ವಾದ್ಯದೊಂದಿಗೆ ಮತಗಟ್ಟೆಗೆ ಆಗಮಿಸಿದ ಮತದಾರರು

ಕಮಲನಗರ :ತಾಲೂಕಿನ ನಿಡೋದಾ ಗ್ರಾಮದಲ್ಲಿ ಲೋಕಸಭೆ ಚುನಾವಣೆ ನಿಮಿತ್ತ ಮಂಗಳವಾರ ಮತದಾನಕ್ಕಾಗಿ ಹಬ್ಬದ ಸಂಭ್ರಮ ಮನೆ ಮಾಡಿತ್ತು.ಬೆಳಗ್ಗೆ ಬಸವೇಶ್ವರ ವೃತ್ತದಲ್ಲಿ ಗ್ರಾಮಸ್ಥರು ಸೇರಿಕೊಂಡು ಒಮ್ಮತದ ನಿರ್ಣಯ ಕೈಗೊಂಡರು.

ಮಹಿಳೆ ಮತ್ತು ಪುರುಷರು ಹೊಸ ಬಟ್ಟೆಯನ್ನು ಧರಿಸಿ, ಬಾಜಾ ಭಜಂತ್ರಿಯೊಂದಿಗೆ ಮೆರವಣಿಗೆಯಲ್ಲಿ ಸಾಗಿದರು. ಗ್ರಾಮದ ಹೊರಗಡೆ ಇರುವ ಸರಕಾರಿ ಹಿರಿಯ ಪ್ರಾಥಮಿಕ ಶಾಲೆಗೆ ಆಗಮಿಸಿ ಸರದಿಯಂತೆ ಮತ ಚಲಾಯಿಸಿದರು. ಮತಗಟ್ಟೆ ಸಂಖ್ಯೆ 206ರಲ್ಲಿ 755 ಮತದಾರರ ಪೈಕಿ 423 ಮತ್ತು ಮತಗಟ್ಟೆ ಸಂಖ್ಯೆ 207ರಲ್ಲಿ 663 ಮತದಾರರಿದ್ದು, ಆ ಪೈಕಿ 496 ಜನ ಮತ ಚಲಾಯಿಸಿದ್ದಾರೆ ಎಂದು ತಿಳಿದುಬಂದಿದೆ.

ಗ್ರಾಮದ ರವೀಂದ್ರ ಪಾಟೀಲ, ಆಸೀಸ್‌ ಕುಲಕರ್ಣಿ, ಜಗನ್ನಾಥ ಭಾಲ್ಕೆ, ಗುಂಡಪ್ಪ ಶೆಂಬೆಳ್ಳೆ, ಲಕ್ಷ್ಮಣ ಗಾದಗೆ, ಪಿಂಟೂ ಬಿರಾದಾರ, ಸಂತೋಷ ನಿಟ್ಟೂರೆ, ಮಹೇಶ ಪಾಟೀಲ ಹಾಗೂ ಇನ್ನಿತರರಿದ್ದರು.