ಆಸ್ಪತ್ರೆ ವೈದ್ಯರಿಗೆ ಶಾಸಕ ಮಹೇಶ್‌ ತರಾಟೆ

ಕೊಳ್ಳೇಗಾಲ: ಪಟ್ಟಣದ ಆಸ್ಪತ್ರೆಯಲ್ಲಿ ಶಿಸ್ತು ಪಾಲನೆ ಮಾಡದಿದ್ದರೆ, ಅದನ್ನು ಹೇಗೆ ಮಾಡಿಸಬೇಕೆಂಬುದು ನಮಗೆ ಗೊತ್ತಿದೆ ಎಂದು ಶಾಸಕ ಎನ್‌.ಮಹೇಶ್‌ ಉಪವಿಭಾಗ ಆಸ್ಪತ್ರೆಯ ವೈದ್ಯರನ್ನು ತರಾಟೆಗೆ ತೆಗೆದುಕೊಂಡರು.

ಉಪ ವಿಭಾಗಾ ಆಸ್ಪತ್ರೆಗೆ ತಮ್ಮ ಸಂಬಂಧಿಕರ ಆರೋಗ್ಯ ವಿಚಾರಿಸಲು ಭೇಟಿ ನೀಡಿದ್ದ ವೇಳೆ ಆಸ್ಪತ್ರೆ ಸಿಬ್ಬಂದಿ ಸಮವಸ್ತ್ರ ಧರಿಸಿದೆ ಇರುವುದು, ವೈದ್ಯರು ಹಾಗೂ ಸಿಬ್ಬಂದಿ ಗೈರು ಹಾಜರಾಗಿರುವುದು ಗಮನಕ್ಕೆ ಬಂತು. ಹಾಜರಾತಿ ಪುಸ್ತಕ ತಂದು ಪರಿಶೀಲಿಸಿದಾಗ ಓರ್ವ ಸಿಬ್ಬಂದಿ ಹಾಗೂ ಐವರು ವೈದ್ಯರು ಗೈರು ಹಾಜರಾಗಿದ್ದರು. ಇಂದು ಸರಕಾರಿ ರಜೆ ಇರುವುದರಿಂದ ಕೆಲವು ಸಿಬ್ಬಂದಿಗೆ ರಜೆ ಇರುವುದರಿಂದ ಬಂದಿಲ್ಲಎಂಬುದು ಶಾಸಕರ ಗಮನಕ್ಕೆ ಬಂತು. ಅಂತಹವರನ್ನು ಹೊರತುಪಡಿಸಿ ಗೈರು ಹಾಜರಾಗಿರುವ ಉಳಿದವರಿಗೆ ನೊಟೀಸ್‌ ನೀಡುವಂತೆ ಡಿಎಚ್‌ಒಗೆ ಕರೆ ಮಾಡಿ ಸೂಚಿಸಿದರು.

ನಂತರ ಮಾತನಾಡಿದ ಅವರು, ಆಸ್ಪತ್ರೆ ಸಂತೆ ಮಾದರಿಯಲ್ಲಿದೆ. ಇಲ್ಲಿಶಿಸ್ತು ಇಲ್ಲವೇ ಇಲ್ಲ, 15 ಜನ ಹೊರಗುತ್ತಿಗೆದಾರರು ಹಾಗೂ ದಾದಿಯರು ಸಮವಸ್ತ್ರವನ್ನೆ ಧರಿಸಿಲ್ಲ, ಸಿಬ್ಬಂದಿ ಯಾರು ಎಂಬುದೆ ತಿಳಿಯದೆ ಜನ ಪರದಾಡುವಂತಾಗಿದೆ. ಚಿಕಿತ್ಸೆಗೆ ಬಂದ ಜನರನ್ನು ಸಾಲಾಗಿ ನಿಲ್ಲಿಸುವ ಕಾರ್ಯವನ್ನೂ ಮಾಡಿಲ್ಲ, ಇದೀಗ ಬರಿ ಎಚ್ಚರಿಕೆ ನೀಡಿದ್ದೇನೆ. ಇದೇ ರೀತಿ ಮುಂದುವರಿದರೆ ಏನು ಮಾಡಬೇಕು ಎಂಬುದು ನನಗೆ ಗೊತ್ತಿದೆ ಎಂದರು.