ಬಂಡೀಪುರ ಬೆಂಕಿ ಶಮನ

ಗುಂಡ್ಲುಪೇಟೆ : ಬಂಡೀಪುರ ರಾಷ್ಟ್ರೀಯ ಉದ್ಯಾನದ ಕುಂದಕೆರೆ ಅರಣ್ಯ ವಲಯದಲ್ಲಿ ಗುರುವಾರ ಸಂಜೆ ಕಾಣಿಸಿಕೊಂಡಿದ್ದ ಬೆಂಕಿ ಸಂಪೂರ್ಣವಾಗಿ ತಹಬದಿಗೆ ಬಂದಿದೆ ಎಂದು ಹುಲಿ ಯೋಜನೆ ನಿರ್ದೇಶಕ ಟಿ.ಬಾಲಚಂದ್ರ ತಿಳಿಸಿದ್ದಾರೆ.

ಕುಂದಕೆರೆ ಅರಣ್ಯ ವಲಯದ ಕಣಿಯನಪುರ ಗ್ರಾಮದ ಖಾಸಗಿ ಜಮೀನಿನಿಂದ ಬಂದ ಬೆಂಕಿ ಬಂಡೀಪುರ ಹುಲಿ ಸಂರಕ್ಷಿತ ಪ್ರದೇಶದ ಕುಂದಕೆರೆ ವಲಯದ ವೀರೇಶ್ವರ ಗುಡ್ಡ ಅರಣ್ಯ ಪ್ರದೇಶಕ್ಕೆ ವ್ಯಾಪಿಸಿತ್ತು. ಬಂಡೀಪುರ ಮತ್ತು ಗುಂಡ್ಲುಪೇಟೆ ಉಪವಿಭಾಗದ ಎಸಿಎಫ್‌ಗಳಾದ ರವಿಕುಮಾರ್‌, ನಟರಾಜು, ಕುಂದಕೆರೆ, ಬಂಡೀಪುರ, ಜಿ.ಎಸ್‌.ಬೆಟ್ಟ, ಮದ್ದೂರು, ಓಂಕಾರ ಹಾಗೂ ಮೊಳೆಯೂರು ವಲಯಾರಣ್ಯಾಧಿಕಾರಿಗಳಾದ ಶ್ರೀನಿವಾಸ್‌, ಮಂಜುನಾಥ್‌, ಪುಟ್ಟಸ್ವಾಮಿ, ಶæೖಲೇಂದ್ರ ಕುಮಾರ್‌, ನವೀನ್‌ಕುಮಾರ್‌ ಮತ್ತು ನೌಕರರು, ಬೆಂಕಿ ವಾಚರ್‌ಗಳು ಕೂಡಲೇ ಧಾವಿಸಿ ಬೆಂಕಿ ನಂದಿಸಿದ್ದಾರೆ. ಸುಮಾರು 30 ಎಕರೆಯಷ್ಟು ಅರಣ್ಯ ಪ್ರದೇಶದಲ್ಲಿ ನೆಲಬೆಂಕಿ ವ್ಯಾಪಿಸಿತ್ತು. ವನ್ಯಜೀವಿ ಸಂಪತ್ತಿಗೆ ಯಾವುದೇ ಹಾನಿಯಾಗಿಲ್ಲ ಎಂದು ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ.