದು ಬಿದ್ದು ಸಾವನ್ನಪ್ಪಿದ್ದಾಳೆ.

ಆರೋಪಿ ಬಸವರಾಜನ್ನು ಪೊಲೀಸರು ಬಂಧಿಸಿದ್ದಾರೆ. ಸ್ಥಳಕ್ಕೆ ಡಿವೈಎಸ್ಪಿ ಮಲ್ಲಿಕಾರ್ಜುನ ಸಾಲಿ ಇತರರು ಭೇಟಿ ನೀಡಿ ಪರಿಶೀಲನೆ ನಡೆಸಿದರು. ಈ ಕುರಿತು ನಗರ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.

ಇಬ್ಬರು ಮಕ್ಕಳು ಅನಾಥ: ಮೃತ ಶಿವಲೀಲಾಗೆ ಮದುವೆಯಾಗಿ 14 ವರ್ಷವಾಗಿತ್ತು.ಒಂದು ಗಂಡು,ಇಬ್ಬರು ಹೆಣ್ಣು ಮಕ್ಕಳಿದ್ದಾರೆ.ತಾಯಿ ಕಳೆದುಕೊಂಡು ಮಕ್ಕಳು ಇದೀಗ ಅನಾಥವಾಗಿದ್ದಾರೆ.