ನಕ್ಸಲ್‌ ನಿಗ್ರಹ ಪಡೆಯಿಂದ ಜನಸಂಪರ್ಕ ಸಭೆ

ಗುಂಡ್ಲುಪೇಟೆ : ತಾಲೂಕಿನ ಕಣಿಯನಪುರ ಕಾಲನಿ ಗ್ರಾಮದಲ್ಲಿ ನಕ್ಸಲ್‌ ನಿಗ್ರಹ ಪಡೆ ವತಿಯಿಂದ ಜನಸಂಪರ್ಕ ಸಭೆ ನಡೆಯಿತು.

ಗ್ರಾಮದ ಆವರಣದಲ್ಲಿ ನಡೆದ ಜನಸಂಪರ್ಕ ಸಭೆಯ ನೇತೃತ್ವ ವಹಿಸಿದ್ದ ನಕ್ಸಲ್‌ ನಿಗ್ರಹ ಪಡೆಯ ಡಿಎಸ್ಪಿ ಪ್ರಸನ್ನಕುಮಾರ್‌ ಜನರ ಸಮಸ್ಯೆಗಳನ್ನು ಆಲಿಸಿ, ಲಿಖಿತ ಮನವಿ ಸ್ವೀಕರಿಸಿದರು.

ನಂತರ ಮಾತನಾಡಿದ ಅವರು, ''ಅರಣ್ಯವಾಸಿಗಳಾದ ಗಿರಿಜನರನ್ನು ಅರಣ್ಯದಂಚಿಗೆ ಸ್ಥಳಾಂತರಿಸಲಾಗಿದೆ. ಗಿರಿಜನರಿಗೆ ಇತರರಂತೆ ಬದುಕಲು ಸರಕಾರ ಮತ್ತು ಪರಿಶಿಷ್ಟ ವರ್ಗಗಳ ಕಲ್ಯಾಣ ಇಲಾಖೆ ನಾನಾ ಕಾರ್ಯಕ್ರಮಗಳನ್ನು ಅನುಷ್ಠಾನಗೊಳಿಸುತ್ತಿದೆ. ಆದ್ದರಿಂದ ಗಿರಿಜನರು ಹಿಂಜರಿಕೆ ಬಿಟ್ಟು ಸೌಲಭ್ಯಗಳ ಸದುಪಯೋಗ ಪಡೆದುಕೊಳ್ಳಬೇಕು,'' ಎಂದು ಸಲಹೆ ನೀಡಿದರು.

''ರಸ್ತೆ, ಸಾರಿಗೆ, ಅಂಗನವಾಡಿ ಕೇಂದ್ರ ನಿರ್ಮಾಣ ಕಾಮಗಾರಿ ಅಪೂರ್ಣವಾಗಿರುವ ಬಗ್ಗೆ, ಸಾಮಾಜಿಕ ಭದ್ರತಾ ಯೋಜನೆಗಳ ಪ್ರಯೋಜನ ಗಿರಿಜನರಿಗೆ ತಲುಪದ ಮತ್ತು ಅಗತ್ಯವಾಗಿ ಮೂಲಸೌಲಭ್ಯಗಳ ಕೊರತೆ ಬಗ್ಗೆ ಸಂಬಂಧಿಸಿದ ಅಧಿಕಾರಿಯವರಿಗೆ ಪತ್ರ ಬರೆಯಲಾಗುವುದು,'' ಎಂದು ಭರವಸೆ ನೀಡಿದರು.

ಗ್ರಾಮದ ಮುಖಂಡರಾದ ಕನ್ನರಯ್ಯ, ಕುನ್ನಮರೀಗೌಡ, ಅಭಿಲಾಷ್‌, ಅಂಗನವಾಡಿ ಕಾರ್ಯಕರ್ತೆ ಸೌಮ್ಯ, ನಕ್ಸಲ್‌ ನಿಗ್ರಹ ಪಡೆಯ ನೌಕರರಾದ ಶಿವಕುಮಾರ್‌, ಮಹದೇವಪ್ರಸಾದ್‌, ನಂದೀಶ್‌ ಹಾಜರಿದ್ದರು.