ಕ್ಯಾಂಪ್‌ನಿಂದ ಕಣ್ಮರೆಯಾಗಿ ಕಾಡಾನೆಗಳೊಂದಿಗೆ ಸಿಕ್ಕಿಬಿದ್ದ ಭಾಸ್ಕರ ಆನೆ

ಚಾಮರಾಜನಗರ: ಬಂಡೀಪುರ ರಾಷ್ಟ್ರೀಯ ಉದ್ಯಾನದ ರಾಂಪುರ ಕ್ಯಾಂಪ್‌ನಿಂದ ನಾಪತ್ತೆಯಾಗಿದ್ದ ಭಾಸ್ಕರ ಆನೆ ನಾಗರಹೊಳೆ ಅಭಯಾರಣ್ಯ ಪ್ರದೇಶದಲ್ಲಿ ಪತ್ತೆಯಾಗಿದ್ದಾನೆ.

ಇತರೆ ಆನೆಗಳೊಂದಿಗೆ ಮೇಯಲು ಬಿಟ್ಟಿದ್ದ ಸಂದರ್ಭದಲ್ಲಿ ಸಾಕಾನೆ ಭಾಸ್ಕರ (11) ಕಾಣದಾಗಿತ್ತು. ತಡವಾಗಿ ಬರಬಹುದು ಕಾದರೂ ಬಂದಿರಲಿಲ್ಲ. ನಂತರ ಪತ್ತೆಗೆ ಮುಂದಾದರೂ ಸಿಕ್ಕಿರಲಿಲ್ಲ. ಇದು ಕಬಿನಿ ಹಿನ್ನೀರು ದಾಟಿ ಅಂತರಸಂತೆ ವಲಯದಿಂದ ನಾಗರಹೊಳೆ ಅಭಯಾರಣ್ಯದ ಡಿ.ಬಿ ಕುಪ್ಪೆ ಭಾಗಕ್ಕೆ ಬಂದಿರುವ ಬಗ್ಗೆ ಸಂಶಯ ವ್ಯಕ್ತವಾಗಿತ್ತು.

ಈ ಹಿನ್ನೆಲೆಯಲ್ಲಿ ಸಾಕಷ್ಟು ಜಾಲಾಡಿದಾಗ ಕಾಡಾನೆಗಳ ಜತೆಯಲ್ಲಿ ಕಂಡು ಬಂತು. ನಂತರ ಪಶು ವೈದ್ಯಾಧಿಕಾರಿ ಡಾ.ನಾಗರಾಜು ಅವರು, ನಾಗರಹೊಳೆ ಅಭಯಾರಣ್ಯದ ಅಧಿಕಾರಿ ಮತ್ತು ನೌಕರರ ಸಹಕಾರದಲ್ಲಿ ಕಾಡಾನೆ ಜತೆ ಸೇರಿಕೊಂಡಿದ್ದ ಭಾಸ್ಕರನನ್ನು ಅರವಳಿಕೆ ನೀಡುವ ಮೂಲಕ ಸೆರೆ ಹಿಡಿಯುವಲ್ಲಿ ಯಶಸ್ವಿಯಾದರು.

ಕಾಲಿಗೆ ಕಟ್ಟಿದ್ದ ತುಂಡು ಸರಪಳಿಯಿಂದ ಭಾಸ್ಕರನನ್ನು ಗುರುತಿಸಲು ಸಾಧ್ಯವಾಯಿತು. ದಿನದ ವಿಶ್ರಾಂತಿ ನಂತರ ಸಾಕಾನೆಯನ್ನು ಸ್ವಸ್ಥಾನಕ್ಕೆ ಲಾರಿಯಲ್ಲಿ ಸಾಗಿಸಲಾಯಿತು ಎಂದು ಪಶುವೈದ್ಯಾಧಿಕಾರಿ ಡಾ.ನಾಗರಾಜು ತಿಳಿಸಿದ್ದಾರೆ.