ಸೋಲು, ಗೆಲುವನ್ನು ಸ್ಪರ್ಧಾತ್ಮಕವಾಗಿ ಪರಿಗಣಿಸಿ

ಚಾಮರಾಜನಗರ : ಲೋಕಸಭೆ ಚುನಾವಣೆಯ ಫಲಿತಾಂಶದಲ್ಲಿ ಗೆಲುವು, ಸೋಲು ಏನೇ ಬಂದರೂ ಅದನ್ನು ಸ್ಪರ್ಧಾತ್ಮಕವಾಗಿ ಪರಿಗಣಿಸಬೇಕು ಎಂದು ಕೊಳ್ಳೇಗಾಲ ಶಾಸಕ ಎನ್‌. ಮಹೇಶ್‌ ತಮ್ಮ ಪಕ್ಷದ ಕಾರ್ಯಕರ್ತರಿಗೆ ಸಲಹೆ ನೀಡಿದರು.

ನಗರದ ವರ್ತಕರ ಭವನದಲ್ಲಿ ಗುರುವಾರ ಬಹುಜನ ಸಮಾಜ ಪಾರ್ಟಿಯ ಚಾಮರಾಜನಗರ ವಿಧಾನಸಭಾ ಕ್ಷೇತ್ರದ ಕಾರ್ಯಕರ್ತರು ಮತ್ತು ಮತದಾರರಿಗೆ ಕೃತಜ್ಞತೆ ಸಲ್ಲಿಸುವ ಸಲುವಾಗಿ ಆಯೋಜಿಸಲಾಗಿದ್ದ ಸಭೆಯನ್ನು ಉದ್ಘಾಟಿಸಿ ಮಾತನಾಡಿದರು.

ಫಲಿತಾಂಶ ಏನೇ ಆಗಲಿ. ಬಹುಜನ ಚಳವಳಿಯ ಹಿತದೃಷ್ಟಿಯಿಂದ ಪಕ್ಷ ದ ಕಾರ್ಯಕರ್ತರು ಹಳ್ಳಿಗಳಲ್ಲಿ ಶಾಂತಿ ಕಾಯ್ದುಕೊಳ್ಳಬೇಕು . ಯಾವುದೇ ಹಿಂಸೆ, ಗಲಾಟೆಗೆ ಅವಕಾಶ ಮಾಡಿಕೊಡಬಾರದು ಎಂದರು.

ಬಹುಜನ ಚಳವಳಿ ನಮಗೆ ಪ್ರಬುದ್ಧತೆ ಕಲಿಸಿದೆ. ಮೇ 23ರ ಲೋಕಸಭೆ ಚುನಾವಣೆಯ ಫಲಿತಾಂಶದ ಸೋಲು- ಗೆಲುವುವನ್ನು ಸಮನಾಗಿ ಸ್ವೀಕರಿಸೋಣ. ಇನ್ನೂ ಮುಂದಿನ 5 ವರ್ಷ ಸವಾಲಿನ ವರ್ಷವಾಗಿದೆ. ಎಲ್ಲ ಜಾತಿಗಳ ನಡುವೆ ಸಂಪರ್ಕ ಸೇತುವೆ ನಿರ್ಮಾಣ ಮಾಡಿ ಮಹಿಳೆಯರನ್ನು ಬಹುಜನ ಚಳವಳಿಯಲ್ಲಿ ತೊಡಗಿಸೋಣ ಎಂದರು.

ಮುಂದಿನ 5 ವರ್ಷದಲ್ಲಿ ಕಾಂಗ್ರೆಸ್‌, ಬಿಜೆಪಿಗೆ 3ನೇ ಶಕ್ತಿಯಾಗಿ ಬಿಎಸ್ಪಿ ಬರುವುದು ಖಚಿತ ಎಂದು ವಿಶ್ವಾಸ ವ್ಯಕ್ತಪಡಿಸಿದರು.

ನಮ್ಮ ಪಕ್ಷದ ಕಾರ್ಯಕರ್ತರು ಮಾನಸಿಕ, ದೈಹಿಕವಾಗಿ ಸದೃಢರಾಗಿ ಮುಂದಿನ 5 ವರ್ಷದವರಗೆ ಬಹುಜನ ಚಳವಳಿಯನ್ನು ಮುನ್ನೆಡಿಸುವ ಮೂಲಕ 2024ರ ಲೋಕಸಭೆ ಚುನಾವಣೆಯಲ್ಲಿ ಪಕ್ಷ ವನ್ನು ಅಧಿಕಾರ ತರಲು ಶ್ರಮಿಸೋಣ ಎಂದರು.

ಅಭ್ಯರ್ಥಿ ಕೃತಜ್ಞತೆ: ಬಿಎಸ್ಪಿ ಅಭ್ಯರ್ಥಿ ಡಾ. ಶಿವಕುಮಾರ್‌ ಮಾತನಾಡಿ, ಪ್ರತಿಹಳ್ಳಿಯಲ್ಲೂ ಜನತೆ ಉತ್ಸುಕತೆಯಿಂದ ನಮ್ಮನ್ನು ಬೆಂಬಲಿಸಿದ್ದಾರೆ. ಅಲ್ಲದೆ ಪಕ್ಷ ದ ಕಾರ್ಯಕರ್ತರು ಬಿಸಿಲು, ಮಳೆ ಎನ್ನದೇ ನಮ್ಮ ಪರ ಪ್ರಚಾರ ಮಾಡಿದ್ದಾರೆ. ಇವರೆಲ್ಲರಿಗೂ ತಾವು ಕೃತಜ್ಞ ಎಂದು ಹೇಳಿದರು.

ಕಾಂಗ್ರೆಸ್‌ , ಬಿಜೆಪಿ ದೇಶವನ್ನು ವಿದೇಶದ ಕಂಪನಿಗಳಿಗೆ ಮಾರಿ ಬಿಡುತ್ತವೆ. ದೇಶದ ಉಳಿವು ಬಹುಜನ ಸಮಾಜ ಪಾರ್ಟಿಯಿಂದ ಮಾತ್ರ ಸಾಧ್ಯ ಎಂದರು.

ತಾಲೂಕು ಅಧ್ಯಕ್ಷ ಆಲೂರು ಮಲ್ಲು ಅಧ್ಯಕ್ಷ ತೆ ವಹಿಸಿದ್ದರು. ಸಭೆಯಲ್ಲಿ ಪಕ್ಷ ದ ರಾಜ್ಯ ಪ್ರಧಾನ ಕಾರ್ಯದರ್ಶಿ ಮಾದೇಶ್‌ ಉಪ್ಪಾರ್‌, ಮೈಸೂರು ವಲಯ ಉಸ್ತುವಾರಿ ಸೋಸಲೆ ಸಿದ್ದರಾಜು, ಜಿಲ್ಲಾಧ್ಯಕ್ಷ ಮಾದಪ್ಪ, ಜಿಲ್ಲಾ ಪ್ರಧಾನ ಕಾರ್ಯದರ್ಶಿ ಬ.ಮ.ಕೃಷ್ಣಮೂರ್ತಿ, ಜಿಲ್ಲಾ ಸಮಿತಿ ಸದಸ್ಯ ಬ್ಯಾಡಮೂಡ್ಲು ಬಸವಣ್ಣ, ನಗರ ಘಟಕ ಅಧ್ಯಕ್ಷ ಚಿನ್ನಸ್ವಾಮಿ, ತಾಲೂಕು ಉಸ್ತುವಾರಿ ಎಸ್‌.ಪಿ.ಮಹೇಶ್‌, ಗ್ರಾ.ಪಂ.ಸದಸ್ಯರಾದ ನಂಜುಂಡಸ್ವಾಮಿ, ಬಸವರಾಜು, ಶಿವಪ್ರಸಾದ್‌, ಮುಖಂಡರಾದ ಕೃಷ್ಣಯ್ಯ, ವಾಸು ಇತರರು ಹಾಜರಿದ್ದರು.