ಜನ್ನೂರಿನಲ್ಲಿ ಶಶಿಮಾರಮ್ಮ ಜಾತ್ರಾ ಮಹೋತ್ಸವ

ಸಂತೇಮರಹಳ್ಳಿ : ಸಂತೇಮರಹಳ್ಳಿ ಸಮೀಪದ ಜನ್ನೂರಿನಲ್ಲಿ ಗ್ರಾಮದೇವತೆ ಶಶಿಮಾರಮ್ಮ ಜಾತ್ರಾ ಮಹೋತ್ಸವ ಬುಧವಾರ ನಡೆಯಿತು.

ಜಾತ್ರಾ ಮಹೋತ್ಸವ ಅಂಗವಾಗಿ ಮಂಗಳವಾರ ಶಶಿಮಾರಮ್ಮ ದೇವಸ್ಥಾನದಲ್ಲಿ ಹರಕೆ ಹೋತ್ತ ಮಹಿಳೆಯರಿಂದ ಪಂಜಿನ ಸೇವೆ ನಡೆಯಿತು.

ಬುಧವಾರ ಬೆಳಗ್ಗೆಯಿಂದಲೇ ಮಂಡೆ ಉತ್ಸವ ಹಾಗೂ ಮನಿಯಮ್ಮ, ಮಾಸ್ತಮ್ಮ ದೇವರ ವಿಗ್ರಹವನ್ನು ಕೆಂಪನಕಟ್ಟೆ ಬಳಿ ಸ್ವಚ್ಫಗೊಳಿಸಿ ನಾನಾ ವಿಧಾನಗಳ ಮೂಲಕ ನಾನಾ ಬಗೆಯ ಹೂವುಗಳಿಂದ ಅಲಂಕರಿಸಲಾಗಿತ್ತು. ವಿಶೇಷ ಪೂಜೆ ಸಲ್ಲಿಸಿ ಮಹಾಮಂಗಳಾರತಿ ನೆರವೇರಿಸಿದ ನಂತರ ಭಕ್ತರಿಗೆ ದರ್ಶನ ಪಡೆಯಲು ಅವಕಾಶ ನೀಡಲಾಯಿತು.

ನಂತರ ಮಧ್ಯಾಹ್ನ ಶಶಿಮಾರಮ್ಮ ವಿಗ್ರಹವನ್ನು ದೇವಸ್ಥಾನ ಬಳಿ ವಿಶೇಷ ಪೂಜೆ ಸಲ್ಲಿಸಿ ಗ್ರಾಮದ ಪ್ರಮುಖ ಬೀದಿಗಳಲ್ಲಿ ಮೆರವಣಿಗೆ ನಡೆಯಿತು.

ಹಬ್ಬದ ಅಂಗವಾಗಿ ಗುರುವಾರ ಮನಿಯಮ್ಮ, ಮಾಸ್ತಮ್ಮ, ಶಶಿಮಾರಮ್ಮ ದೇವಸ್ಥಾನಗಳಲ್ಲಿ ವಿಶೇಷ ಪೂಜೆ ಕಾರ್ಯಕ್ರಮ ನಡೆಯಲಿದೆ. ಶುಕ್ರವಾರ ಗೋರೆ ಮೆರವಣಿಗೆ ನಡೆಯಲಿದೆ.

ಕಳೆದ 4 ದಿನಗಳ ಕಾಲ ನಡೆಯುವ ಜಾತ್ರಾ ಮಹೋತ್ಸವ ಅಂಗವಾಗಿ ಶಶಿಮಾರಮ್ಮ, ಮಾಸ್ತಮ್ಮ, ಮನಿಯಮ್ಮ ಹಾಗೂ ಗ್ರಾಮದ ಪ್ರಮುಖ ಬೀದಿಗಳಲ್ಲಿ ತಳೀರು ತೊರಣ ಹಾಗೂ ವಿದ್ಯುತ್‌ ದೀಪಗಳಿಂದ ಅಲಂಕರಿಸಲಾಯಿತು.

ಜಾತ್ರಾ ಮಹೋತ್ಸವ ಹಿನ್ನೆಲೆಯಲ್ಲಿ ಅಕ್ಕ ಪಕ್ಕದ ಗ್ರಾಮಗಳಾದ ಜನ್ನೂರು ಹೊಸೂರು, ಹಳ್ಳಿಕೆರೆಹುಂಡಿ, ಉಮ್ಮತ್ತೂರು, ಬಾಗಳಿ ಸೇರಿದಂತೆ ನಾನಾ ಗ್ರಾಮದ ಜನರು ಬೆಳಗ್ಗೆಯಿಂದಲೇ ಸರದಿ ಸಾಲಿನಲ್ಲಿ ನಿಂತು ಶಶಿಮಾರಮ್ಮ, ಮಾಸ್ತಮ್ಮ, ಮನಿಯಮ್ಮ ದೇವಿಗೆ ವಿಶೇಷ ಪೂಜೆ ಸಲ್ಲಿಸಿ ದರ್ಶನ ಪಡೆದರು.