ದಾಖಲೆ ಇಲ್ಲದ 2.34 ಲಕ್ಷ ರೂ. ವಶ

ಚಾಮರಾಜನಗರ : ಚುನಾವಣೆ ನೀತಿ ಸಂಹಿತೆ ಹಿನ್ನೆಲೆಯಲ್ಲಿ ಪ್ರತ್ಯೇಕ ಪ್ರಕರಣಗಳಲ್ಲಿ ದಾಖಲೆ ಇಲ್ಲದೆ ಸಾಗಿಸುತ್ತಿದ್ದ 2.34 ಲಕ್ಷ ರೂ.ಗಳನ್ನು ಚುನಾವಣಾ ತಪಾಸಣೆ ಅಧಿಕಾರಿಗಳು ವಶಪಡಿಸಿಕೊಂಡಿದ್ದಾರೆ.

ಗುಂಡ್ಲುಪೇಟೆಯಿಂದ ಚಾಮರಾಜನಗರಕ್ಕೆ ಹೋಗುವ ರಸ್ತೆಯ ಶಿವಾನಂದ ವೃತ್ತದ ಬಳಿ ಗುರುವಾರ ತಪಾಸಣೆ ವೇಳೆ ಕಾರಿನಲ್ಲಿ ತೆರಳುತ್ತಿದ್ದ ಅಬಾಜ್‌ ಎಂಬುವವರಿಂದ ದಾಖಲೆಯಿಲ್ಲದ 80 ಸಾವಿರ ರೂ. ಹಣ ಪತ್ತೆಯಾಗಿದ್ದು ಪ್ಲೈಯಿಂಗ್‌ ಸ್ವ್ಕಾಡ್‌ ಅಧಿಕಾರಿ ವಶಪಡಿಸಿಕೊಂಡಿದ್ದಾರೆ. ಮತ್ತೊಂದು ಪ್ರಕರಣದಲ್ಲಿ ಕೊಳ್ಳೇಗಾಲ ವಿಧಾನಸಭೆ ಕ್ಷೇತ್ರ ವ್ಯಾಪ್ತಿಯ ಬಾಣಹಳ್ಳಿ ಸಮೀಪ ಕಾರಿನಲ್ಲಿ ಬಂದ ನಾರಾಯಣ ಸ್ವಾಮಿ ಎಂಬುವವರಿಂದ ದಾಖಲೆ ಇಲ್ಲದ 70,500 ರೂ.ಗಳನ್ನು ಎಸ್‌.ಎಸ್‌.ಟಿ (ಸ್ಟ್ಯಾಟಿಕ್‌ ಸರ್ವೇಲೆನ್ಸ್‌ ಟೀಮ್‌) ಅಧಿಕಾರಿಗಳು ವಶಪಡಿಸಿಕೊಂಡಿದ್ದಾರೆ. ಗುಂಡ್ಲುಪೇಟೆ ತಾಲೂಕಿನ ತೆರಕಣಾಂಬಿ-ಚಾಮರಾಜನಗರ ರಸ್ತೆಯಲ್ಲಿ ತಪಾಸಣೆ ವೇಳೆ ದ್ವಿಚಕ್ರ ವಾಹನದ ಹಿಂಬದಿಯಲ್ಲಿ ಕುಳಿತಿದ್ದ ಸೈಯದ್‌ ಯೂನಿಸ್‌ ಎಂಬುವವರಿಂದ ದಾಖಲೆಯಿಲ್ಲದ 83,500 ರೂ. ಹಣವನ್ನು ಪ್ಲೈಯಿಂಗ್‌ ಸ್ವ್ಕಾಡ್‌ ಅಧಿಕಾರಿಗಳು ವಶಪಡಿಸಿಕೊಂಡಿದ್ದಾರೆ.