ಬಣ್ಣಾರಿ-ದಿಂಬಂ ಮಾರ್ಗ: ಭಾರಿ ವಾಹನಗಳಿಗೆ ನಿಷೇಧ

ಚಾಮರಾಜನಗರ : ರಾಷ್ಟ್ರೀಯ ಹೆದ್ದಾರಿ 948ರಲ್ಲಿ ಬರುವ ಬಣ್ಣಾರಿ-ದಿಂಬಂ ಫಾಟ್‌ ರಸ್ತೆಯ 27 ಹೇರ್‌ಪಿನ್‌ ತಿರುವುಗಳಲ್ಲಿ 12 ಚಕ್ರಗಳಿಗಿಂತ ಮೇಲ್ಪಟ್ಟ ಭಾರಿ ವಾಹನಗಳ ಸಂಚಾರವನ್ನು ನಿಷೇಧಿಸಿದ್ದು ವೇಗಮಿತಿಯನ್ನು ಗಂಟೆಗೆ 30 ಕಿ.ಮೀ.ನಂತೆ ನಿಗದಿಪಡಿಸಲಾಗಿದೆ.

ತಮಿಳುನಾಡಿನ ಈರೋಡ್‌ ಜಿಲ್ಲೆಯ ಜಿಲ್ಲಾಧಿಕಾರಿಯವರು ರಸ್ತೆ ಸುರಕ್ಷ ತಾ ಸಮಿತಿ ತೀರ್ಮಾನದಂತೆ ವಾಹನ ಸಂಚಾರ ಸಂಬಂಧ ಹಲವು ಕ್ರಮಗಳನ್ನು ಕೈಗೊಳ್ಳಲು ತಿಳಿಸಿದ್ದಾರೆ.

ಗರಿಷ್ಠ 3.3 ಮೀಟರ್‌ ಉದ್ದವುಳ್ಳ ವಾಹನಗಳು ಮಾತ್ರ ಸಂಚರಿಸಬಹುದಾಗಿದೆ. ಗರಿಷ್ಠ 4.2 ಎತ್ತರದ ನಿಗದಿ ಪಡಿಸಿರುವ ವಾಹನಗಳನ್ನು ಮಾತ್ರ ಬಣ್ಣಾರಿ ಮತ್ತು ಹಾಸನೂರು ಚೆಕ್‌ಪೋಸ್ಟ್‌ಗಳಲ್ಲಿ ತಪಾಸಣೆ ಮಾಡಲಾಗುವುದು. ಗಂಟೆಗೆ 30 ಕಿ.ಮೀ.ನಂತೆ ವೇಗದ ಮಿತಿ ನಿಗದಿಪಡಿಸಲಾಗಿದ್ದು, ನಿಗದಿತ ಸಮಯದಲ್ಲಿ ಬಣ್ಣಾರಿ-ದಿಂಬಂ ಘಾಟ್‌ ರಸ್ತೆಯಲ್ಲಿ ಕ್ರಮಿಸಬೇಕು. 12ಕ್ಕಿಂತ ಹೆಚ್ಚಿನ ಚಕ್ರವುಳ್ಳ ವಾಹನಗಳ ಸಂಚಾರವನ್ನು ಸಂಪೂರ್ಣವಾಗಿ ನಿಷೇಧಿಸಲಾಗಿದೆ.

ಬಣ್ಣಾರಿ ಮತ್ತು ಹಾಸನೂರು ಚೆಕ್‌ಪೋಸ್ಟ್‌ಗಳಲ್ಲಿ ವಾಹನಗಳ ತೂಕವನ್ನು ಪರಿಶೀಲಿಸಿ ಮತ್ತೆ ಸಂಚಾರಕ್ಕೆ ಅನುವು ಮಾಡಲಾಗುವುದು.

ಕಾಡು ಪ್ರಾಣಿಗಳ ಸಂರಕ್ಷ ಣಾ ಹಿತದೃಷ್ಟಿಯಿಂದ ವಾಣಿಜ್ಯ, ಸರಕು ಸಾಗಣೆ ವಾಹನಗಳ ಸಂಚಾರವನ್ನು ಸಂಜೆ 6ರಿಂದ ಬೆಳಗ್ಗೆ 6ರವರೆಗೆ ನಿಷೇಧಿಸಲಾಗಿದೆ.

ಶುಲ್ಕ ನಿಗದಿ: ಸತ್ಯಮಂಗಲ ಹುಲಿ ಸಂರಕ್ಷಿತ ಚೆಕ್‌ ಪೋಸ್ಟ್‌ನಲ್ಲಿ ವಾಹನಗಳ ಪ್ರವೇಶ ಶುಲ್ಕ ನಿಗದಿಪಡಿಸಿದೆ. ಪ್ರಯಾಣಿಕರ 4 ಚಕ್ರದ ವಾಹನಗಳಿಗೆ 20 ರೂ. ಹಾಗೂ ವ್ಯಾನ್‌ಗಳಿಗೆ 30 ರೂ.ನಂತೆ ಶುಲ್ಕ ನಿಗದಿಗೊಳಿಸಿದೆ. ಲಘು ಮತ್ತು ಭಾರಿ ವಾಣಿಜ್ಯದ 4 ಚಕ್ರದ ವಾಹನ ಹಾಗೂ ಚಿಕ್ಕ ಲಾರಿ 407 ಇತ್ಯಾದಿಗಳಿಗೆ 20 ರೂ., 6 ಚಕ್ರಗಳ ವಾಹನಕ್ಕೆ 50 ರೂ., 8 ಚಕ್ರದ ವಾಹನಗಳಿಗೆ 60 ರೂ., 10 ಚಕ್ರಗಳ ವಾಹನಗಳಿಗೆ 80 ರೂ. ಹಾಗೂ 12 ಚಕ್ರದ ವಾಹನಗಳಿಗೆ 100 ರೂ.ಗಳ ಶುಲ್ಕ ನಿಗದಿಪಡಿಸಲಾಗಿದೆ

ಸರಕಾರಿ, ಸಾರ್ವಜನಿಕ ಹಾಗೂ ತುರ್ತು ವಾಹನ (ಆಂಬ್ಯುಲೆನ್ಸ್‌)ಗಳಿಗೆ ಪ್ರವೇಶ ಶುಲ್ಕದ ರಿಯಾಯಿತಿ ನೀಡಲಾಗಿದೆ ಎಂದು ಪ್ರಕಟಣೆ ತಿಳಿಸಿದೆ.