ಕೆಸ್ತೂರು ಸರಕಾರಿ ಶಾಲೆಯಲ್ಲಿ ಕೆಟ್ಟ ನೀರಿನ ಮೋಟಾರ್
ಯಳಂದೂರು: ತಾಲೂಕಿನ ಕೆಸ್ತೂರು ಗ್ರಾಮದ ಸರಕಾರಿ ಹಿರಿಯ ಪ್ರಾಥಮಿಕ ಶಾಲೆಯ ವಿದ್ಯಾರ್ಥಿಗಳು ಬಿಸಿ ಊಟ ಮಾಡಿದ ನಂತರ ಕೈ ಹಾಗೂ ತಟ್ಟೆ ತೊಳೆಯಲು ನೀರು ಇಲ್ಲದೆ ಬೇರೆ ಬಡಾವಣೆಗಳಿಗೆ ತೆರಳುವ ಪರಿಸ್ಥಿತಿ ಉಂಟಾಗಿದೆ.
ಈ ಶಾಲೆಯಲ್ಲಿ 1ರಿಂದ 8ನೇ ತರಗತಿವರೆಗೆ 380 ವಿದ್ಯಾರ್ಥಿಗಳು ವಿದ್ಯಾಭ್ಯಾಸ ಮಾಡುತ್ತಿದ್ದು, ನೀರಿನ ಮೋಟಾರ್ ಕೆಟ್ಟು 10 ದಿನಗಳೇ ಕಳೆದಿದೆ. ಈ ಬಗ್ಗೆ ಗ್ರಾ.ಪಂಗೆ ದೂರು ಸಲ್ಲಿಸಿದ್ದರೂ ಯಾವುದೇ ಪ್ರಯೊಜನವಾಗಿಲ್ಲ. ಕುಡಿಯಲು, ಮಧ್ಯಾಹ್ನದ ಬಿಸಿ ಊಟ ಮಾಡಿದ ನಂತರ ತಟ್ಟೆ, ಕೈ ತೊಳೆಯಲು ನೀರಿಲ್ಲದೆ ವಿದ್ಯಾರ್ಥಿಗಳು ತೊಂದರೆ ಅನುಭವಿಸುವಂತಾಗಿದೆ.
ಶಾಲೆಯಲ್ಲಿ ನೀರಿನ ಅವ್ಯವಸ್ಥೆಯಿಂದ ವಿದ್ಯಾರ್ಥಿಗಳು ಬಯಲು ಶೌಚಾಲಯಕ್ಕೆ ತೆರಳಬೇಕಾಗಿದೆ. ಇಲ್ಲಿ ಮೂರು ಮಂದಿ ಅಡುಗೆ ಸಹಾಯಕಿಯರು ಇದ್ದು, 10 ದಿನಗಳಿಂದ ನಿತ್ಯ ಬೇರೆ ಬಡಾವಣೆಗಳಿಗೆ ತೆರಳಿ ನೀರು ಶೇಖರಣೆ ಮಾಡುವುದೇ ಇವರ ಕಾಯಕವಾಗಿದೆ. ಆದರೂ ನೀರು ಪೂರೈಸಲು ಸಾಧ್ಯವಾಗದೆ ನೀರಿಗಾಗಿ ಪರದಾಡುವಂತಾಗಿದೆ. ಈ ಶಾಲೆ ಮುಖ್ಯ ರಸ್ತೆಗೆ ಹೊಂದಿಕೊಂಡಿರುವುದರಿಂದ ಈ ರಸ್ತೆಯಲ್ಲಿ ವಾಹನಗಳು ಹೆಚ್ಚಾಗಿ ಸಂಚರಿಸುವುದರಿಂದ ಮಕ್ಕಳು ನೀರಿಗಾಗಿ ಜೀವ ಭಯದಿಂದ ರಸ್ತೆ ದಾಟಿ ಬೇರೆಬೇರೆ ಬಡಾವಣೆಗಳಿಗೆ ತೆರಳಬೇಕಾಗಿದೆ.
ಸಂಬಂಧಪಟ್ಟ ಅಧಿಕಾರಿಗಳು ಇತ್ತ ಗಮನಹರಿಸಿ ಕೆಟ್ಟಿರುವ ಮೋಟರ್ ದುರಸ್ಥಿಗೊಳಿಸಿ ಶಾಲೆಗೆ ಕುಡಿಯುವ ನೀರಿನ ವ್ಯವಸ್ಥೆ ಮಾಡಿಕೊಡಬೇಕೆಂದು ಪೋಷಕರು ಮನವಿ ಮಾಡಿದ್ದಾರೆ.